O le Mauaina o se Faamālō e Faafouina Ai
1 Sa masūsū se teineitiiti i le taimi o le a moe ai ma faapea atu: “Pe ou te leʻi teine lelei ea i le asō?” Na faateʻia lona tinā i lenā fesili. E ui lava sa mātauina e le tinā le taumafai malosi o le teineitiiti e faaalia le amio lelei i lenā aso, ae sa lē ano i ai le tinā e oo lava i sina upu se tasi e faaali atu ai lona loto talisapaia. O loimata o lea teineitiiti e ao ona faamanatu mai ai iā i tatou, pe tatou te lāiti pe matutua, e tatou te manaʻomia uma lava se faamālō mai. Po o tatou faafouina i latou o tatou auaumea faatasi e ala i le faaali atu o lo tatou talisapaia mo mea lelei ua latou faia?—Faata. 25:11.
2 E tele māfuaaga e tatau ai ona tatou faamālō i o tatou uso Kerisiano. O loo galulue mamafa toeaina, auauna o le faiva, ma paeonia ina ia faataunuuina o latou tiute tauave. (1 Timo. 4:10; 5:17) E faia e mātua e matataʻu i le Atua le mea sili e latou te mafaia, e tausia aʻe ai a latou fanau i ala o Ieova. (Efe. 6:4) O loo tauivi talavou Kerisiano ina ia teena ʻle agaga o le lalolagi.’ (1 Kori. 2:12; Efe. 2:1-3) O isi e ui lava ua afu o latou soifua, ma iai faafitauli i le soifua mālōlōina po o isi toʻatugā, ae o loo auauna pea ma le faamaoni iā Ieova. (2 Kori. 12:7) O i latou uma lava na e manaʻomia ona avatu i ai le faamālō. Po o tatou amanaʻia ea a latou taumafaiga lelei lea e tatau i ai le faamālō?
3 Ia Taʻu Saʻo Atu i le Tagata ma Patino: E tatou te fiafia uma lava pe a faalogo atu o aumai se faamālō i le faapotopotoga. Peitaʻi, e sili atu ai ona faafouina, pe afai e faamālō saʻo mai iā i tatou taʻitoʻatasi. O se faaaʻoaʻoga, i le mataupu e 16 o le tusi a Paulo i tagata Roma, na ia faia ai ni faaupuga patino o le faamālō lea na taulaʻi atu iā Fipe, Pisila ma Akula, Tufaina ma Tufosa, ma Peseti, na i lo isi tagata. (Roma 16:1-4, 12) E mautinoa le faafouina ai o na tagata faamaoni i ana upu iā i latou! O le viiviia faapena e faamautinoa atu ai i o tatou uso ma tuafafine o loo manaʻomia i latou, ma mafai ai ona tatou vavalalata ma i latou. Pe sa e faamālō patino atu i se tagata talu ai nei?—Efe. 4:29.
4 Ia Sau Mai le Loto: Ina ia maua moni ai le faafouina, e tatau ona moni le faamālō o loo avatu. E mafai ona iloa e tagata po o tatou avatu le faamālō mai i o tatou loto, po ua na ona tatou “tautala faaoleole.” (Faata. 28:23) A o tatou aʻoaʻoina i tatou e mātau uiga lelei o isi, e uunaʻia ai o tatou loto e avatu le faamālō. O lea, seʻi o tatou avatu le faamālō moni lava mai o tatou loto i le iloa e faapea, o “le upu i ona aso ua tatau i ai, e lelei naʻuā lea.”—Faata. 15:23.