Ia Teu Faalelei

Taulimaga mo le Auaunaga i le Fanua

Ia faaaogā nei fautuaga e fesoasoani iā te oe e sauniuni ai mo taulimaga o loo faamatilatila ai lomiga e ofo mo le masina.

Faalatalata Atu iā Ieova

“E mananaʻo tagata e lagona le latalata atu i le Atua. Pe na e silafia ua valaaulia oe e le Atua e faalatalata atu iā te ia? [Faitau le Iakopo 4:8.] Ua saunia lenei lomiga e fesoasoani ai i tagata e faaaogā a latou lava Tusi Paia e faalatalata atu ai i le Atua.” Faitau le palakalafa 1 i le itulau e 16.

“Ua faateteleina le amiolētonu i aso nei. Ua pei lava ona faamatalaina i lenei mau. [Faitau Failauga 8:9e.] Ua taumānatu le toʻatele po o silasila alofa mai le Atua. [Faitau fuaiupu muamua e lua o le palakalafa e 4 i le itulau e 119.] Ua faamatalaina i lenei mataupu le māfuaaga ua faataga ai e le Atua faiga lē tonu.”

Ia Faaauau Ona Mataala!

“Ua toʻatele tagata ua popole i faafitauli ma mea mataʻutia ua taatele i aso nei. [Ia taʻua se faataʻitaʻiga o se mea o loo iloa e tagata i le oganuu.] Pe e te silafia o mea na o se faailoga e iloa ai ua toeitiiti ona pule lea o Atua i le lalolagi? [Faatali mo se tali. Ona faitau lea o mau talafeagai e pei o le Mataio 24:3, 7, 8; Luka 21:7, 10, 11; po o le 2 Timoteo 3:1-5.] O loo talanoaina i lenei polosiua le pogai e tāua ai ona tatou mataala i mea o loo tutupu i o tatou aso.”

“E toʻatele tagata i aso nei ua mafatia ona o mea mataʻutia o loo tutupu, pe ona o se mea na tupu iā i latou. E taumānatu nisi pe aiseā ua lē faalaa mai ai le Atua e taofia na mea. Ua faamautinoa mai e le Tusi Paia, ua lē o toe mamao ae gaoioi loa le Atua e aveese puapuaga o tagata. [Faitau le Faaaliga 14:6, 7.] Mātau le uiga o le faamasinoga a le Atua mo tagata. [Faitau le 2 Peteru 3:10, 13.] O loo iai i lenei polosiua faamatalaga i lenei mataupu tāua.”

Le Poto e Taʻitaʻia ai i le Ola e Faavavau

“Afai ua valaaulia oe e soifua i se siʻomaga matagofie faapenei, po o le a e taliaina le valaaulia? [Faaali i ai ata i le itulau 4-5, ona faatali lea mo se tali.] Mātau le mea ua taʻua i le Afioga a le Atua e uiga i le auala autū e olioli ai i le ola e faavavau. [Faitau le Ioane 17:3.] O le a fesoasoani lenei tusi iā te oe e maua ai le poto e taʻitaʻia ai i le ola e faavavau.” Ia faatulaga e talanoa uluaʻi palakalafa e lima o le mataupu 1 i le isi asiasiga e sosoo ai.

Ia suʻe i le ata i le itulau 188-189, ma faaaogā upu o loo faamatalaina ai le ata, ma fesili atu i le tagata o le aiga: “Po o e faamoemoe e ola i le Parataiso, pe a tumu le lalolagi i le malamalama o le Atua? [Faatali mo se tali. Ona faitau lea o le Isaia 11:9.] O le a fesoasoani lenei tusi e te iloa ai mea o loo taʻua i le Tusi Paia e uiga i le Parataiso, ma le auala e mafai ona tatou ola ai i lenā parataiso.” Ia faatulaga e talanoa le palakalafa e 11-16 o le mataupu 1 i le isi asiasiga e sosoo ai.

“Ua faapopoleina i tatou i solitulafono ma faiga sauā i lo tatou atunuu. O le ā sou taofi, pe e iai se tasi e mafai ona aumaia se vaifofō i nei faafitauli? [Faatali mo se tali.] O loo iai i le Atua se vaifofō.” Suʻe i le itulau e 10; faitau faamatalaga o loo i le Faataoto 2:22 i le palakalafa 12.

Ia Faalogo i le Faiaʻoga Sili

“Pe e te manatu o le a sili atu ona lelei le tulaga o le lalolagi pe a faatatauina e tagata upu nei? [Faitau le Mataio 7:12a. Ona faatali lea mo se tali.] O loo iai i lenei tusi le tele o lesona mai le faiaʻoga sili.” Ia faamatilatila ata ma upu i autafa o ata i le mataupu e 17.

“O le tele o mātua i aso nei e latou te taumafai e aʻoaʻoina a latou fanau i ni taʻiala aogā. O le ā sou taofi, e tāua lenei mea? [Faatali mo se tali. Ona faitau lea o le Faataoto 22:6.] Mātau o loo faalaeiau mātua e amata ona aʻoaʻoina a latou fanau a o laiti. Ua fuafuaina lenei tusi e fesoasoani i mātua e faia lenā mea.” Ia faamamafa ata ma upu i autafa o ata i le mataupu e 15 po o le 18.

“E masani lava ona faateʻia mātua i fesili a a latou fanau. O nisi o na fesili e faigatā tele ona tali, a ea? [Faatali mo se tali. Ona faitau lea o le Efeso 6:4.] E fesoasoani lenei tusi i mātua e taliina fesili a a latou fanau.” Ia faamatilatila ni nai ata ma upu i autafa o ata i le mataupu e 11 ma le 12 po o le mataupu e 34 seʻia oo i le 36.

Faaaliga—Ua Latalata Lona Tumutumuga Matagofie!

“Atonu ua e faafofoga e faatatau i [ia taʻua se tala fou]. Pe a oo ina maliliu faafuaseʻi ni tagata, ona taumānatu lea i le auala e faamāfanafana atu ai i aiga o tagata nei. O le ā sou taofi?” Faatali mo se tali. Ona suʻe lea i le itulau e 299, ma faaali le vaaiga e faatatau i le toetū e pei ona faataʻitaʻia i inei. Ia faaauau i le faapea atu: “E toʻatele e faateʻia ina ua iloa o le a toetutū mai tagata amiotonu ma tagata amiolētonu i le lalolagi Parataiso. [Faitau le Galuega 24:15 e pei ona sii mai i le palakalafa e 9 i le itulau 297, ona faamatala lea o manatu e pei ona taʻua i le palakalafa e 10.] O loo faamatalaina i le tusi lenei le tele o faamatalaga e faatatau i fuafuaga a le Atua mo le lumanaʻi.”

Le Tagata Silisili o Ē Uma na Soifua Mai

“I lenei vaitaimi, e toʻatele tagata o loo mafaufau iā Iesu. Peitaʻi, ona o le tele o mea mataʻutia o loo tutupu i le lalolagi, ua taumānatu ai nisi po o manatu mamafa mai Iesu iā i tatou. O le ā sou lagona e faatatau i lenā mea?” Faatali mo se tali. Suʻe i le mataupu e 24, ma talanoa puupuu le māfuaaga na afio mai ai Iesu i le lalolagi. Ona faitau lea o le Ioane 15:13, ma faamamafa le alofa moni o Iesu mo isi.

“Pe a taʻua e se tasi Iesu Keriso, e toʻatele tagata e mafaufau iā te ia o se pepe, po o se tagata ua toeitiiti maliu. E latou te manatu iā Iesu na o le taimi lava o lona soifua mai, faapea ma lona maliu. E masani ona lē ano tagata i fetalaiga ma mea mataʻina na faia e Iesu. O mea na ia faia e aafia ai tagata uma o lenei lalolagi. O le māfuaaga lenā e tāua ai ona tatou iloa le tele o mea mataʻina na ia faia mo i tatou.” Faitau le Ioane 17:3. Suʻe i le itulau muamua i le faatomuaga, ona faitau lea o le palakalafa e fā.

“O fea e tatou te maua ai ni fautuaga lelei e foʻia ai faafitauli e sili ona faigatā? [Faatali mo se tali. Ona faitau lea o le Mataio 7:28, 29.] O loo faamatalaina ai le auala na tali atu ai tagata i le Lauga a Iesu i le Mauga. Mātau mai faamatalaga a isi. [Faamatilatila manatu o loo i le faatomuaga o le tusi.] O loo talanoaina e lenei tusi le soifuaga ma aʻoaʻoga a Iesu.”

O le ā e Manaomia e le Atua Mai ia i Tatou?

“Pe e te manatu sa finagalo le Atua e tatou te ola i se olaga e tumu i faafitauli e pei ona tatou fesagaʻia i aso nei? [Faatali mo se tali. Ona faitau lea o le Mataio 6:10.] Pe na e taumānatu ea po o le ā moni lava le Malo o le Atua?” Suʻe i le lesona e 6, ma faitau fesili i le amataga o le lesona. Ia amata ona talanoaina le lesona, po o le faia o se fuafuaga e faia i le isi asiasiga e sosoo ai.

“E ui lava i tulaga auiluma o loo iai i aso nei, ae o loo faaauau ona puapuaga ma faanoanoa tagata ona o le maʻi ma le oti. Pe e te silafia le mea o le a faia e Iesu i maʻi, le tulaga matua, ma le oti?” Faatali mo se tali. Afai e fia iloa e le tagata le tali, suʻe i le lesona e 5, ma faitau fesili i le palakalafa e 5-6. Faitau palakalafa, pe fai se fuafuaga e fai i le asiasiga e sosoo ai.

“Ona o le tele o lotu eseese i nei aso, pe na e taumānatu pe faapefea ona iloa le lotu e taliaina e le Atua?” Pe a uma ona tali mai, ona suʻe lea i le lesona e 13. Ia faamamafa le palakalafa e 3, ma fesili i le tagata pe e ioe e tatau ona autasia e le lotu moni, tagata uma o le lalolagi. Ia suʻe i se tasi o mau o loo sii mai, ma afai e lava le taimi, ia talanoa isi manatu o loo iai i le lesona. A o leʻi tuua le tagata, ia fesili i ai, “E faapefea i le tapuaʻiga moni ona aafia ai le amio a se tagata?” Ia fai se fuafuaga e toe asia ma tali ai le fesili.

Ia Tapuaʻi i le Atua Moni e Toʻatasi

“O fea e te manatu e tatou te maua ai le fesoasoani e fesagaʻia ai omiga o le olaga? [Faatali mo se tali. Ona faitau lea o le Roma 15:4.] Mātau o loo aumaia e le Tusi Paia faatonuga, faamāfanafanaga, ma le faamoemoe, lea e faamalosia ai i tatou e tumau e ui i faafitauli. O loo aumaia i lenei tusi ni fautuaga aogā i le auala e tatou te maua ai aogā sili mai le faitauina o le Tusi Paia.” Ia faamatilatila manatu e fā o loo i le itulau e 30.

“A o iai Iesu i le lalolagi, e toʻatele tagata na tatalo mo le Malo o le Atua ia oo mai. Pe na e taumānatu ea po o le ā le uiga o le oo mai o lenā Malo? [Faatali mo se tali. Ona faitau lea o le Tanielu 2:44.] O loo faamatalaina e le tusi lenei le Malo o le Atua, le mea o le a ia faataunuuina, ma le auala e tatou te maua ai aogā mai lana pulega amiotonu.” Ia faamatilatila le faataʻitaʻiga o loo i le itulau e 92-93.