Galuega Faavaomalo o le Fausiaina o Maota o le Malo i Nisi o Atunuu Europa
1 I tausaga e leʻi mamao tele atu, sa faasāsāina ai le galuega a Molimau a Ieova i nisi atunuu o Europa e aofia ai ma Europa i Sasaʻe. I le tele o tulaga sa matuā leaga lava faasāsāga sa faia. Sa faigatā tele ona saoloto e faatasitasi mo le faia o sauniga ma na toetoe ai lava a lē mafai ona faaaogā se Maota o le Malo mo sauniga. Ae peitaʻi i tausaga e leʻi leva tele atu ‘na faia ai e Ieova mea tetele mo i tatou ua tatou fiafia ai.’—Sala. 126:3.
2 E amata mai i le 1983 na faasolo ai ina faaitiitia faasāsāga ma teteega faasaga i Molimau a Ieova. I le 1989 na amanaʻia faaletulafono ai Molimau a Ieova i Polani ma Hungary. I le 1991 na lesitala faaletulafono ai Molimau a Ieova i Rusia. Talu mai lenā taimi ua olaola ai le galuega i Rusia ma atunuu ia sa avea muamua ma Soviet Union. Iā Mati i le 1996 seʻia oo iā Oketopa 1998 na faamaonia ai e le vaega pule ia nonogatupe mo Maota o le Malo e 359, ia na talosagaina mai e ofisa o lālā o loo vaavaai atunuu e 11 o Europa.
3 A o e tagatagaʻi atu i ata o loo i lenei faaopoopoga, ia manatunatu i mea mataʻina ma le matagofie ua faia e Ieova mo ona tagata. (Sala. 136:4) E faafiafiaina oe i le iloa faapea o loo faaaogā lelei meaalofa foaʻi a le ʻauuso i le lalolagi aoao, ua faaalia ai le mea na fetalai i ai Iesu lea o loo faamauina i le Ioane 13:35: “O le mea lea e iloa ai e tagata uma lava o oʻu soo outou, pe afai ua outou fealofani.”
4 E aofia ai i atunuu Europa ua mauaina aogā mai le faatulagaga mo le fesoasoani i le fausiaina o Maota o le Malo i atunuu e lē lava le tamaoaiga ia le atunuu o Romania, lea ua uma ona fausiaina ai Maota o le Malo e 36 talu mai Iulai 2000. I le faaaogāina o le fausaga e talitutusa mo le toetoe lava o maota uma o le Malo, na fausia ai ni maota e 61 i Ukraine i le tausaga e 2001 ma le isi 76 i le 2002. O fesoasoani tautupe o loo foaʻiina atu mo Faaputugātupe mo Maota o le Malo, ua mafai ai ona fausia le faitau selau o Maota o le Malo i Maketonia, Moldova, Montenegro, Serbia, Rusia, Bulgaria ma Croatia.
5 O le fausiaina o Maota o le Malo i isi atunuu sa lē o se mea faigofie ma e matuā manaʻomia lava taumafaiga e tele a o leʻi faatinoina le galuega. E masani lava e tele se taimi e faatinoina ai ma e sili atu foʻi ona taugatā le fausiaina o se Maota o le Malo i atunuu Europa na i lo le tele o atunuu i Aferika po Amerika i Saute. Ona o le faatuputupulaʻia o le aofaʻi o i latou o loo tapuaʻi iā Ieova, o loo manaʻomia ai pea ona fausia le faitau selau o nisi Maota o le Malo i atunuu Europa e lē lava le tulaga tau tamaoaiga!
6 Maʻeu le maofa i le vaaia o le faatuputupulaʻia o le fausiaina o nei Maota o le Malo! Ua mafai e lenei mea ona avatu ai se molimau lelei i tagata e nonofo i vaipanoa o loo fausia ai Maota o le Malo e pei ona faaalia i le tele o mea na tutupu. I nisi nofoaga, e maofa ai i latou o loo iai le pule i nei aai i le agaga felagolagomaʻi o loo faaalia i le mulimuli i faatulagaga mo le fausiaina o fale.
7 Sa valoia e Isaia le faateleina o le tapuaʻiga moni i le taimi nei. E ala mai i le perofeta, ua folafola mai e le Atua e faapea: “O aʻu o Ieova, ou te faavave ona fai i ona lava aso.” (Isa. 60:22) I le sefulu tausaga na seʻi mavae atu nei na faamaonia ai o le taimi lea a Ieova mo le faatelega i Europa i Sasaʻe. O lea, tau ina ia faaauau pea e Ieova ona sasaa mai ana faamanuiaga i a tatou taumafaiga, ina ia faateleina ai le fausiaina o Maota o le Malo i le tele o atunuu, e ala i lo tatou lagolagosua i le Faaputugātupe mo Maota o le Malo! O le faia faapea o le a iʻu ai i le fausiaina o le tele o Maota o le Malo i atunuu e lē lava le tulaga tau tamaoaiga. O le a saosaolaumea ai foʻi i le faatuputupulaʻia o le tapuaʻiga mamā i le tele o atunuu i Europa ma avatu ai se molimau tele e “oo i tuluʻiga o le lalolagi.”—Galu. 13:47.
[Ata i le itulau 3]
Maota o le Malo i Moscow i Rusia
[Ata i le itulau 4-6]
O maota fou o le Malo i Europa i Sasaʻe
Strumica i Maketonia
Daruvar i Croatia
Sokal i le Itumalo o Lviv i Ukraine
Bitola i Maketonia
Sofia i Bulgaria
Plovdiv i Bulgaria
Krasnooktyabrskiy, Maykop i Rusia
Bački Petrovac, Serbia ma Montenegro
Tlumach i le Itumalo o Ivano-Frankivsk i Ukraine
Rava-Ruska i le Itumalo o Lviv i Ukraine
Stara Pazova i Serbia ma Montenegro
Zenica i Bosnia ma Herzegovina
Sokal i le Itumalo o Lviv i Ukraine
Zhydachiv i le Itumalo o Lviv i Ukraine