Pusa Fesili
◼ Pe e tatau ona lipoti atu i le faapotopotoga se suʻesuʻega faale-Tusi Paia faaleaiga?
Afai e faia e se matua Kerisiano se suʻesuʻega faale-Tusi Paia faaleaiga, ma o loo iai ni fanau e leʻi papatisoina, e mafai ona lipoti e le matua e lē sili atu i le tasi le itula i le vaiaso, tasi le toe asiga i le vaiaso, ma le suʻesuʻega faale-Tusi Paia e tasi i le masina. O le tulaga lea e ao ona fai e tusa lava pe sili atu i le itula e fai ai, pe sili atu i le faatasi ona faia i le vaiaso, pe faia foʻi ma tamaiti taʻitoʻatasi.—Tagaʻi i le tusi La Tatou Faiva itu. 104.
Afai o le aiga, o ni tagata ua papatisoina uma, e lē lipotia la le taimi po o le suʻesuʻega faapea o se auaunaga i le fanua (seʻi vaganā ai se tamaitiiti o loo suʻesuʻeina pea le tusi lona lua ina ua uma ona papatiso). Ua faia faapea ona o le lipoti a le faapotopotoga o le auaunaga i le fanua, e faailoa patino mai ai mea o loo faataunuuina i le talaʻiga o le tala lelei ma le aʻoaʻoina o upu moni o le Tusi Paia iā i latou e leʻi tuuina atu ma papatisoina o ni auauna a Ieova. (Mata. 24:14; 28:19, 20) Peitaʻi, e lē faapea ua faaitiitia ai le tāua o le faia o sea suʻesuʻega e lē aunoa.
O le matafaioi a mātua Kerisiano le suʻesuʻe ma a latou fanau. O i latou e manaʻomia se fesoasoani i le faia po o le faaleleia o suʻesuʻega a lo latou aiga e mafai ona talosaga atu i toeaina mo se fesoasoani. Afai e tulaʻi mai se tulaga ua tatau ona faia e se isi tagata talaʻi le suʻesuʻega faale-Tusi Paia a se atalii po o se afafine e leʻi papatisoina i se aiga Kerisiano o loo i le faapotopotoga, e tatau ona faafesootaʻi muamua le ovasia taʻimua o le faapotopotoga po o le ovasia o le auaunaga. Afai ua faamaonia le faia o lea suʻesuʻega, e tatau la ona lipotia e le tagata lea e faia le suʻesuʻega, i le auala lava e tasi e lipoti ai isi suʻesuʻega faale-Tusi Paia.
O le toleniina o fanau i ala o Ieova e alu ai le tele o le taimi ma taumafaiga na i lo lea e faailoa mai i le lipoti o le auaunaga. (Teu. 6:6-9; Faata. 22:6) E tatau le faamālō i mātua o loo tauaveina la latou tiute tauave mamafa i le tausia aʻe o a latou fanau i “aʻoaʻiga ma apoapoaʻiga a le Alii.”—Efe. 6:4.