Aoaoina o Tagata Mai Gagana Uma
1 Ua faataunuuina le Afioga a le Atua! Ua talisapaia e tagata “ai gagana uma o nuu ese” le tapuaʻiga moni. (Saka. 8:23) Po o faapefea ona fesoasoani Molimau a Ieova i tagata mai i ‘ituaiga, nuu, ma gagana eseese’ uma ina ia maua se tulaga mamā i luma o Ieova, ma le faamoemoe e faasaoina atu i le “puapuaga tele”?—Faaa. 7:9, 14.
2 Ua Tali Mai le Faalapotopotoga a le Atua: Ua fuafuaina e le Vaega Pule e lomia ni lomiga faale-Tusi Paia i gagana pe tusa ma le 380 ina ia mafai ai e tagata i le lalolagi uma ona malamalama lelei i le tāua o le tala lelei. O le saunia, faaliliuina ma le lomiaina o lomiga i le tele o gagana, o se galuega e matuā telē lava. E aofia ai i lea le faamaopoopoina o se ʻaufaaliliu agavaa ma avatu iā i latou le lagolagosua lea o loo latou manaʻomia, ina ia mafai ai ona faaliliuina a tatou lomiga i nei gagana uma, faapea le lomiaina ma le aauina atu o lomiga. Ae peitaʻi, o le vaega autū lava o loo faia e tagata talaʻi taʻitoʻatasi o le Malo, o ē o loo moliooina atu le feʻau faasaoola a le Tusi Paia i tagata.
3 Taliaina o le Luʻi: I le taimi nei, e matuā toʻatele lava tagata e tautala i isi gagana o loo maua i le tele o nofoaga. Ina ia oo atu le tala lelei i nei tagata, e matuā toʻatele ai lava auauna a le Atua o loo taumafai e aʻoaʻoina le gagana Saina, Sepania, Rusia, po o isi lava gagana o loo taatele i o latou vaipanoa. Ua aʻoaʻoina e isi le gagana e faaaogā ai taga. Mo se faaaʻoaʻoga, i le Iunaite Setete, o loo iai pe tusa ma le 2,900 faapotopotoga ma vaega e 240 o loo talaʻi atu i gagana e 38 e ese mai i le faa-Peretania. I inei i Samoa, o loo taumafai nisi e faaleleia la latou tautala i le faa-Peretania ina ia mafai ai ona talaʻi atu i tagata e tautala i le faa-Peretania. O nisi tagata e leʻi faalogo muamua lava iā Ieova pe e matuā lē ʻilafia foʻi sina mea i le Tusi Paia, ua talia le upu moni o le Afioga a le Atua.—Roma 15:21.
4 Pe e mafai ona tatou faamalosia atoatoa i tatou lava e folafola atu le tala lelei i tagata mai isi atunuu ia e i la tatou oganuu? (Kolo. 1:25) E tele faapotopotoga ua faatulagaina le faia o le galuega talaʻi i oganuu e nonofo ai tagata mai isi atunuu. E muamua lava ona aʻoaʻo e le tagata talaʻi sina faamatalaga i le gagana ina ia mafai ai ona fai atu se taulimaga faigofie e pei o le faapea atu: “Talofa. O se tala lelei lenei mo oe. [Ona ofo loa lea o se sāvali po o se polosiua o loo maua i le gagana a lenā tagata.] Soifua.” O le mea moni, e matuā tauia e Ieova se amataga faigofie faapena!
5 E mafai ona fiafia tagata mai talaaga eseese ma gagana uma i le feʻau o le Malo. O lea seʻi o tatou puʻea la le avanoa e talanoa ai ma i latou i le upu moni.