‘Ia Susulu Atu Faapei o Mea e Faamalamalama Aʻi’

¹ A o siʻomia i le pogisa faaleagaga ma amioga a lenei faiga o mea, ua avea ai le pe a ma le ono miliona o ē tapuaʻi i le Atua moni o ni ē e ‘susulu atu faapei o mea e faamalamalama aʻi’ i atunuu e 234 i le lalolagi aoao. (Fili. 2:15) Ua faaesea ai i tatou ona o lenei mea. E faapefea ona tatou faasusulu atu le malamalama tāua o le upu moni lea e mai iā Ieova?—2 Kori. 3:18.

² O a Tatou Amio: E vave lava ona mātau e tagata a tatou amio. (1 Pete. 2:12) Sa mātauina e se tasi fafine se Molimau sa la faigaluega faatasi e faapea o ia o se tagata lelei, e lotofesoasoani ma e lē tautala i upu matagā pe ata foʻi i ni tausuaga lē mamā. Ina ua taumafai isi e faaonoono i le Molimau e ala i gagana lē mamā, sa ia onosai pea ma tumau i le faia o le mea saʻo. O le ā se aafiaga o lenei mea i le fafine? Ua ia faapea mai: “Sa matuā faafiafiaina aʻu i lana amio, o lea sa amata ai loa ona ou fai atu ni fesili e faatatau i le Tusi Paia. Sa amata ona ou suʻesuʻeina le Afioga a le Atua ma mulimuli ane ai oʻu papatiso.” Ua ia faaopoopo mai: “O lana amio sa faagaeetia ai aʻu e iloiloina le talitonuga a Molimau a Ieova.”

³ O a tatou amio i pule, o la tatou vaaiga i amioga a le lalolagi, ma la tatou tautala lelei ua mafai ona faaesea ai Molimau a Ieova o ni tagata o loo ola e tusa ai ma tapulaa maualuga o le Tusi Paia. O na galuega lelei e mafai ona viia ai Ieova ma tataʻi mai ai isi i lana tapuaiga.

⁴ O a Tatou Faamatalaga: O le mea moni o i latou o loo vaavaai mai i a tatou amio lelei atonu latou te lē o malamalama i le māfuaaga ua ese ai i tatou, seʻi vaganā ai ua tatou talanoa atu iā i latou e faatatau i a tatou talitonuga. Pe ua iloa e i latou o loo outou aʻoʻoga ma faigaluega faatasi o oe o se Molimau a Ieova? Po o e saʻilia ea ni avanoa e avea ai se talanoaga faasamasamanoa ma auala e avatu ai se molimau? Pe ua e filifili ea e ‘faasusulu atu lou malamalama i luma o tagata’ i so o se avanoa talafeagai?—Mata. 5:14-16.

⁵ O le faataunuuina o la tatou tiute tauave o ni ē e faasusulu atu le malamalama, e aofia ai le faataulagaina o i tatou lava. O lo tatou loto iai ma o tatou tagata atoa e uunaia ai i tatou e ʻalofia le faia o mea e itiiti lo latou tāua ina ia mafai ai ona faia le mea e sili tatou te mafaia i le talaʻia o le galuega faasao ola ma le faia ma soo.—2 Kori. 12:15.

⁶ E ala i a tatou amio ma a tatou faamatalaga, tau ina faaauau pea ona tatou susulu atu o ni ē e faamalamalama aʻi. O le faia faapea, atonu o le a uunaia ai isi e auai faatasi ma i tatou e avatu le viiga iā Ieova.