O se Vitiō o le a Faamalamalamaina ma Uunaʻia ai Oe!

Iā Aperila i le 1951. E faitau afe Molimau a Ieova i Rusia—o aiga atoa—na puʻeina faatasi, ma uta i totonu o pusa tetele o nofoaafi ma ave e faaaunuua i Siberia. Aiseā na liliu atu ai le malo malosi o Rusia e tafiesea i latou? Na faapefea ona faasaoina ma taulau manuia o tatou uso e ui lava na faaauau pea sauāga mo le tele o tausaga? O le a e mauaina tali i le vitiō o le Faithful Under Trials—Jehovahʻs Witnesses in the Soviet Union. Maimoa i ai, ma ia avea faamatalaga aogā o loo iai e uunaia ai oe e tumau pea lou faamaoni iā Ieova, e tusa lava po o le ā e tulaʻi mai.

Pe mafai ona e taliina fesili nei? (1) O anafea na talia aloaʻia ai Molimau a Ieova i Rusia? (2) A o lumanaʻi ma ina ua māeʻa le Taua Lona Lua a le Lalolagi, na faapefea ona faateleina aiga Molimau i Rusia? (3) Na faapefea ona feteenaʻi tuusaʻo o latou talitonuga ma filosofia a Lenin? (4) O le ā le Operation North, ma o le ā na faamoemoe Stalin e faataunuuina e lenei vaega? (5) O le ā na uiga i ai le faaaunuua mo Molimau, ma o le ā na faatonuina i latou e fai ina ia ʻalofia ai le faaaunuuaina o i latou? (6) I le malaga umi i le nofoaafi agaʻi atu i Siberia, sa faapefea e uso ma tuafāfine ona faalaeiau le isi i le isi ma o le ā na ofo ai ē na puʻea i latou? (7) O ā faiga leaga na onosaia e Molimau i Siberia? (8) O ā sauniuniga faaleagaga sa matuā faatāuaina e tagata o Ieova, ma aiseā? (9) Aiseā na lotomalilie ai o tatou uso e tuu o latou ola i se tulaga lamatia mo le mauaina o a latou lomiga, ma sa faapefea ona latou taulau manuia i nei taumafaiga faifai pea a taʻitaʻi e taofia ai lo latou mauaina o lomiga? (10) Sa faapefea ona faaauau osofaʻiga a Khrushchev i tagata o le Atua? (11) Na faapefea ona taumafai taʻitaʻi o malo e faaleagaina le faatuatua o tamaiti Molimau? (12) O le ā le malamalamaga manino sa i o tatou uso i le māfuaaga o le sauāina o i latou? (Tagaʻi i le Yearbook 2002, itulau 203-204) (13) Na faapefea i osofaʻiga ogoogo i le faalapotopotoga a le Atua ona toe aafia ai i latou na faapogaia sauāga? (Tagaʻi i le Yearbook 2002, itulau 220-221) (14) O ā mea ua faamaonia ua faataunuu ae sa pei o se miti i le taimi muamua i Molimau i Rusia? (15) O le ā na fesoasoani i o tatou uso ina ia tumau ai i o latou tofotofoga, ma na faapefea i le vaaiga mulimuli o le vitiō ona faaalia le moni o le Ieremia 1:19? (16) Ia faamatala se tasi o mea na tupu i le olaga o se tasi na faalaeiauina ai oe ona o le faamaoni i lalo o tofotofoga.