Po o E Maua le Agaga o le Faataulagaina Tōtino?
1 O le talisapaia o le mea na faataunuuina ma le lē manatu faapito e Iesu Keriso mo le fanau a tagata, e ao ona uunaia ai i tatou uma e faaaogā o tatou tomai, mālosi, ma agavaa i se auala faataulaga tōtino. Ua ʻaiʻoi mai le Tusi Paia: “Ia outou tuuina atu o outou tino i le Atua, o le taulaga ola, ma le paia, ma le mālie.” (Roma 12:1) O le suʻesuʻe ifo ia te oe lava mai lea taimi i lea taimi o le a fesoasoani ia te oe e iloa ai po o e faaalia atoatoa lena ituʻāiga o agaga i le tulaga e te mafaia ai.
2 I le Sāʻilia o le Poto o le Tusi Paia: Po o e faataatia ese se taimi mo le faitauina tōtino o le Tusi Paia ma suʻesuʻeina e lē aunoa? Pe e te pipii i lena faasologa? Pe fai ma au masani ona sauniuni lelei mo sauniga a le faapotopotoga? Afai o oe o se ulu o le aiga, pe e faia e lē aunoa sa outou suʻesuʻega faale-Tusi Paia ma lou ʻāiga? O le faia o nei mea e ono manaomia ai le faataulagaina o le taimi lea e faaalu e matamata ai i le televise po o le faaaogāina o le komepiuta po o isi mea. Ae peitaʻi, māʻeu se taulaga faatauvaa ua faia, pe a e iloa o le taimi lea ua faaalu i le Afioga a le Atua o le a fesoasoani e taʻitaʻiina ai oe i le ola e faavavau!—Ioa. 17:3.
3 I le Toleniina o Lau Fanau: O le taimi aupito sili ona lelei e amata ai ona aʻoaʻo i le ala o le faataulagaina tōtino, o le taimi a o laiti. Ia aʻoaʻo lau fanau e faapea, a o iai le taimi e taalo ai, e tatau foʻi la ona iai se taimi e galue ma se taimi mo gaoioiga faatiokarate. (Efe. 6:4) Tuu atu ia i latou ni galuega aogā e fai i le fale. Fai se faasologa faifai pea ina ia faia se sao i le faiva ma i latou. Ia lagolagoina mālosi au faatonuga e lau lava faaaʻoaʻoga lelei.
4 I Galuega a le Faapotopotoga: E faatamāoʻāigaina se faapotopotoga pe afai e faia e tagata taʻitoʻatasi se taulaga ma le lotomalie e faataunuuina mea mo le lelei lautele. (Epe. 13:16) Pe e mafai ona e faaalu se taimi e sili atu i le galuega talaʻi o le Malo ma le faia o soo? Pe e mafai ona e tauofo e fesoasoani i ē mamaʻi po o tagata mātutua, atonu i se auala e latou te faimalaga ai i sauniga?
5 A o leʻi faia le taulaga aupito sili i lona soifuaga faaletagata, na fautuaina ai e Iesu ona soo ina ia taulaʻi atu la latou vaʻai i mataupu o le Malo, ma ia faatulaga lua isi mea uma o le olaga. (Mata. 6:33) O le tausisia o sea ituʻāiga o agaga faataulagaina o le a aumaia ai ia i tatou le fiafiaga sili a o tatou faaauau pea ona auauna ia Ieova ma le lotofiafia.