Fesoasoani i Isi ia ‘Gauaʻi ma le Loto’
1. O le ā e faafinagaloina e Ieova mai ona tagata tapuaʻi?
1 E tāua tele le gauaʻi ina ia tapuaʻi ai iā Ieova i le auala e talileleia mai e ia. (Teu. 12:28; 1 Pete. 1:14-16) Ua toeitiiti ona aumaia lea e le Atua lana faasalaga iā i latou “ua lē iloa le Atua, ma ua lē anaana i le tala lelei.” (2 Tesa. 1:8) E faapefea ona tatou fesoasoani i isi ina ia ‘gauaʻi ma le loto’ i aʻoaʻoga a le Afioga a le Atua?—Roma 6:17.
2. Aiseā e tāua ai le fesoasoani i isi e ati aʻe se faatuatua malosi?
2 Fesoasoani e Ati Aʻe le Faatuatua ma le Alofa: I le Tusi Paia, e fesootaʻi vavalalata le gauaʻi po o le usiusitai ma le faatuatua. Na tautala le aposetolo o Paulo e faatatau i ‘le poloaʻiga a le Atua e faavavau, ia iʻu ai ina gauaʻi e ala i le faatuatua.’ (Roma 16:26) O loo sii mai i le Eperu 11 le tele o faaaʻoaʻoga o le faatuatua, ma o le tele lava o loo aofia ai le gaoioi e ōgatasi ma le finagalo o Ieova. (Epe. 11:7, 8, 17) I le isi itu, e fesootaʻi atu le lē gauaʻi po o le lē usiusitai i le leai o se faatuatua. (Ioa. 3:36; Epe. 3:18, 19) E manaʻomia ona tatou ati aʻe le tomai i le faaaogāina o le Afioga a le Atua, ina ia fesoasoani ai i isi e ati aʻe le ituaiga faatuatua lea e tupu mai ai le gauaʻi.—2 Timo. 2:15; Iako. 2:14, 17.
3. (a) E faapefea ona fesootaʻi atu le gauaʻi i le alofa? (e) E faapefea ona tatou fesoasoani i tagata aʻoga o le Tusi Paia e ati aʻe le alofa mo Ieova?
3 E fesootaʻi foʻi le gauaʻi i le alofa i le Atua. (Teu. 5:10; 11:1, 22; 30:16) “Auā o lenei lava le alofa i le Atua,” o le faamatalaga lea i le 1 Ioane 5:3, “ia tatou tausi i ana poloaʻiga; e lē mamafa foʻi ana poloaʻiga.” E faapefea ona tatou fesoasoani i tagata aʻoga o le Tusi Paia e ati aʻe le alofa mo Ieova? Mātau avanoa a o fai le suʻesuʻega e ati aʻe ai lo latou loto faafetai i uiga o Ieova. Ia faailoa atu ou lava lagona o le lotofaafetai i le Atua. Ia fesoasoani i le tagata aʻoga e mafaufau i le atiina aʻe o sa laʻua faiā ma Ieova. Ae o le mea sili lava, o le alofa iā Ieova o le a uunaʻia ai isi—faapea ma i tatou—e gauaʻi atu iā te ia ma le loto.—Mata. 22:37.
4. (a) Aiseā e tāua ai a tatou faaaʻoaʻoga? (e) O le ā e ao ona tatou fai e ati aʻe ai “le loto matala” po o le loto usiusitai?
4 E Ala i a Tatou Faaaʻoaʻoga: O le auala sili tatou te faalaeiau ai isi e gauaʻi i le tala lelei, e ala lea i a tatou faaaʻoaʻoga. Ae peitaʻi, e tatou te manaʻomia ni taumafaiga faifai pea, e ati aʻe ai “le loto matala” po o le loto usiusitai. (1 Tu. 3:9; Faata. 4:23) O le ā e aofia ai i lenei mea? Ia fafaga lou loto e ala i suʻesuʻega faale-Tusi Paia e lē aunoa ma le auai i sauniga. (Sala. 1:1, 2; Epe. 10:24, 25) Ia auaumea ma i latou ua tasi lo latou loto i le tapuaʻiga moni. (Faata. 13:20) Ia auai e lē aunoa i le faiva i le fanua, ma ia iai se faanaunauga moni e fesoasoani i tagata i la outou oganuu. Tatalo i le fesoasoani a Ieova e taʻitaʻia i tatou i le atiina aʻe o se loto lelei. (Sala. 86:11) ʻAlofia mea e faaleagaina ai lou loto, e pei o faafiafiaga sauā ma e lē mamā. Ia fai mea e te vavalalata atu ai i le Atua ma faamalosia ai lau faiā ma ia.—Iako. 4:7, 8.
5. E faapefea ona faamanuiaina i latou e anaana?
5 Na faamautinoa e Ieova i ona tagata anamua faapea, e latou te maua faamanuiaga pe a latou faalogo i lona siʻufofoga. (Teu. 28:1, 2) E faapena foʻi i aso nei, ua matuā faamanuiaina e Ieova “ē anaana iā te ia.” (Galu. 5:32) O lea la, seʻi o tatou fesoasoani atu i isi ia gauaʻi ma le loto e ala i la tatou aʻoaʻo atu faapea ma faaaʻoaʻoga.