Ia Faaalia le Agaga Faapaeonia
1. E faapefea ona e faamatalaina le agaga faapaeonia?
1 Pe e mafai ona latou auauna o ni paeonia pe leai, ae e mafai e tagata talaʻi uma o le Malo ona faaalia le agaga faapaeonia. Ua manatu mamafa tagata talaʻi uma i le poloaʻiga ia talaʻi ma faia soo. (Mata. 28:19, 20; Galu. 18:5) E latou te manatu mamafa i tagata ma ua faataulaga nisi o mea ina ia faataunuuina ai la latou faiva. (Mata. 9:36; Galu. 20:24) Ua lotomalilie auauna a Ieova e faia so o se mea e manaʻomia e fesoasoani ai i isi e aʻoaʻoina le upu moni. (1 Kori. 9:19-23) Seʻi o tatou talanoaina se faaaʻoaʻoga o se tasi na faaalia lenā agaga, o le faievagelia lea o Filipo.
2. E faapefea ona faataʻitaʻi toeaina ma auauna o le faiva i le maelega o Filipo i le faiva?
2 Talaʻi ma le Aʻoaʻo Atu: Sa tausia e Filipo tiute tauave mamafa i le faapotopotoga i le uluaʻi senituri. (Galu. 6:1-6) Ae peitaʻi, sa faapitoa lava ona maelega o ia i le talaʻia o le tala lelei. (Galu. 8:40) O lea la, i aso foʻi nei a o latou tausia o latou tiute tofia, e tatau i toeaina ma auauna o le faiva ona faaalia le agaga faapaeonia e ala i le taulamua e naunau i le faiva. E matuā uunaʻia ai le agaga o le faapotopotoga i le faia faapea!—Roma 12:11.
3. E faapefea ona tatou faaalia le agaga faapaeonia pe a fesagaʻi ma puapuaga?
3 Ina ua mavae le maliu o Setefano, sa faatupulaʻia sauāga ma na māfua ai le tele o le atuatuvale i le ʻau soo. Ae peitaʻi, sa faaauau pea ona talaʻi Filipo, ma sa telē sana vaega na fai i le tatalaina atu o le galuega i tagata Samaria. (Galu. 8:1, 4-6, 12, 14-17) E mafai ona tatou faataʻitaʻi i lana faaaʻoaʻoga i le faaauau pea ona faalauiloa atu le tala lelei a o tatou feagai ai ma puapuaga ma talaʻi atu ma le lē manatu faapito i ē uma e tatou te feiloaʻi.—Ioa. 4:9.
4. O le ā le faaaʻoaʻoga na faia e Filipo i le avea ai o se faiaʻoga?
4 O le tomai o Filipo o se faiaʻoga o le Afioga a le Atua, e mafai ona iloa i le mea na tupu i le faaliliuina o le eunuka Aitiope. (Galu. 8:26-38) O le ati aʻe la o le tomai e faaaogā ai le Tusi Paia ma ‘felafolafoaʻi i Tusi’ o se tasi lea o auala e faaalia ai le agaga faapaeonia. (Galu. 17:2, 3) I le pei o Filipo, e tatou te talaʻi atu le tala lelei po o fea lava e maua i ai tagata, ma so o se taimi lava e talafeagai ai.
5. O le ā e fesoasoani i mātua Kerisiano e faalaeiau ai i a latou fanau ia iai le agaga faapaeonia?
5 Le Aiga ma le Faapotopotoga: O uiga ma faaaʻoaʻoga a Filipo e mautinoa sa iai se taaʻiga lelei i ona afafine. (Galu. 21:9) I se tulaga talitutusa, o mātua Kerisiano o loo faatāuaina manaʻoga o le Malo i o latou olaga, e faalaeiau ai a latou fanau ia faia faapea. E ui lava ina vaivai mātua i le faaiʻuga o le vaiaso, ae o se matua o loo naunau e talaʻi atu i isi, e na te tuua se lagona lelei o le a tumau pea i le loto o se tamaitiiti.—Faata. 22:6.
6. E faapefea ona tatou faaalia le agaga talisapaia mo paeonia i la tatou faapotopotoga?
6 Sa faalautele atu e Filipo le agaga talimālō iā Paulo ma Luka, o ni Kerisiano maelega sa galulue mamafa i le auaunaga iā Ieova. (Galu. 21:8, 10) E faapefea ona tatou faaalia le agaga faafetai ma le lagolagosua mo i latou o loo maelega i aso nei? Atonu e tatou te ofo atu e galulue ma paeonia mo se taeao, po o se aoauli i aso e toʻaitiiti ai tagata e auai i le faiva. (Fili. 2:4) E mafai foʻi ona tatou valaaulia i latou i o tatou aiga mo se auaufaatasiga e ati aʻe ai. Po o le ā lava lo tatou tulaga, seʻi o tatou maumauaʻi e faaalia le agaga faapaeonia.