Le Upu Moni e Faatatau i le Lumanaʻi
Pe na iai se taimi na e taumānatu ai po o le a faapeʻī le lumanaʻi? Ua faailoa mai e le Tusi Paia iā i tatou mea e sili ona tāua ua toeitiiti ona tutupu ma o le a aafia ai tagata uma i le lalolagi.
Na faamatala e Iesu le auala e tatou te iloa ai “ua latalata mai le Malo o le Atua.” (Luka 21:31) Ua ia valoia mai o le a iai taua, mafuiʻe tetele, oge, ma faamaʻi, ma o mea na o loo tutupu i aso nei.—Luka 21:10-17.
Ua taʻua atili i le Tusi Paia o “aso e gata ai” o pulega faaletagata, o le a mātaulia i le auala e amioaʻi ai tagata. E mafai ona e faitau i ai i le 2 Timoteo 3:1-5. Pe a e vaaia na uiga ma amioga i le taimi lenei, e lē taumatea e te ioe o nei valoaga ua faataunuuina i o tatou aso.
O le ā le uiga o lenei manatu? Ua lata mai le taimi e faia ai e le Malo o le Atua suiga tetele lea o le a faaleleia ai le olaga i le lalolagi. (Luka 21:36) Ua folafola mai e le Atua mea lelei mo le lalolagi ma tagata o le a nonofo ai e ala i le Tusi Paia. O nisi nei o faaaʻoaʻoga.
PULEGA LELEI
“Ua tuuina atu iā [Iesu] le pule, o le mamalu ma le malo, ina ia auauna iā te ia o nuu, o atunuu, ma gagana uma. O lana pule, o le pulega e faavavau e lē mavae atu, e lē faaumatia foʻi lona malo.”—TANIELU 7:14.
Le uiga: O le a e maua se olaga fiafia i le pulega lea ua faavae e le Atua mo le lalolagi atoa ma ua avea ai lona Atalii ma Tupu.
SOIFUA MĀLŌLŌINA LELEI
“E lē fai mai foʻi se tasi ua nofo ai: ʻOu te maʻi.’”—ISAIA 33:24.
Le uiga: O le a iai se tasi e maʻi pe iai foʻi ni aafiaga tumau o le tino; o le a e ola e aunoa ma le oti.
FILEMU ATOATOA
“Ua ia faaiʻuina taua i tuluʻiga o le lalolagi.”—SALAMO 46:9.
Le uiga: O le a lē toe iai ni faamataʻuga o taua ma le tele o aafiaga e māfua ona o taua.
O LE A TUMU LE LALOLAGI I TAGATA LELEI
ʻO le a lē toe iai le tagata amioleaga; A o ē e agamalu, e fai mo i latou le lalolagi.’—SALAMO 37:10, 11.
Le uiga: O le a lē toe iai ni tagata amioleaga, ae na o tagata e naunau e usitaʻi i le Atua.
O LE A AVEA LE LALOLAGI ATOA MA PARATAISO
“O le a latou fausia fale ma nonofo ai; e latou te totō foʻi togāvine ma aai i ona fua.”—ISAIA 65:21, 22.
Le uiga: O le a matagofie le lalolagi atoa. O le a faataunuuina e le Atua a tatou tatalo, ina ia faia lona finagalo “i le lalolagi.”—Mataio 6:10.