O lo Tatou Faatuatua ua Uunaʻia ai i Tatou e Faia Galuega Lelei
1 O le faatuatua na faapogai ai ona gaoioi Noa, Mose, ma Raava. Na fausia e Noa le vaa. Na lafoaʻia e Mose faamanuiaga e vave mavae o le olaga i le maota o Farao. Na faalafi e Raava ia sipai, ma i lea na ia usitaia ai la laʻua faatonuga, ma faasaoina ai lona ʻauaiga. (Epe. 11:7, 24-26, 31) O ā ni galuega lelei ua uunaʻia ai i tatou e lo tatou faatuatua e faia i aso nei?
2 Molimau Atu: O le faatuatua ua uunaʻia ai i tatou e talanoa atu e uiga i lo tatou Atua ofoofogia ma faatulagaga ua ia faia mo le mauaina o le fiafiaga e faavavau. (2 Kori. 4:13) I nisi taimi, atonu e tatou te faatalatū ai e avatu se molimau. Ae afai e tatou te ʻtuuina Ieova i o tatou luma e le aunoa,’ o le a faamalosia ai la i tatou ma aveesea ai le fefe. (Sala. 16:8) Ona faamalosia loa lea e lo tatou faatuatua i tatou e talaʻi atu le tala lelei i o tatou tauaiga, tuaoi, o ē e faigaluega ma aʻoʻoga faatasi, ma isi i avanoa talafeagai uma.—Roma 1:14-16.
3 Ia Faapotopoto Faatasi: O le auai e lē aunoa i sauniga o se tasi lea o galuega lelei e māfua mai i le faatuatua. E faapefea? Pe a tatou faapotopoto faatasi i sauniga faa-Kerisiano, ua faamautinoa ai e tatou te talitonu o loo faatasi Iesu ma i tatou e ala i le agaga paia o le Atua. (Mata. 18:20) Ua faaalia ai i lea lo tatou naunau e fia “faalogo . . . i le mea ua fetalai mai ai le Agaga i ekalesia.” (Faaa. 3:6) Ua tatou matuā utagia ai le faatonuga lea ua tatou maua, auā e ala i lo tatou faatuatua, ua tatou iloa ai o lē o loo aʻoaʻoina i tatou, o lo tatou Faiaʻoga Sili, o Ieova.—Isa. 30:20.
4 O Filifiliga e Tatou te Faia: O le malosi o lo tatou talitonu i mea e lē o vaaia, ua uunaʻia ai i tatou e faamuamua mea faaleagaga i o tatou olaga. (Epe. 11:1) E masani ona aofia ai i lenei mea le faataulagaina o meafaitino. Mo se faaaʻoaʻoga, na teena e se toeaina se galuega e maua ai se tulaga maualuga ma telē ai le totogi talu ai o le a avea ma pogai e na te misia ai nisi sauniga, toesea ai mai lona aiga, ma taofia ai lana faiva faapaeonia. Seʻi o tatou faapena ia ona tuu atu lo tatou faatuatua atoatoa i faamautinoaga a le Tusi Paia e faapea, o le a saunia e Ieova mea e tausia ai i latou o ē e “muai saili [pea] lona malo ma lana amiotonu.”—Mata. 6:33, LF.
5 E lē faapea e lē o mātauina e tagata le taaʻiga malosi ua faia e le faatuatua i o tatou olaga. O le mea moni, ua lauiloa i le lalolagi atoa lo tatou faatuatua. (Roma 1:8) O le mea lea, seʻi o tatou faaalia e ala i galuega lelei e faapea o loo ola lo tatou faatuatua.—Iako. 2:26.