Pe E te “Loto” e Fesoasoani Atu i Isi?
1 Sa manatu mamafa moni lava Iesu i tagata. Ina ua ʻaiʻoi atu se lepela iā Iesu mo se fesoasoani, na faaloaloa atu le aao o Iesu, ma paʻi atu i le tamāloa, ma faapea atu: “Ou te loto i ai, ina mamā ia oe.” (Mare. 1:40-42) O ā auala e mafai ona tatou faaaʻoaʻo ai i uiga faaalia o Iesu e faatatau i le fesoasoani atu i isi?
2 Tagata Lotofiafia: E tofu sao uma lava tagata o le faapotopotoga i le fesoasoani atu i tagata lotofiafia ina ia avea ma tagata tapuaʻi o Ieova. Pe a ō mai tagata fou i sauniga, ia faafeiloaʻi i latou ma faamasani i ai. Ia mafaufau i ni auala e faalaeiau ai i latou. Ia faamālō i ai i ni tali na latou faia. Ia faamālō i ai mo a latou taumafaiga e faatatauina mataupu silisili o le Tusi Paia i o latou olaga. Ia fesoasoani iā i latou e iloa ai e mafai ona latou maua ni uō moni i le faapotopotoga.
3 Uso Talitonu: ‘O i latou e tatou te aiga i le faatuatua’ e tatau faapitoa lava i ai la tatou fesoasoani i le tele o auala. (Kala. 6:10) E toʻatele o loo fesagaʻi ma faafitauli o le soifua mālōlōina. O le faia o se asiasiga faalaeiau i ai, e mafai ona faamāfanafana ai o latou loto i sea aufaatasiga ma atonu e fesoasoani ai foʻi i nisi auala aogā. O nisi atonu o loo fetaiaʻi ma ni faigatā i o latou olaga. Faaali atu lou manatu mamafa e ala i le faaalu o se taimi e faalogologo ai ma atiina aʻe ai i latou. (1 Tesa. 5:14) E manaʻomia foʻi e toeaina la tatou lagolagosua a o faia o latou tiute tauave. (Epe. 13:17) O le faaalia o se agaga lotomalie ma le fia fesoasoani, e mafai ai ona avea i tatou ma “faamatalaloto” i o tatou uso talitonu.—Kolo. 4:11.
4 Tagata o le Aiga: E ao foʻi ona tatou taumafai e faataʻitaʻi i le manatu mamafa o Iesu i tagata i o tatou lava aiga. O le manatu mamafa e uunaʻia ai mātua ina ia ‘tausi atu i a latou fanau i aoaiga ma apoapoaiga a le Alii.’ (Efe. 6:4) E mafai e tamaiti ona fai la latou lava vaega e ala i le vave sauni pe a oo i le taimi o le suʻesuʻega a le aiga, sauniga a le faapotopotoga, po o le auaunaga i le fanua. E mafai e fanau matutua ona faaatagia atu le tigā alofa o Iesu e ala i le fesoasoani ma le alofa i o latou mātua i le faafetaiaʻia o faigatā, ia ua oo mai ona o le tulaga matua. I nei auala ma isi foʻi, e mafai ai e i tatou uma lava ona “muamua ona agalelei i o [tatou] lava aiga.”—1 Timo. 5:4.
5 A o tatou faataʻitaʻi iā Iesu i le fesoasoani atu i isi tagata, atonu e mafai ona tatou fesoasoani ina ia faaitiitia ai faafitauli ma o le a atili maua ai se mafutaga vavalalata a o tatou aiga ma le faapotopotoga. O le mea aupito sili ona tāua o mea uma, e tatou te faamamaluina ai Ieova, “le Tamā e ona le alofa mutimuti vale.”—2 Kori. 1:3.