E Foaʻi Mai e Ieova le Malosi
1 O le ā sou lagona e uiga i le aposetolo o Paulo? A o tatou faitauina le tusi o Galuega, tatou te talisapaia le maʻeu o lona maelega i le auaunaga ia Ieova. Na faapefea ona faataunuuina e Paulo na mea uma na ia faia? Na ia faapea mai: “Ou te mafaia mea uma lava ona o ia ua faamalosi mai ia te au.” (Fili. 4:13, LF) E mafai foʻi ona tatou maua aogā mai le malosi lea e foaʻi mai e Ieova. E faapefea? E ala i le faaaogāina o sauniuniga e ono ua ia faia mo i tatou, ina ia toe faaolaolaina ma faamalosia ai faaleagaga.
2 Le Afioga a le Atua: E pei lava ona tatau ona tatou taumafaina o taumafa ina ia tausia ai le malosi faaletino, e tatau foʻi ona fafagaina i tatou i le Afioga a le Atua ina ia tumau ai ona ola pea faaleagaga. (Mata. 4:4) Ua saunia e le Tusi Paia le malosi e faatumauina ai i tatou. Ina ia tausia lo tatou maelega ma le aasa mo le upu moni, e manaʻomia ona tatou faia ni suʻesuʻega totino uigā ma mafaufau loloto i ai i aso faisoo pe afai e mafai.—Sala. 1:2, 3.
3 Tatalo: E tāua le faalatalata atu ia Ieova, aemaise lava i taimi e tulaʻi mai ai ni manaʻoga faapitoa. E ala i lona agaga, e na te avatu ai le malosi faafouina ia te i latou o talosaga atu ia te ia mo lea fesoasoani. (Luka 11:13; Efe. 3:16) Ua faalaeiauina i tatou e le Tusi Paia ina “ia finafinau i le tatalo.” (Roma 12:12) Pe e te faia lena mea?
4 Le Faapotopotoga: E tatou te maua foʻi le malosi ma faalaeiauga mai sauniga a le faapotopotoga ma le auaufaatasiga māfana lea tatou te olioli ai ma o tatou uso ma tuafāfine iinā. (Epe. 10:24, 25) Pe a iai ni mea e faalavelavea ai i tatou, e latou te fesoasoani e faalaeiau ma le alofa i tatou.—Faata. 17:17; Fai. 4:10.
5 Le Faiva i le Fanua: O le auai e lē aunoa i le faiva ua fesoasoani ai ia i tatou ina ia tepa taulaʻi atu pea i le Malo ma ona faamanuiaga. E faagaeetia o tatou loto pe a tatou fesoasoani atu i isi ina ia aʻoaʻoina e uiga ia Ieova. (Galu. 20:35) E lē o i tatou uma e mafai ona siitia atu e auauna i le mea o manaʻomia tele ai le fesoasoani pe auai i le auaunaga faataimi atoa, ae e mafai ona tatou faia se sao uigā i le faiva i isi auala.—Epe. 6:10-12.
6 Ovasia Kerisiano: E aogā ia te i tatou faalaeiauga ma fesoasoani ua saunia e toeaina. Ua tofia i latou e Ieova e leoleo le lafu mamoe a le Atua ua tuuina atu i la latou tausiga. (1 Pete. 5:2) E atiina aʻe e ovasia femalagaaʻi ia faapotopotoga o loo latou asia, e pei lava ona sa faia e Paulo i ona aso.—Roma 1:11, 12.
7 Faaaʻoaʻoga a Ē Faamaoni: O se mea e faamalosia ai, le manatunatu i faaaʻoaʻoga faalaeiau a uso galulue faamaoni anamua ma aso nei. (Epe. 12:1) Pe afai e manaʻomia ona toe faamalosia oe, aiseā e te lē faitau ai i se tasi o talaaga faalaeiau o soifuaga i a tatou mekasini, i se tala e ati aʻe ai i le Yearbook, po o nisi o faamatalaga fiafia o le talafaasolopito i aso nei o Molimau a Ieova, i le tusi Proclaimers?
8 Na talia e se tasi uso ua ivasefulu ma le lima ona tausaga le upu moni a o talavou lava. A o talavou lava o ia, na tofotofoina ai lona faatuatua. Ae muamua lava, o nisi o ē na auaufaatasi vavalalata ma le faapotopotoga, na latou lafoaʻia le faalapotopotoga a Ieova. Sa faigatā tele ia te ia le galuega mai lea fale i lea fale. Ae peitaʻi, sa ia faalagolago pea ia Ieova. Sa leʻi pine ae ia olioli i le faiva. Ae faapefea aso nei? E ui lava i le lē lelei o le soifua mālōlōina, ae o loo avea pea o ia ma se tasi o le aiga Peteli i Brooklyn, o loo auauna i le Vaega Pule. E leai se mea o faanoanoa ai o ia ona o loo pipii pea i le faalapotopotoga a Ieova.
9 O se tuafafine o lē o loo avea o se tasi o le aiga Peteli i Peretania, sa papatiso ina ua 13 ona tausaga. Sa amata ona la paeonia ma lona tuagane i le tausaga na sosoo ai, ma i le isi tausaga, na tuuina ai lona tamā i le falepuipui ona o lona solitū i le taimi o le Taua Lona Lua a le Lalolagi. Sa faalagolago atu pea o ia ia Ieova mo le malosi, ma sa faaauau pea ona auauna o ia i le Atua moni. I se taimi mulimuli ane, na faaipoipo atu ai o ia i se uso faamaoni, ma sa la auauna faatasi ai pea i le faia o le finagalo o Ieova. Ina ua mavae le 35 tausaga talu ona faaipoipo, na faafuaseʻi lava ona maliu lana tane. Ae na ia toe maua foʻi le malosi mai ia Ieova, ma o loo faaauau pea ona auauna o ia ia Ieova e oo mai i le aso nei, ma o loo vaavaai atu i luma mo le auaunaga e faavavau e avea o se tasi o le aiga faalelalolagi o Ieova.
10 E fesoasoani ma faamalosia e Ieova ana auauna faamaoni. “Na te avatua le malosi i e ua vaivai; a o e ua leai se malosi, na te faatuputele i ai le malosi.” E mafai ona tatou maua lenei puna o le malosi e lē gata mai, pe a tatou faaaogāina sauniuniga uma o loo taʻua i luga. Ia manatua: “O e faatalitali ia Ieova, e toe faafouina lo latou malosi; . . . latou te femoei, a e le vaivai; latou te savavali, a e le tigaina.” (Isa. 40:29-31) Sa faalagolago atoatoa atu Paulo ia Ieova mo le malosi, ma e tatau foʻi ona faapena i tatou.