Le Upu Moni e Faatatau i le Atua ma Keriso

O Ai le Atua?

O Ai le Suafa o le Atua? Na ia fetalai: “O aʻu o Ieova. O loʻu igoa lea.” (Isaia 42:8) E tusa ma le 7,000 taimi o loo taʻua ai le suafa o le Atua i le Tusi Paia. Peitaʻi, ua suia e nisi o loo faaliliuina le Tusi Paia le suafa o le Atua i ni faalupega e pei o le “Alii.” E finagalo o ia ina ia avea oe ma ana uō ma valaaulia oe e “valaau atu i lona suafa.”—Salamo 105:1.

Faalupega o Ieova. O loo faasino atu le Tusi Paia iā Ieova pe a taʻua faalupega e pei o le “Atua,” “o Lē e Ona le Malosi Uma Lava,” “Alii,” ma le “Pule Silisili Ese.” O loo faamauina i le Tusi Paia le tele o tatalo o loo taʻua ai ma le faaaloalo le faalupega o le Atua ma lona suafa totino o Ieova.—Tanielu 9:4.

Foliga o le Atua. O le Atua o se foafoaga agaga. (Ioane 4:24) Ua faamautinoa mai e le Tusi Paia “e leai lava se tasi ua vaai i le Atua.” (Ioane 1:18) Ua faailoa mai e le Tusi Paia ona faalogona. O gaoioiga a tagata e mafai ona faanoanoa ai Ieova pe ʻfiafia i ē e lē ponā o latou ala.’—Faataoto 11:20; Salamo 78:40, 41.

Uiga Matagofie o le Atua. E lē faailoga tagata le Atua i so o se tagata mai ituaiga eseese. (Galuega 10:34, 35) “E alofa mutimutivale ma tigā alofa, e telegese lona toʻasā ae e tele lona alofa faamaoni ma tausisi i ana fetalaiga.” (Esoto 34:6, 7) Peitaʻi, e fā uiga matilatila o le Atua.

Malosi. Talu ai o ia o “Lē e ona le malosi uma lava,” e lē gata mai la lona mana e faataunuu ai ana folafolaga.—Kenese 17:1.

Atamai. E sili atu le atamai o le Atua i lo o se isi lava. O le mea lea na taʻua ai i le Tusi Paia o le “Atua atamai e toʻatasi.”—Roma 16:27.

Faamasinotonu. E faia lava e le Atua le mea saʻo. E “atoatoa” ana gaoioiga ma e “lē o iā te ia se faiga lē tonu.”—Teuteronome 32:4.

Alofa. O loo taʻua i le Tusi Paia, “o le Atua o le alofa lava ia.” (1 Ioane 4:8) E lē gata e faaalia e le Atua le alofa, ae o ia o le faaaʻoaʻoga silisili o le alofa. O le alofa e faavae ai mea uma e na te faia, ma e tatou te maua ai aogā i le tele o auala.

Faauōga a le Atua ma Tagata. O le Atua o lo tatou Tamā alofa i le lagi. (Mataio 6:9) Pe a tatou faatuatua iā te ia, o le a mafai ona avea i tatou ma ana uō. (Salamo 25:14) O le mea moni, o loo valaaulia i tatou e le Atua ina ia mafuta vavalalata atu iā te ia e ala i le tatalo, ma ʻlafo atu o tatou popolega uma iā te ia, auā o loo manatu mamafa mai o ia iā i tatou.’—1 Peteru 5:7; Iakopo 4:8.

O le ā le Eseesega o le Atua ma Keriso?

E Lē o Iesu o le Atua. E tutasi Iesu, auā e na o ia na foafoaina tuusaʻo e le Atua. O le māfuaaga lea ua taʻua ai o ia i le Tusi Paia o le Alo o le Atua. (Ioane 1:14) Ina ua uma ona foafoaina Iesu, na faaaogā o ia e Ieova “o se tufuga poto” e na te foafoaina isi mea uma.—Faataoto 8:30, 31; Kolose 1:15, 16.

E leʻi taʻua e Iesu o ia lava o le Atua. Nai lo o lea na ia faapea mai: “Auā o aʻu o lona sui, ma o [le Atua] o lē na auina mai aʻu.” (Ioane 7:29) Ina ua talanoa Iesu i se tasi o ona aposetolo, na taʻua ai e Iesu Ieova o “loʻu Tamā, ma lo outou Tamā,” ma o “loʻu Atua ma lo outou Atua.” (Ioane 20:17) Ina ua maliu Iesu, na toe faatūina e Ieova o ia i le lagi ma tuuina i ai le pule i lona itu taumatau.—Mataio 28:18; Galuega 2:32, 33.

E Mafai Ona Fesoasoani Iesu Keriso iā te Oe ia Mafuta Vavalalata iā Ieova

Na afio mai Iesu i le lalolagi ina ia aʻoaʻo i tatou e faatatau i lona Tamā. Na fetalai Ieova e faatatau iā Iesu e faapea: “O loʻu Atalii pele lenā; ia faalogo iā te ia.” (Mareko 9:7) E sili atu le iloa e Iesu o le Atua, nai lo o se isi lava. Na ia faapea mai: “E leai se tasi e iloa po o ai le Tamā, ua na o le Atalii ma sē ua loto le Atalii e faaali i ai.”—Luka 10:22.

Na atoatoa ona faaalia e Iesu uiga o lona Tamā. Na faaaʻoaʻo Iesu i uiga o lona Tamā, ma na ia faapea mai: “O lē ua vaai mai iā te aʻu, ua vaai foʻi o ia i le Tamā.” (Ioane 14:9) Na taumafai Iesu ia vavalalata tagata i le Atua, e ala i le faailoa mai o le alofa o lona Tamā i ana upu ma gaoioiga. Na ia faapea mai: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.” (Ioane 14:6) Na ia toe taʻua: “O ē o loo i le tapuaʻiga moni, latou te tapuaʻi i le Tamā i le agaga ma le upu moni, auā o le mea moni, o loo saʻilia e le Tamā tagata faapena e tapuaʻi atu iā te ia.” (Ioane 4:23) Seʻi faaata i le mafaufau, o loo saʻilia e Ieova tagata e pei o oe o loo mananaʻo ia iloa le upu moni e faatatau i le Atua!