E Fesoasoani Ieova i Ē Faalagolago iā te Ia
1 E vaai le toʻatele o tagata i tupe, malosi, ma le tomai faaletagata e faapea, o vala tāua ia i le mauaina o le taulau manuia. (Sala. 12:4; 33:16, 17; 49:6) Ae peitaʻi, o i latou e matataʻu iā Ieova ma faalagolago iā te ia, e latou te mauaina le faamautinoaga a le Tusi Paia e faapea, “o ia lava lo latou fesoasoani ma lo latou talita.” (Sala. 115:11) Seʻi o tatou iloiloina vala e lua lea e manaʻomia ona tatou faataʻitaʻia ai le faalagolago iā Ieova.
2 Le Avea o ni Faifeʻau Kerisiano: E so o se taimi lava tatou te taulimaina ai ni tofiga o le aʻoaʻo atu i le faapotopotoga po o le aʻoaʻo atu i le faiva i le fanua, e tatau lava ona tatou faalagolago atu i lo tatou Atua. Manatu i le faataʻitaʻiga a Iesu. E ui lava o ia o le Alo o le Atua, ae e leʻi faalagolago o ia i lona lava atamai po o lona tomai, ae sa faalagolago atoatoa atu i lona Tamā faalelagi. (Ioa. 12:49; 14:10) E mautinoa la e sili atu ona tatau ona tatou faalagolago atu i lo tatou Tamā faalelagi! (Faata. 3:5-7) E na o le lagolagosua lava a Ieova o le a mafai ai e a tatou taumafaiga vaivai, ona āva ai iā Ieova ma aogā ai i isi.—Sala. 127:1, 2.
3 E tatou te faataʻitaʻia lo tatou faalagolago atu iā Ieova e ala i le tatalo mo lana taʻitaʻiga ma le fesoasoani a lona agaga paia. (Sala. 105:4; Luka 11:13) E lē gata i lea e tatou te faaalia le faalagolago i le Atua e ala i le faavae o a tatou aʻoaʻoga i lana Afioga le Tusi Paia. O le feʻau o loo iai e pāʻia ai loto o tagata ma suia ai o latou olaga. (Epe. 4:12) Pe a tatou “auauna . . . ia tusa ma le malosi ua foaʻiina mai e le Atua,” ona viia ai lea o Ieova.—1 Pete. 4:11.
4 Taulimaina o Faafitauli: E tatou te mananaʻo foʻi e saʻilia le fesoasoani a Ieova pe a fesagaʻi ma omiga ma faafitauli. (Sala. 46:1) Mo se faaaʻoaʻoga, atonu e faatalatū se pule i le galuega e tuu mai se aso mālōlō iā i tatou e auai i se fonotaga, po o lo tatou fesagaʻi foʻi ma tulaga faigatā i lo tatou olaga faaleaiga. E tatou te faaalia lo tatou faalagolago iā Ieova i le tatalo atu faatauanau iā te ia, ma faatatauina taʻiala ua ia saunia e ala i lana Afioga ma lana faalapotopotoga. (Sala. 62:8; 119:143, 173) O le faia faapea, o le a maua ai e auauna a Ieova lana fesoasoani i o latou olaga.—Sala. 37:5; 118:13, 16.
5 Ua faamautinoa mai e Ieova iā i tatou e faapea: “Amuia le tagata o lē faatuatua [pe faalagolago] iā Ieova, o lē ua fai Ieova mona faatuatuaga.” (Iere. 17:7) Seʻi o tatou faataʻitaʻia lo tatou faalagolago atu iā te ia i mea uma lava tatou te faia!—Sala. 146:5.