Pusa Fesili
◼ O afea e talafeagai ai ona faatūina se vaega mo i latou o ē tautala i se isi gagana?
Pe afai e toʻatele tagata e tautala i se isi gagana i le oganuu a se faapotopotoga, e tatau i toeaina ona fai le mea latou te mafai e faatulaga ai se galuega talaʻi i lenā gagana. (km-SM 7/02 itu. 1; km-SM 2/98 itu. 3-4) Atonu o se vaega o tagata e tautala i se isi gagana o loo nonofo solo i oganuu a ni faapotopotoga se lua pe sili atu foʻi o loo latalata ane. I lenā itu, o le a saunia ai e ovasia o matagaluega ni taʻiala manaʻomia, e fesoasoani i faapotopotoga o loo aofia ai ina ia lagolagosua i le galuega talaʻi. Mai i lea taimi i lea taimi, atonu e faatulaga ai se lauga lautele po o le Suʻesuʻega o Le Olomatamata, ina ia fuafua ai po o le ā le toʻatele o tagata o le a auai i sauniga a i latou e tautala i isi gagana.
E mafai ona faatūina se vaega a tagata e tautala i se isi gagana pe afai e ausia mea manaʻomia o loo mulimuli mai: (1) Ia iai ni tagata talaʻi po o tagata fiafia e sili ona malamalama lelei i le tala lelei i lea gagana. (2) O se toeaina agavaa po o auauna o le faiva e mafai ona taʻimua ma taʻitaʻia se sauniga se tasi o le vaiaso. (3) E mafai e se tino o le ʻautoeaina ona lagolagoina le vaega. Pe a ausiaina nei manaʻoga, e tatau loa i le ʻautoeaina ona logo le ofisa o le lālā ina ia mafai ona aloaia lea vaega ma maua nisi faatonuga atili.
O le tele o vaega e amata i le faia o Suʻesuʻega Tautusi a le Faapotopotoga i vaiaso uma taʻitasi. Mulimuli ane, atonu e faamaonia e toeaina isi sauniga faaopoopo, e pei o le Lauga Lautele ma le Suʻesuʻega o Le Olomatamata. O Lauga Nu. 2, 3, ma le 4 o le Aʻoga o le Faiva Faatiokarate e mafai ona fai i se isi potu, pe afai e mafai e se toeaina agavaa po o se auauna o le faiva e tautala i le gagana lea ona avea ma faiaʻoga. Ae ui i lea, o le a auai faatasi atu le vaega lea i le faapotopotoga mo le lauga e faatatau i le uiga o le tautala, lauga e aʻoaʻo ai, o manatu tāua o le Tusi Paia ma le Sauniga o le Auaunaga. E mafai foʻi ona faatulaga e feiloaʻi le vaega lea mo le auaunaga i le fanua.
E galulue vavalalata tagata uma o le vaega i lalo o le vaavaaiga a le tino o le ʻautoeaina. E tatau i toeaina ona saunia ni taʻitaʻiga talafeagai ma faaalia le naunau mo manaʻoga a le vaega. Pe a asia e le ovasia o matagaluega le faapotopotoga o loo lagolagoina le vaega lea, o le a ia fuafua e galulue faatasi ma le vaega lea i le galuega talaʻi ina ia atiina aʻe ai faaleagaga. O le faamanuia a Ieova, atonu i se taimi o le a avea ai lea vaega o tagata e tautala i se isi gagana ma se faapotopotoga.