Ia Filigā i le “Avatuina o se Molimau Māeʻaeʻa”
1, 2. Pe faapefea ona faagaeetia oe i le vaaiga a Paulo i le talaʻia o le tala lelei, ma e mafai faapefea ona tatou faataʻitaʻi i lana faaaʻoaʻoga o le “avatuina o se molimau māeʻaeʻa”?
1 I le pei o Iesu ma le toʻatele o isi auauna faamaoni anamua, sa avea ai foʻi le aposetolo o Paulo ma molimau maelega o le tala lelei, “i le avatuina o se molimau māeʻaeʻa” (NW) i so o se tulaga. E oo lava i le taimi a o faafalepuipuiina i le fale na nofo ai sa ia “talia uma lava ē na ulufale iā te ia, ua talaʻi le malo o le Atua, ma aʻoaʻo atu i mea a le Alii o Iesu Keriso ma le faamalosi lava.”—Galu. 28:16-31.
2 E mafai foʻi ona tatou maelega e ala i le “avatuina o se molimau māeʻaeʻa” i taimi uma. E aofia ai i lenā, le molimau atu i tagata e tatou te feiloaʻi i ai a o tatou faimalaga atu pe foʻi mai i le Tauaofiaga Itumalo “Ia Avatu i le Atua le Viiga,” ma a o iai foʻi i le aai o loo faia ai le tauaofiaga.—Galu. 28:23; Sala. 145:10-13.
3. E mafai faapefea ona tatou ʻalofia le molimau atu lē fuafuaina o se mea e tupu faafuaseʻi?
3 O le ā le Molimau Atu Lē Fuafuaina? O le molimau atu lē fuafuaina e lē o se mea e tupu faafuaseʻi e leʻi mafaufauina, e foliga mai e leʻi sauniunia pe e lē tāua tele foʻi. E lē o le auala lenā e faamatalaina ai la tatou faiva. E pei ona moni iā Paulo, o le avatuina i le Atua o le viiga e ala i la tatou molimau atu e tāua tele lea iā i tatou, ma e tatau ona avea o so tatou sini le avatu o se molimau pe a talafeagai ai a o tatou femalagaaʻi. Ae peitaʻi o le auala tatou te molimau atu lē fuafuaina ai i isi e fai i se auala faasamasamanoa, e faaleuō ma e faia i se tulaga lē aloaʻia. O lenei ituaiga o talanoaga e maua ai ni iʻuga lelei.
4. Aiseā sa mafai ai e Paulo ona molimau atu mai le mea sa nofo ai?
4 Ia Sauniuni e Avatu se Molimau: Sa saʻili e Paulo ni avanoa e molimau atu ai a o faafalepuipuiina i se fale i Roma. Na ia tausolomua e valaaulia alii Iutaia i lenā vaipanoa e ō atu i le nofoaga sa ia aumau ai. (Galu. 28:17) E ui lava sa iai se faapotopotoga Kerisiano i Roma, ae sa iloa e Paulo e faapea, o tagata Iutaia i lenā aai sa itiiti lava so latou iloa i mataupu e faatatau i le faatuatuaga faa-Kerisiano. (Galu. 28:22; Roma 1:7) E leʻi faatalatū Paulo mai le “avatuina o se molimau māeʻaeʻa” e faatatau iā Iesu Keriso ma le Malo o le Atua.
5, 6. O ā avanoa atonu tatou te maua e molimau atu ai lē fuafuaina, ma o ā sauniuniga e mafai ona tatou faia ina ia uigā ai?
5 Ia mafaufau i tagata uma e mafai ona e talanoa atu i ai a o e faimalaga, e faapea o ē e itiiti so latou iloa e faatatau i Molimau a Ieova. Atonu latou te lē iloa, e mafai ona tatou faia ia suʻesuʻega faale-Tusi Paia e aunoa ma se totogi. Ia mataala i avanoa e molimau atu ai iā i latou e te feiloaʻi i ai a o faimalaga, pe a mālōlō le faigāmalaga, i pamu kesi, i fale oloa, i faletalimālō, a o tausami i faleʻaiga, i auala o femalagaaʻiga o le lautele ia ma isi lava mea. Ia mafaufau muamua i se faamatalaga o le a e fai atu e amata ai se talanoaga ma avatu ai se molimau puupuu. Atonu e mafai ona e faataʻitaʻia lenei ituaiga o molimau atu e ala i lou talaʻi atu i lou tuaoi, i tagata tou te faigaluega faatasi, ma isi e te masani ai.
6 O le a e manaʻomia ni lomiga e faaaogā pe a molimau atu lē fuafuaina. O ā lomiga? Atonu e mafai ona e faaaogāina le sāvali Pe E te Manaʻo e Fia Iloa Atili e Faatatau i le Tusi Paia? Ia faasino atu i uluaʻi palakalafa e lima, lea o loo aumaia ai māfuaaga eseese mo le faitauina o le Tusi Paia. Ia faaali atu i ai le avanoa o loo i le pito i tua e mafai ona talosagaina ai se suʻesuʻega faale-Tusi Paia e aunoa ma se totogi. Pe a e mauaina se tagata e fiafia, ia ofo i ai le polosiua o le Manaomia. Ina neʻi feiloaʻi faafuaseʻi ma tagata e tautatala i se isi gagana, ia ave le tamaʻitusi Good News for All Nations. O loo faamatalaina i le itulau e 2 le auala e faaaogā e avatu ai se molimau. Pe a faimalaga i se taavale, atonu e mafai ona ave nisi lomiga talafeagai mo i latou e faaalia le naunau moni i le feʻau o le Malo.
7, 8. O le ā le lapataʻiga e ao ona tatou utagiaina e faatatau i o tatou foliga vaaia ma amio a o femalagaaʻi ma i le taimi o faigāmālōlōga?
7 Manatu i Ou Foliga Vaaia ma Lau Amio: E tatau ona tatou faamautinoa o le a lē avatua e a tatou amio ma o tatou laʻei ma teuga se manatu sesē i isi, pe avea ma māfuaaga latou te ‘talaeseina’ ai le faalapotopotoga a Ieova. (Galu. 28:22) O lenei mea e mafai ona aofia ai e lē gata i le auaʻi i le tauaofiaga, ae e aofia ai foʻi le taimi o femalagaaʻiga ma taimi o faigāmālōlōga. Ua lapataʻi mai Le Olomatamata o Aokuso 1, 2002, itulau e 18 palakalafa 14 e faapea: “E lē tatau ona faalialiavale o tatou foliga vaaia, soona fai pe faatosina, e faaalia uma atu nisi vaega o le tino ia po o le teu anoaʻi. E lē gata i lenā, e ao ona tatou oofu i se uiga e atagia atu ai le ‘faamamalu i le Atua.’ Ua taʻu mai e lenei mea iā i tatou se manatu e tomānatu i ai, a ea? E lē faapea seʻiloga e auai i sauniga a le faapotopotoga [po o tauaofiaga] ona faatoʻā fai faalelei lea o laʻei ae faatalalē i ai i le tele o taimi. E ao i o tatou foliga vaaia ona atagia atu ai e lē aunoa se mataʻu i le Atua, se uiga faamamaluina ona o i tatou o faifeʻau Kerisiano mo le 24 itula i le aso.”—1 Timo. 2:9, 10.
8 E ao ona tatou laʻei ia onomea ma i se tulaga faaaloalo. Afai e atagia atu i o tatou foliga vaaia ma a tatou amio i taimi uma o tatou talitonuga i le Atua, o le a tatou lē faatalatū la e molimau atu lē fuafuaina ona e faapea e lē talafeagai o tatou foliga vaaia.—1 Pete. 3:15.
9. O ā ni iʻuga lelei sa maua e Paulo i lana molimau atu i Roma?
9 E Fuatele Mai le Molimau Lē Fuafuaina: I tausaga e lua a o faafalepuipuiina Paulo i se fale i Roma, sa ia maua ni iʻuga lelei mai i lana molimau atu lē fuafuaina. Sa lipotia e Luka e faapea, “ua talitonu foʻi nisi i upu ua fai atu.” (Galu. 28:24) Sa faamautinoa e Paulo le uigā o lona “avatuina o se molimau māeʻaeʻa” ina ua ia tusi mai e faapea: “O mea na oo iā te aʻu, ua iʻu ina tupu atili ai le tala lelei. O lea ua faaalia ai loʻu noanoataga ona o Keriso, i le fale uma o le ʻau e leoleo atoa ma isi mea uma. O le toʻatele foʻi o le ʻau uso o i le Alii o loo matuā faatuatua ona o loʻu noanoataga; ua atili ai ona latou faamalosi e tautala i le upu ma le lē mataʻu.”—Fili. 1:12-14.
10. Pe na faapefea ona taulau manuia se ulugalii i le molimau atu i le tausaga ua mavae?
10 I le tausaga ua mavae ina ua uma ona auai i le tauaofiaga itumalo, sa iai se iʻuga lelei na maua e se ulugalii ina ua la molimau atu lē fuafuaina i se teine e faigaluega i se faleʻaiga, o lē na fesili atu iā i laʻua e faatatau i a la pine fatafata o le tauaofiaga. Na la faamatala atu iā te ia le tauaofiaga ma le faamoemoe i le lumanaʻi o loo aumaia i le Tusi Paia mo tagata. Na tuuina atu iā te ia le sāvali Pe E te Manaʻo e Fia Iloa Atili e Faatatau i le Tusi Paia? ma faamatala atu i ai le auala e faia ai se suʻesuʻega faale-Tusi Paia e aunoa ma se totogi. Na faapea mai le teine e manaʻo e asiasi atu se tasi iā te ia, o lea na ia tusia ai loa lona suafa ma lana tuatusi i le pito i tua o le sāvali, ma fai atu loa i le ulugalii ina ia faia se fuafuaga. O ā ni taulau manuia o le a e fiafia i ai i lenei tausaga, e ala i le “avatuina o se molimau māeʻaeʻa”?
11. O ā uiga e ao ona iā i tatou ina ia faaauilumaina ai le tala lelei i le taimi o le tauaofiaga itumalo i lenei tausaga e ala i le “avatuina o se molimau māeʻaeʻa”?
11 Ia Faalauiloa Atu ma le Māeʻaeʻa le Tala Lelei: Seʻi mafaufau i le fiafia o Paulo na iai ina ua ia faalogo i ona uso Kerisiano ua faataʻitaʻi i lana faaaʻoaʻoga o le maelega! Seʻi o tatou faia mea uma tatou te mafai ina ia faalauiloa atu ai le tala lelei i le molimau atu lē fuafuaina e faatatau i o tatou talitonuga e faavae i le Tusi Paia, e pei ona tatou mauaina mai ai foʻi aogā i le tauaofiaga itumalo i lenei tausaga.
[Pusa i le itulau 3]
Lomiga e Manaʻomia mo le Molimau Atu Lē Fuafuaina
■ Pe E te Manaʻo e Fia Iloa Atili e Faatatau i le Tusi Paia? (sāvali)
■ O le ā e Manaomia e le Atua Mai ia i Tatou? (polosiua)
■ Good News for All Nations (tamaʻitusi)
■ O isi lomiga talafeagai
[Pusa i le itulau 4]
Aua Neʻi Faagaloina i Latou!
O ai e lē tatau ona faagaloina? Aua neʻi faagaloina tagata uma na faaalia le naunau, lea na auai i le Faamanatuga o le maliu o Keriso po o le lauga faapitoa. Po ua tatou valaaulia ea i latou mo le tauaofiaga itumalo i lenei tausaga? E lē taumatea, pe afai tatou te avatu i ai se faalaeiauga e mautinoa o le a auai mai. A o latou olioli i le aufaatasiga e atiina aʻe ai i le tauaofiaga ma faalaeiauga mai le polokalame faaleagaga, o le a latou vavalalata atu ai iā Ieova ma lana faalapotopotoga. Aiseā e lē valaaulia ai i latou ma vaai pe latou te fiafia e auai? Ia taʻu atu iā i latou faamatalaga uma e manaʻomia, e aofia ai aso o le tauaofiaga ma le taimi e amata ma māeʻa ai le sauniga, auala e mafai ona latou malaga ai i le mea e fai ai le tauaofiaga, ma se faaataga o le polokalame o loo i le pito i tua o le faavaa o le Awake! o Iuni 8, 2003.