E Faapefea Ona Maua le Autasi Moni Faa-Kerisiano?
1 O le ā e mafai ona autasia ai tagata e sili atu ma le ono miliona mai atunuu e 234, ma gagana pe tusa ma le 380? E na o le tapuaʻiga iā Ieova le Atua. (Mika 2:12; 4:1-3) Talu ai ua latou tofo totino i ai, ua iloa e Molimau a Ieova e mafai ona maua le autasi moni faa-Kerisiano i aso nei. Ona o le ‘lafu mamoe e tasi’ i lalo o le taʻitaʻiga a lo tatou “leoleo mamoe e toʻatasi,” tatou te naunautaʻi e teena le agaga fevaevaeaʻi o lenei lalolagi.—Ioa. 10:16; Efe. 2:2.
2 O le fuafuaga e lē masuia a le Atua, o le autasia lea o agelu uma ma tagata uma, i le tapuaʻiga moni. (Faaa. 5:13) Ona sa silafia e Iesu le tāua o lenei tulaga, na ia tatalo faatauanau ai ina ia autasi ona soo. (Ioa. 17:20, 21) E mafai faapefea e i tatou taʻitoʻatasi, ona faia so tatou sao e tausia ai le autasi o le faapotopotoga Kerisiano?
3 Le Auala e Maua ai le Autasi: E lē mafai ona autasi Kerisiano pe ana lē seanoa le Afioga a le Atua ma lona agaga. Pe a tatou faatatauina mea tatou te faitau ai i le Tusi Paia, ona mafai ai lea ona galue le agaga o le Atua i o tatou olaga. O lenā tulaga, e mafai ai ona tatou “taofi o le loto gatasi i la le Agaga i le noataga o le filemu.” (Efe. 4:3) E uunaʻia ai i tatou e fefaapalepaleaʻi i se auala alofa. (Kolo. 3:13, 14; 1 Pete. 4:8) Po o faia ea sou sao i le tausiaina o lo tatou tulaga autasi, e ala i le manatunatu loloto i le Afioga a le Atua i aso taʻitasi?
4 E autasia foʻi i tatou ona o lo tatou tofiga o le talaʻiga ma le faia o soo. Pe a tatou galulue ma isi i le faiva faa-Kerisiano ma “finau faatasi mo le faatuatuaga ua i le tala lelei,” e fai i tatou “ma fesoasoani i le upu moni.” (Fili. 1:27; 3 Ioa. 8) O le faia faapea, e faamalosia ai fusi o le alofa i totonu o le faapotopotoga. E lelei pe a e valaauliaina se tasi ua leva ona oulua lē o toe galulue, ina ia lua galulue faatasi i le auaunaga i le faiva i lenei vaiaso!
5 O se faaeaga lo tatou iai i se ʻauuso moni, lea e na o le tasi lava i le lalolagi aoao i aso nei! (1 Pete. 5:9) E leʻi leva ona tofo totino le faitau afe o tagata i lenei tulaga autasi i le lalolagi aoao i Tauaofiaga Faavaomalo, “Ia Avatu i le Atua le Viiga.” Tau ina ia faia so tatou sao taʻitoʻatasi e tausia ai lenei tulaga autasi tautele, e ala i le faitauina o le Afioga a le Atua i aso taʻitasi, ia foʻia ni feeseeseaʻiga i se auala alofa, ma ia talaʻia le tala lelei “ma le loto e tasi.”—Roma 15:6.