Ia Manatua Tagata Faatuatua Matutua
1 E ui lava o Ana o se fafine ua oti lana tane ma ua 84 tausaga o lona soifua, ae e ‘leʻi alu ese o ia mai le malumalu.’ O lona faatuatua na uunaia ai Ieova e avatu iā te ia se faamanuiaga faapitoa. (Luka 2:36-38) I aso nei, e toʻatele uso ma tuafāfine o loo latou faaalia lea lava agaga e tasi sa faaalia e Ana, e ui lava ina fesagaʻi ma tulaga faigatā. Pe a tauivi na tagata faatuatua ma faafitauli tau i le soifua mālōlōina po o mea foʻi e gata mai ai lo latou mafai ona o le soifuaga matua, atonu latou te lagona ai le faavaivai i nisi o taimi. Seʻi o tatou tilofaʻia la ni auala aogā e mafai ona tatou faamalosia ma fesoasoani ai iā i latou ina ia tumau i se faatulagaga lelei faaleagaga.
2 Sauniga ma le Faiva: Pe a ofo atu ma le alofa e nisi auala o femalagaaʻiga, o le a sili atu la ona faigofie mo tagata matutua faatuatua ona auai e lē aunoa i sauniga faa-Kerisiano. O le a mafai e lenei mea ona atiina aʻe ai faaleagaga i latou nei ua loa tausaga o auauna ma le faamaoni ma o le a aogā foʻi i le faapotopotoga. Pe o fai ea sou sao i lenei galuega lelei?—Epe. 13:16.
3 O le faia o se sao e lē aunoa i le faiva e aumaia ai i Kerisiano moni le olioli ma le faamalieina. Ae peitaʻi, o le faia faapea e mafai ona avea ma luʻi i tagata ua matutua ma tagata e lē atoatoa le malosi. Pe e mafai ona lua “galulue faatasi” ma se tasi o i latou nei e pele iā i tatou i nisi vala o le galuega o le molimau atu? (Roma 16:3, 9, 21) Atonu e mafai ona e valaaulia se tasi o i latou lua te galulue i le galuega o le molimau atu i luga o telefoni, pe ō faatasi i se toe asiga po o se suʻesuʻega faale-Tusi Paia foʻi. Ae afai ua nofofale le tagata matua, pe e mafai e le tagata aʻoga ona sau i lona fale e fai ai le suʻesuʻega?
4 Suʻesuʻega ma Faatasitasiga: Mai i lea taimi i lea taimi, e valaaulia ai e nisi se tagata matua po o se tagata e lē atoatoa le malosi ina ia auai faatasi ma i latou i le suʻesuʻega a lo latou aiga, ia po o le fai foʻi o le suʻesuʻega i lona fale. Na ave e se tinā lana fanau e toʻalua i le fale o se tasi tuafafine matua e fai ai la latou suʻesuʻega i le tusi o Laʻu Tusi o Tala o le Tusi Paia, ma sa faalaeiauina uma ai i latou i lenā aufaatasiga. E olioli foʻi na tagata taʻitoʻatasi pe ā valaaulia i latou e fai ʻaiga faatasi, pe auai i nisi faatasitasiga faasamasamanoa. Pe afai ua vaivai tele i latou e lē atoatoa le malosi mo ni asiasiga uumi, atonu e te telefoni atu i ai pe asiasi puupuu atu foʻi ma faitau, tatalo ma talanoa faatasi ma i latou i ni mea tutupu e faalaeiauina ai.—Roma 1:11, 12.
5 E faapelepeleina e Ieova tagata faatuatua matutua. (Epe. 6:10, 11) E mafai ona tatou faaaʻoaʻo iā te ia e ala i le faaalia o lo tatou talisapaia o i latou nei ma fesoasoani ina ia faatumauina se faatulagaga lelei faaleagaga.