Ia Faalauiloa Atu le Suafa o le Atua
1. O le ā se lagona e mafai ona oo i tagata pe a latou faatoʻā iloa le suafa o le Atua?
1 Pe na faapefea ona e tali atu ina ua e faatoʻā faalogo i le suafa o le Atua? O le auala e tali mai ai isi e tutusa lelei ma le tali a se fafine na faapea mai: “I le taimi na ou faatoʻā vaai ai lava i le suafa o le Atua i le Tusi Paia, na ou tagi. Na matuā faagaeetia aʻu i le malamalamaga faapea e mafai ona ou iloa ma faaaogā le suafa o le Atua.” I lenei fafine o le iloaina o le suafa o le Atua sa avea o se auala tāua iā te ia e iloa ai Ieova ma atiina aʻe se faiā ma ia.
2. Aiseā e ao ai ona tatou faanatinati e aʻoaʻo atu i isi e uiga iā Ieova?
2 Aiseā e Faalauiloa Ai? E fesootaʻi le suafa o le Atua ma ona uiga, fuafuaga ma ana gaoioiga. E fesootaʻi atu foʻi i le mauaina o le faaolataga. Na tusi le aposetolo o Paulo e faapea: “E faaolaina i latou uma o ē valaau i le suafa o le Alii [Ieova].” Ae ‘pe faapefea ona latou valaau iā te ia,’ e pei ona taʻua e Paulo, seʻi vaganā ai ua iloa muamua e tagata Ieova ma faatuatua iā te ia? O lea, e ao ai i Kerisiano ona faanatinati i le faalauiloaina atu i isi o le suafa o le Atua, ma mea uma o loo fesootaʻi atu i ai. (Roma 10:13, 14) Peitaʻi e iai se isi māfuaaga sili e ao ai ona faalauiloa atu le suafa o le Atua.
3. O le ā la tatou māfuaaga sili e talaʻi ai?
3 I le vaitaimi o le 1920-1929 na iloa ai e tagata o le Atua mai le Tusi Paia le finauga aoao e fesootaʻi atu i le faamaonia o le tonu o le pule silisili ese a le Atua ma le faapaiaina o lona suafa. A o leʻi faaumatiaina e Ieova tagata amioleaga ina ia faamamāina ai lona suafa ua leva ona taʻuleagaina, e tatau ‘ona faailoa atu i le lalolagi uma’ le mea moni e uiga iā te ia. (Isa. 12:4, 5; Eseki. 38:23) O lea la, o la tatou māfuaaga sili mo le galuega talaʻi, o le viiaina lea o Ieova i le lautele ma faapaiaina lona suafa i luma o tagata uma. (Epe. 13:15) O le alofa mo le Atua ma o tatou tuaoi o le a uunaʻia ai i tatou e faia se sao atoatoa i lenei galuega mai le Atua.
4. Aisea ua iloagofie ai Molimau a Ieova ona o le suafa o le Atua?
4 “Se Nuu mo Lona Suafa”: Sa faaigoaina i tatou o Molimau a Ieova i le 1931. (Isa. 43:10) Talu mai lenā taimi, ua matuā faalauiloa ai e tagata o le Atua lona suafa, ma o loo taʻua i le itulau e 124 o le tusi o le Proclaimers e faapea: “I le lalolagi aoao o so o se tasi lava na te faaaogāina le suafa o Ieova e iloagofie lava o ia o se tasi o Molimau a Ieova.” Po o mataulia ea oe faapena? O le faaalia o lo tatou lotofaafetai mo le agalelei o Ieova, e uunaʻia ai i tatou e ‘faamanū i lona suafa’ ma talanoa e faatatau iā te ia i so o se avanoa talafeagai tatou te maua.—Sala. 20:7; 145:1, 2, 7.
5. E aafia faapefea a tatou amio i le tauaveina o le suafa o le Atua?
5 I le avea ai ma “se nuu mo lona suafa” e tatau ona tatou ola e tusa ai ma ana tapulaa. (Galu. 15:14; 2 Timo. 2:19) E masani lava ona mātauina e tagata ia Molimau a Ieova i a latou amioga lelei. (1 Pete. 2:12) E tatou te lē mananaʻo e faalumaina lona suafa e ala i le solia o ana mataupu silisili pe faatulaga lua lana tapuaʻiga i o tatou olaga. (Levi. 22:31, 32; Mala. 1:6-8, 12-14) Na i lo lea, ia avea le auala o loo tatou ola ai, e faailoa atu ai lo tatou faapelepele i le faaeaga o le tauaveina o le suafa o le Atua.
6. O le ā le faaeaga e mafai ona tatou olioli ai i le taimi nei ma i le faavavau?
6 I aso nei ua tatou vaaia ai le faataunuuina o le folafolaga a Ieova: “Auā e fua mai i le mea e alu aʻe ai le lā, e oo i le mea e alu ifo ai, e viia ai loʻu igoa i nuu ese.” (Mala. 1:11) Seʻi o tatou faaauau ona faalauiloa atu le mea moni e uiga i le suafa o Ieova ma ‘faafetaia lona suafa paia, e faavavau faavavau lava.’—Sala. 145:21.