Galuega e Faafouina Ai
1 O tagata uma e taliaina ma faatatauina le feʻau a le Tusi Paia i o latou olaga, e faafouina ai i latou. (Sala. 19:7, 8) E fesoasoani iā i latou e vavae ese ai mai i aʻoaʻoga sesē ma faiga e faaleagaina ai ma aumaia ai se faamoemoe mautū i le lumanaʻi. Peitaʻi, e lē na o i latou e mauaina le tala lelei e aogā i ai. E faafouina ai foʻi i latou o loo tufaina atu upu moni o le Tusi Paia lea e faafouina ai isi.—Faata. 11:25.
2 Mauaina le Malosi e Ala i le Faiva: Na fetalai Iesu e faapea, o i latou e lotomalilie e tauaveina le amo faafaatusa o le avea lea ma soo o Keriso, lea e aofia ai le galuega talaʻi ma le faia o soo, o le a ‘maua le mālōlōga mo latou agaga.’ (Mata. 11:29) Na ia silafia foʻi e maua le malosi i le molimau atu i isi. Sa pei o se meataumafa iā te ia. (Ioa. 4:34) Ina ua ia aauina atu soo e toʻa 70 e talaʻi, na latou olioli i le iloa o loo lagolagoina e Ieova a latou taumafaiga.—Luka 10:17.
3 Ua faapena foʻi ona maua le malosi e le tele o Kerisiano i aso nei, e ala i lo latou auai i le galuega talaʻi. Na faapea mai se tasi o tuafafine: “E avea le faiva o se mea e faafouina ai ona e aumaia ai i loʻu olaga se taʻitaʻiga ma se fuafuaga. E faatuatuanaʻi ai oʻu lava faafitauli ma mafatiaga i aso faisoo pe a ou auai i le auaunaga.” Na faapea mai foʻi se tasi o faifeʻau maelega: “O le faiva . . . e faamanatu mai ai iā te aʻu i aso uma e moni Ieova ma aumaia ai iā te aʻu le filemu ma se lagona fiafia lea e lē mafai ona maua i so o se isi lava auala.” Maʻeu se faaeaga ua tatou maua o le avea o se ʻau faigaluega faatasi ma le Atua’!—1 Kori. 3:9.
4 E Avegofie le Amo a Keriso: A o timaʻia Kerisiano ‘ia latou finafinau,’ e lē o faamalosia mai e Iesu se mea e sili atu na i lo le mea e mafai ona tatou avatu. (Luka 13:24) O le mea moni, ua ia valaaulia ma le alofa i tatou e ‘amoina lana amo.’ (Mata. 11:29) O i latou o loo tauivi ma tulaga faigatā e mafai ona latou mautinoaina e faapea o la latou auaunaga ma le loto atoa e tusa lava pe itiiti, ae o se mea e fiafia tele i ai le Atua.—Mare. 14:6-8; Kolo. 3:23.
5 Maʻeu le faafouina ai i le auauna i le Atua o lē e na te matuā faatāuaina po o le ā lava e tatou te faia mo lona suafa! (Epe. 6:10) Seʻi o tatou taumafai malosi e avatu iā te ia le mea sili e tatou te mafaia.