Se Galuega e Lagolagoina e le Atua
1 E lē toʻatele nisi o auauna a le Atua i aso nei e mauaina ni aʻoaʻoga maoaʻe, pe tamaoaiga, po o ni tulaga maualuluga i lenei faiga o mea. O nisi ia o māfuaaga, ua teena ai e nisi tagata la tatou faiva faapea e lē tāua tele. (Isa. 53:3) Ae peitaʻi, o le galuega tauaʻoaʻoga faale-Tusi Paia lea o loo tatou faia, ua aumaia ai le faamāfanafanaga ma le faamoemoe i le faitau miliona o tagata i le lalolagi aoao. Ua faapefea ona mauaina e tagata e lē taualoa na iʻuga mataʻina? Seʻi vaganā ai ua lagolagoina e le Atua. (Mata. 28:19, 20; Galu. 1:8) Ua faamatalaina e le aposetolo o Paulo e faapea: “Ua filifilia e le Atua mea vālea a le lalolagi, ina ia faamāina ē popoto, ma mea vaivai a le lalolagi ua filifilia ia e le Atua e faamāina ai mea malolosi.”—1 Kori. 1:26-29.
2 O le toʻatele o aposetolo ma isi Kerisiano i le uluaʻi senituri, e “leʻi aʻoaʻoina . . . ma le valelea.” (Galu. 4:13) Ae peitaʻi, sa latou tauaveina ma le loto tele lo latou tofiga o le talaʻia lea o le tala lelei, ma sa faamanuia Ieova iā latou taumafaiga. E ui lava i faigatā ma teteega, ae sa ‘matuā tupu tele ma manumalo le afioga a le Alii.’ E leai se mea e mafai ona taofia ai le galuega, ona sa lagolagoina e le Atua. (Galu. 5:38, 39; 19:20) O le tulaga lava foʻi lenā o loo tupu i aso nei. E oo lava i teteega maumauaʻi mai taʻitaʻi malolosi, latou te leʻi mafai ona taofia le tala lelei mai le tupu tele ma salalau atu.—Isa. 54:17.
3 Avatu i le Atua le Viiga Uma: Ona o lo tatou tulaga lelei ma le Atua i le avea o ni ana auauna, pe avea lea ma mea e tatou te mitamita vale ai? E matuā leai lava. Na tusi Paulo e faatatau i le faiva faa-Kerisiano e faapea: “A ua iā te i matou lenei ʻoa i ipu omea, ina ia i le Atua le matuā tele o le mana, a e lē mai iā te i matou.” (2 Kori. 4:7) Na silafia e Paulo e faapea, o le malosi mai le Atua na mafai ai ona ia tauaveina lana faiva.—Efe. 6:19, 20; Fili. 4:13.
4 Ua faapena foʻi ona tatou iloa e faapea, ona o loo tatou ‘maua le fesoasoani mai le Atua,’ o lea ua mafai ai ona faataunuuina le galuega talaʻi. (Galu. 26:22) E ala i le faalauiloaina o le tala lelei, ua faaaogāina ai i tatou e Ieova i se auala mataʻina i le lūlūina o nuu—o se faailoilo lea o lana faaumatiaga faafaamasinoga ua toetoe lava oo mai. (Ha. 2:7) Maʻeu se faaeaga ua iā i tatou i le avea o se ʻʻau faigaluega faatasi ma le Atua’ i le seleselega tele faaleagaga o loo faia!—1 Kori. 3:6-9.