Ia Avea o Sē Faalogologo Lelei
1 E manaʻomia se pulea lelei ina ia faalogologo lelei ai. E manaʻomia foʻi ona iai i lē o faalogologo se faanaunauga e aʻoaʻoina ma maua mai ai aogā i mea o ia faalogo i ai. I lea, na faamamafa ai e Iesu le manaʻoga ina ia uaʻi totoʻa atu ‘i le pe faapefea ona outou faalogologo.’—Luka 8:18.
2 E faatatauina faapitoa lava lenei manatu pe a tatou auai i sauniga a le faapotopotoga, fonotaga ma tauaofiaga. O avanoa nei e tatau ona tatou faalogologo lelei ai. (Epe. 2:1) O nisi nei o manatu o le a fesoasoani ia te oe e avea ai o sē faalogologo lelei i nei aufaatasiga faa-Kerisiano.
◼ Ia talisapaia le tāua o sauniga. O sauniga o se tasi lea o auala sili o loo ‘aʻoaʻoina ai e Ieova’ i tatou e ala mai i “le auauna e pule ua faamaoni.”—Isa. 54:13; Luka 12:42.
◼ Ia sauniuni mamao. Ia autalu le mataupu lea o le a talanoaina ma ia faamautinoa ua aumai lau Tusi Paia ma lau lava kopi o le lomiga lea o loo suʻesuʻeina.
◼ I le taimi o sauniga, ia fai se taumafaiga faapitoa e uaʻi totoʻa atu. E tatau ona ʻalofia le talanoa atu ia te i latou o loo tou nonofo faatasi ma le vaavaai fua i mea o loo faia e isi o le aofia. Taumafai e aua le faatosinaeseina oe e ala i lou mafaufau po o ā mea o le a e faia pe a uma le sauniga po o isi mataupu totino.
◼ Iloilo totoʻa mea o loo folasia mai. Fesili ifo ia te oe lava e faapea: ‘E faapefea ona faatatauina ia te aʻu lenei mea? O afea o le a ou faatatauina ai?’
◼ Fai ni faamaumauga pupuu o manatu autū ma mau o le Tusi Paia. O le a fesoasoani lenei mea ia te oe e taulaʻi atu ai ou manatu i mea o loo talanoaina ma fesoasoani foʻi i lou manatuaina o manatu autū mo le faaaogāina i se taimi mulimuli ane.
3 Ia Aʻoaʻo Lau Fanau e Faalogo: E manaʻomia e tamaiti aʻoaʻoga faaleagaga. (Teu. 31:12) I aso anamua, o “i latou uma o e atamamai i faalogo” o i tagata o le Atua, sa tatau ona faalogologo lelei a o faitauina mai le Tulafono ia te i latou. (Nee. 8:1-3) Afai e aafia ai mātua i sauniga ma uaʻi totoʻa atu, o le a faia foʻi faapena e a latou fanau. E lē o se faiga atamai le aumai o ni mea taalo po o ni api e vali ai ata ina ia faanonofo filemu ai tamaiti. O le ō soo i le fale lē taʻua e aunoa ma se māfuaaga tatau e faalavelavea ai foʻi la latou faalogo. Talu ai o loo “fusifusia le valea i le loto o le tama,” e tatau ai i mātua ona faia ni taumafaiga filigā ia iloa o loo nonofo lelei a latou fanau ma faalogologo i sauniga.—Faata. 22:15.
4 O le avea ma ē faalogologo lelei, ua faamaonia atu ai tatou te atamamai ma mananaʻo ina ia “tupu ai pea [le] poto.”—Faata. 1:5.