Ati Aʻe se Faiā Vavalalata ma Ieova
1. O le ā le mea na oo ina iloa lelei e se tasi o tuafafine e faatatau i ana gaoioiga masani faaleagaga?
1 Na taʻutino mai se tuafafine Kerisiano e faapea: “Sa ou iai i le upu moni pe tusa o le 20 tausaga, lea sa na o loʻu alu lava i sauniga ma auai i le auaunaga i le fanua.” Peitaʻi, na ia faapea mai atili: “O laʻu faaiʻuga lea ua iai, e ui lava e tāua le auai i sauniga ma le talaʻiga, ae e lē mafai ona fesoasoani iā te aʻu pe a oo ina faigatā le tulaga o mea. . . . Ae ua ou iloa nei e tatau ona toe fetuunaʻi oʻu mafaufauga ma amata ona faia se suʻesuʻega uigā, ina ia mafai ai ona ou iloa lelei Ieova ma fiafia iā te ia ma lotofaafetai i mea ua faia e lona Alo mo i tatou.”
2. Aiseā e tāua ai le ati aʻe o se faiā vavalalata ma Ieova?
2 O le ati aʻe o se faiā vavalalata ma Ieova e manaʻomia ai ni taumafaiga. E manaʻomia ai se mea e sili atu na i lo le tau ina mulimuli atu i se faasologa masani o gaoioiga faa-Kerisiano. Afai e tatou te lē tatalo e lē aunoa iā Ieova, e iʻu ai ina avea o ia e pei o sa tatou uō sa tatou vavalalata muamua ae ua lē o toe iai sa tatou fesootaʻiga. (Faaa. 2:4) Seʻi o tatou iloiloina le auala e fesoasoani ai le suʻesuʻeina e le tagata lava ia o le Tusi Paia ma le tatalo e ati aʻe ai se faiā vavalalata ma Ieova.—Sala. 25:14.
3. E faapefea ona fai a tatou lava suʻesuʻega ina ia fesoasoani iā i tatou e vavalalata atu ai i le Atua?
3 E Tāua le Tatalo ma le Mafaufau Loloto: O a tatou lava suʻesuʻega e fafagaina ai le loto, e sili atu na i lo le tau ina vasevase manatu tāua i le mataupu o loo suʻesuʻeina ma le suʻeina o mau faasino. O le uiga o le suʻesuʻe a le tagata lava ia, o le mafaufau lea i faamatalaga o loo faaali mai ai ala o Ieova, o ana tapulaa, ma ona uiga. (Eso. 33:13) O le malamalama i mataupu faaleagaga e mafai ona aafia ai o tatou faalogona ma uunaʻia ai i tatou e mafaufau i o tatou lava olaga. (Sala. 119:35, 111) O suʻesuʻega a le tagata lava ia e ao ona faia ma le manatu ia faalatalata atu ai iā Ieova. (Iako. 4:8) O suʻesuʻega filigā e manaʻomia ai le taimi faapea ma se siʻomaga talafeagai, ma o le suʻesuʻe e lē aunoa e manaʻomia ai le pulea o le tagata lava ia. (Tani. 6:10) E tusa lava pe pisi tele lou olaga, po o faatulaga ea se taimi i aso taʻitasi e mafaufau loloto ai i uiga mataʻina o Ieova?—Sala. 119:147, 148; 143:5.
4. E faapefea i le tatalo a o leʻi faia a tatou lava suʻesuʻega ona fesoasoani iā i tatou e ati aʻe ai se faiā vavalalata ma Ieova?
4 O le tatalo e sau mai le loto, o se vaega tāua tele o se suʻesuʻega uigā a le tagata lava ia. Ina ia faatupuina aʻe upu moni o le Tusi Paia i o tatou loto, ma uunaʻia i tatou e “auauna ai i le Atua ma le migao ma le mataʻu ia fiafia mai ai o ia,” e tatou te manaʻomia le agaga o le Atua. (Epe. 12:28) O lea la, e tatau ona amata suʻesuʻega taʻitasi i le tatalo mo le agaga paia o Ieova. (Mata. 5:3) A o tatou mafaufau loloto i Mau o le Tusi Paia ma faaaogā fesoasoani ua saunia e le faalapotopotoga a Ieova, e tatou te tatala atu ai o tatou loto iā Ieova. (Sala. 62:8) O le faia o suʻesuʻega i lenei auala o se gaoioiga faaletapuaʻiga lea e faaalia ai lo tatou tuutoina iā Ieova ma faamalosia ai lo tatou alofa mo ia.—Iuta 20, 21.
5. Aiseā e tāua ai mo i tatou le mafaufau loloto i le Afioga a le Atua i aso taʻitasi?
5 E pei lava o faiā uma, o la tatou faiā ma Ieova e ao ona faaauau ona tausia, ina ia tupu aʻe pea i lo tatou olaga atoa. O lea la, seʻi o tatou faaaogā se taimi i aso taʻitasi e faalatalata atu ai i le Atua, i le iloa faapea e faalatalata mai foʻi o ia iā i tatou.—Sala. 1:2, 3; Efe. 5:15, 16.