Ia Mataʻu ia Ieova i le Aso Atoa
1 “O le mataʻu ia Ieova, o le amataga lea o le poto.” (Sala. 111:10) Ua faagaeeina i tatou e lea mataʻu e faia galuega lelei ma fesoasoani ia i tatou e ʻalo ese i mea leaga. (Faata. 16:6) O lenei mataʻu o se matuā āva loloto lea i Lē na Foafoaina i tatou, ua uunaʻia ai i tatou e teena le faia o mea e lē fiafia ai o ia ma le lē usiusitai ia te ia. O se mea e manaʻomia ona tatou ati aʻe ma faaalia i le aso atoa.—Faata. 8:13.
2 I aso uma lava, e aumaia ai e le agaga o le lalolagi a Satani le anoanoaʻi o omiga ia i tatou ina ia lolo atu i ona ala leaga. (Efe. 6:11, 12) Ua agasala lo tatou tino lē lelei atoatoa ma e masani lava ona faanaunau e faia le mea leaga. (Kala. 5:17) O lea, ina ia usiusitai i poloaʻiga a Ieova, ina ia fiafia ma maua le ola, e tatau ai ona tatou matataʻu ia te ia i le aso atoa.—Teu. 10:12, 13.
3 I le Eperu 10:24, 25, ua apoapoaʻia ai i tatou e faapotopoto faatasi ina ia faamalosiau le tasi i le isi “ia atili ai foi ona faapea” i lenei vaitaimi o loo tatou ola ai. E matuā tāua le auai e lē aunoa i sauniga ina ia faasaoina ai i tatou i nei aso e gata ai. O lo tatou matataʻu i le faia o se mea e lē fiafia ai le Atua ua uunaʻia ai i tatou e auai i sauniga ma matuā faatāuaina le fuafuaga o na sauniga. O i latou e matataʻu i le Atua, e manatu i le faia o se sao i sauniga faa-Kerisiano o se faaeaga paia.
4 O le usiusitai i le poloaʻiga e talaʻi le tala lelei o le Malo, o se tasi lea o auala e tatou te faaalia ai lo tatou matataʻu i le Atua. (Mata. 28:19, 20; Galu. 10:42) O se sini autū o la tatou galuega talaʻi, o le fesoasoani lea i isi e atiina aʻe le mataʻu ia Ieova ma gauaʻi atu i lona finagalo. E tatou te faataunuuina lenei mea e ala i le faia o toe asiga, ma taumafai e amataina ni suʻesuʻega faale-Tusi Paia i aiga, ma le aʻoaʻoina o isi i poloaʻiga uma a le Atua. O le auala lea, e tatou te faaalia ai lo tatou matataʻu ia Ieova ma le alolofa i o tatou tuaoi.—Mata. 22:37-39.
5 O i latou e lē matataʻu i le Atua, e lē taulau ona faatupuina se uiga talisapaia agaʻi i mea faaleagaga, ma latou lolo atu i le ea e oti ai, po o uiga faalemafaufau, o le lalolagi. (Efe. 2:2) Tau ina avea ma a tatou faaiʻuga maumauaʻi e “auauna ai i le Atua ma le migao, ma le mataʻu.” (Epe. 12:28) I lea, o le a tatou selesele mai ai faamanuiaga o ni ē e matataʻu ia Ieova i le aso atoa.