Po o le Litaea Mai Galuega o se Auala e Faateleina ai le Galuega i le Faiva?

¹ E toʻatele tagata faigaluega mamafa o loo moomoo i le taimi e litaea ma saʻoloto ai mai faafitauli o loo faafesagaʻia i galuega. Ae i le tulaga masani lava ia pe a litaea se tagata mai i lana galuega, ua oo ina leai se fiafia e galue, fiu e nofo, ma oo ai ina vave matua. O le leai o ni galuega e faia i le aso e oo atu ai i ni tulaga popole o le tagata iā te ia lava. Na lipotia mai e se nusipepa i Pasili faamatalaga a tagata faigaluega ua litaea, i faafitauli ua oo iai e pei o le ‘lē fiafia, itagofie, leai ni faalogona mautinoa ma le suia o uiga ona o le lotomafatia, ma ua oo atu ai i ni faalogona e faapea ua lē o toe aogā o latou olaga.’

² I le tuufaafeagai ai, e toʻatele Kerisiano e latou te manatu i lenei suiga fou i o latou olaga o se auala lea e faateleina ai galuega faaleagaga. Ua faapea mai se uso o lē na amata ona auauna o se paeonia ina ua māeʻa le lua vaiaso talu ona atoa le 65 tausaga o lona soifua: “E leʻi iai lava se vaitaimi muamua o loʻu olaga na sili atu ona faaʻoaina i faamanuiaga na i lo o le sefulu tausaga ua teʻa o laʻu auaunaga faapaeonia.” Ua tusi mai se ulugalii e faapea: “Na faatoʻā amata tonu lava le vaitaimi sili o o ma olaga matutua ina ua ma paeonia.” Ioe, i le toʻatele, o le litaea e avatu ai se vaitaimi sili e faateleina ai la latou auaunaga ma seleseleina ai le tele o faamanuiaga mai iā Ieova.

³ Ia Faaauau Ona Pisi ma Fuatele Mai: O le toʻatele o i latou ua litaea na soifua aʻe e aunoa ma le faaaogāina o ni masini faaonapōnei ma sa latou galulue mamafa mai lava a o laiti. E ui lava atonu ua latou lē o toe mauaina le malosi sa iai a o talavou, ae o loo avea pea i latou o ni ʻaufaigaluega o loo fua tele mai. I se tasi o oganuu o loo i lalo o le vaavaaiga a se lālā, o le 22 pasene o le aofaʻi o paeonia—pe ā ma le 20,000 uso ma tuafāfine—e 60 tausaga pe sili atu foʻi o latou soifua. Ua faia e nei tagata matutua la latou sao tele i le galuega talaʻi. O lo latou poto masani ma uiga faale-Atua ua faamanuiaina ai faapotopotoga o loo latou auauna ai nei.—Iako. 3:17, 18.

⁴ O le faaauau ona pisi i le faiva faa-Kerisiano e saosaolaumea lea i le mauaina o le soifua mālōlōina lelei ma faaleleia atili ai le tulaga o le olaga. Ua faapea mai se tuafafine e 84 ona tausaga sa amata ona paeonia ina ua litaea: “O le iai o ni suʻesuʻega faale-Tusi Paia se tele, ua fesoasoani lea iā te aʻu e faaleleia ai pea loʻu mafaufau. E leai saʻu taavale ma e tele lava ina ou savali. O le faia faapea ua ou maua ai le soifua mālōlōina lelei.” Ua faamatala mai e se ulugalii paeonia matutua e faapea: “Ua fesoasoani le auaunaga e faatumauina ai pea lo ma soifua mālōlōina lelei faalemafaufau ma le faaletino. E ma te ō faatasi lava. E ma te toē i taimi uma ma fiafia faatasi i le olaga.”

⁵ Ia Auauna i le Mea o Loo Tele ai le Manaʻoga: O nisi o Kerisiano litaea o loo lelei le tulaga tau tamaoaiga, ua mafai ona faimalaga atu ma auauna i nofoaga o loo tele ai le manaʻoga mo ni tagata talaʻi o le Malo. O isi ua faalautele atu la latou faiva e ala i le auauna i se oganuu o loo nonofo ai ni tagata e ese la latou gagana. I le pei o le aposetolo o Paulo, o nei tagata talaʻi maelega ua ʻfaia mea nei ona o le tala lelei, ina ia latou tofutofusia faatasi ma isi.’—1 Kori. 9:23.

⁶ Sa iai se ulugalii na avea o ni paeonia ina ua matutua la laʻua fanau tama e toʻalua. Ina ua māeʻa ni tausaga a o avea ai o ni paeonia, na la amataina ai loa ona aʻoaʻoina le gagana Saina. I le taimi nei a o latalata ina taʻi 80 o la tausaga, ua la olioli ai i le vaaia o le vaega e tautatala i le gagana Saina sa latou galulue faatasi ua avea o se faapotopotoga. Maʻeu se faamanuiaga o ulugalii faapenā i faapotopotoga!

⁷ E Lē Litaea Mai le Faiva: A o toʻatele tagata ua litaea mai a latou galuega, e leai se Kerisiano e litaea mai le auauna i le Atua. E faaauau pea ona auauna uma i latou “seʻia oo i le gataaga.” (Mata. 24:13, 14) O le mea moni a o faasolosolo ina matutua, ua lē tutusa le tele o lo latou sao i le auaunaga iā Ieova e pei ona sa faia i le taimi ua teʻa. Ae o se faalaeiauga le vaaia o i latou o faia le mea latou te mafaia ma le loto atoa! Ua faamautinoa iā i latou e le Afioga a le Atua e faapea, o le a lē faagaloina e Ieova a latou galuega ma le alofa ua latou faaalia mo lona suafa.—Luka 21:1-4; Epe. 6:10.

⁸ Afai ua lata ina e litaea mai i le galuega, aiseā e te lē tatalo ai ma mafaufau i le auala e mafai ona e faaaogāina atoatoa ai le avanoa o le a e maua ona o lea suiga i lou olaga? O le fesoasoani mai i le Atua, atonu e mafai ona avea ai lou litaea mai i le galuega ma auala e faalautele ai lau faiva, lea e viia ai Ieova ma maua faamanuiaga e tele.—Sala. 148:12, 13.