Ia Aʻoaʻo Isi i le Gagana Mamā
1 E ui e ō mai i ‘atunuu e tele, aiga, nuu, ma gagana eseese,’ ae ua avea Molimau a Ieova o ni tagata e autasi, o se ʻauuso moni faavaomalo. (Faaa. 7:9) Maʻeu le mataʻina o lenā mea i lenei lalolagi fevaevaeaʻi. E faapefea ona tupu lenā mea? Talu ai ona ua tatou ‘liliu atu i le gagana mamā.’—Sefa. 3:9, NW.
2 Iʻuga Mataʻina: O le ā lenei gagana mamā? O le malamalamaaga saʻo o le upu moni o loo maua i le Afioga a le Atua e faatatau iā Ieova ma ana fuafuaga, aemaise lava upu moni e uiga i le Malo o le Atua. E pei ona valoia e Iesu, o nei upu moni o loo tufatufaina atu e se vaega vaaia i le lalolagi o le “auauna faamaoni ma le mafaufau,” faatasi ai ma se iʻuga o le toʻatele o tagata mai “gagana uma o nuu ese” ua latou talia le tapuaiga moni.—Mata. 24:45; Saka. 8:23.
3 A o aʻoaʻoina e tagata le gagana mamā, e uunaia i latou ina ia ōgatusa o latou olaga ma tapulaa a Ieova. Ua aʻoaʻoina i latou ia ‘maopoopo i le loto e tasi ma le manatu e tasi.’ (1 Kori. 1:10) O aʻoaʻoga mai i le Atua ua mafai ona latou fuaina mai ai amioga lelei ma tautala faamaoni ai, aemaise lava i le taʻuina atu i isi o le tala lelei. (Tito 2:7, 8; Epe. 13:15) O nei suiga mataʻina e faamamaluina ai Ieova.
4 Mo se faaaʻoaʻoga, o se tamāloa sa faalogo i le tala lelei mai i se tagata talaʻi, sa tele ni ana fesili ma na tali uma mai lava i le Tusi Paia. Ona o le uunaia i mea na faalogo ai, na amata ona ia suʻesuʻe e faalua i le vaiaso ma auai i sauniga. Na faateʻia o ia ona o le faafeiloaʻiga māfana na ia maua i le Maota o le Malo, ae o le toʻatele o le aofia e ō mai i ituaiga eseese. I se taimi pupuu, na la faia ai ma lana avā ni suiga i o la olaga seʻia oo ina papatisoina i laʻua. Talu mai lenā taimi na ia fesoasoani ai i le pe tusa ma le 40 isi ina ia auauna iā Ieova, e aofia ai ma nisi e toʻatele o lona aiga. E ui ina mafatia ona o le lē atoatoa o le malosi o le tino, ae talu ai nei lava na amata galue ai o se paeonia.
5 Ia Aʻoaʻo Isi: O mea o loo tutupu i le lalolagi ua faapogaia ai le toʻatele o tagata lotofaamaoni e iloiloina o latou manatunatuga ma le auala o loo latou soifua ai. I le pei o Iesu, e tatau ona tatou naunau e fesoasoani iā i latou. O toe asiga uigā ma suʻesuʻega faale-Tusi Paia o le ki lenā e fesoasoani ai i ē faamaoni ina ia aʻoaʻoina le gagana mamā.
6 O se auala ua faamaonia le uigā e talanoa atu ai i tagata o loo pisi, o le faia lea o se suʻesuʻega faale-Tusi Paia puupuu a o iai i luma o o latou faitotoʻa. (Tagaʻi i La Tatou Faiva o le Malo o Aperila 2002 itu. 1) Pe sa e faataʻitaʻia lea fautuaga? A o e sauniuni e fai se toe asiga, ia filifili se taulimaga e talafeagai ma lē e ona le fale mai le faaopoopoga o La Tatou Faiva o le Malo o Ianuari 2002. O le tele o taulimaga i lenei faaopoopoga ua saunia e tataʻi tuusaʻo atu ai i se talanoaga o le polosiua o le Manaomia po o le tusi o Le Poto. Ia faataʻitaʻi le taulimaga ina ia mafai ona sologa lelei mai i le faatomuaga agaʻi i se talanoaga o se tasi o palakalafa. Ia filifili se mau se tasi pe lua mai le palakalafa e faitau ma talanoa i ai, ma sauniuni se fesili e faaiʻu ai. O le a fesoasoani lea e tataʻi atu ai i le palakalafa ua e fuafua e talanoaina i le asiasiga e sosoo ai.
7 Ua tofo tagata o Ieova i le tele o faamanuiaga o se iʻuga lea o le aʻoaʻoina o le gagana mamā. Seʻi o tatou naunau e fesoasoani atu i isi e aufaatasi ma i tatou e ‘valaau i le suafa o Ieova’ ma ‘auauna iā te ia ma le loto gatasi.’—Sefa. 3:9.