Ati Aʻe le Tomai e Fefulifulisaʻi ai ma Isi

1. O le ā se mea na tupu o loo faamauina i le Tusi Paia o le a tatou iloiloina nei, ma aiseā?

¹ O le lauga a le aposetolo o Paulo na faia i le sunako i Anetioka i Pisitia, e pei ona faamauina i le Galuega 13:16-41, ua aumaia ai se faataʻitaʻiga lelei o le auala e fefulifulisaʻi ai ma isi. Sa amanaʻia e Paulo le talaaga ma manatunatuga o tagata sa lauga atu i ai ona fetuunaʻi faatatau lea i ai o le auala na ia talaʻi atu ai le tala lelei. A o tatou iloiloina lenei mea na tupu, seʻi o tatou mafaufau i le auala e mafai ai ona tatou faia le mea lava lea e tasi i la tatou faiva.

2. O le ā e tatou te aʻoaʻoina mai le auala na amata ai le lauga a Paulo?

² Vaai Mea e Taufai Ioe Faatasi i Ai: E ui lava ina taulaʻi atu le feʻau a Paulo i le matafaioi autū a Iesu i le faataunuuina o le finagalo o le Atua, ae e lē o le manatu lenā na amata ai e Paulo lana lauga. Na i lo lenā, na ia talanoa atu i se mea e latou te taufai ioe i ai ma lana aofia lea e toʻatele i tagata Iutaia—o le talaaga o tagata Iutaia. (Galu. 13:16-22) I se uiga faapena, e sili atu ona tatou taulau manuia i le pāʻia o loto o tagata pe a tatou talanoa i mea e tatou te taufai ioe faatasi ai ma i latou. Atonu e manaʻomia ai le faalaeiau o i latou e faaali mai o latou manatu e ala i le faia ma le faautauta o fesili, ma faalogologo lelei ina ia iloa mea e sili ona tāua iā i latou.

3. O le ā na faigatā ai i tagata na faalogologo i le lauga a Paulo ona talia faapea o Iesu o le Mesia lea na folafola mai?

³ I le talanoaina o le talaaga o tagata Iutaia, na faamanatu atu ai e Paulo i tagata na faalogologo iā te ia, folafolaga a le Atua e na te faatūina se Faaola e tupuga mai i le gafa o Tavita. Ae peitaʻi, o le toʻatele o tagata Iutaia, sa latou faatalitali atu i se tagata toa i vaegaʻau e na te faasaʻolotoina tagata Iutaia mai le nofo pologa iā Roma ma siitia le tulaga o le nuu o Iutaia e sili aʻe i lo isi nuu uma. E mautinoa na latou iloa faapea na teena Iesu e taʻitaʻi lotu Iutaia i Ierusalema, ma tuuina atu i tagata maualuluga i Roma, ma fasiotia ai. O le a faapefea nei ona faatalitonuina i latou e Paulo o Iesu o le Mesia lea na folafolaina mai?

4. Na faapefea ona fefulifulisaʻi ma le tomai Paulo ma lana aofia Iutaia?

⁴ Fetuunaʻi Lau Auala: O le iloa lelei e Paulo o mea na i mafaufau o lana ʻaufaalogologo, na faaaogā ai e Paulo le Tusi Paia e fefulifulisaʻi ai ma i latou e faavae i mea ua uma ona latou taliaina. O se faaaʻoaʻoga, na ia faailoa atu o Iesu o le suli o Tavita ma o ia lea sa faailoa mai e Ioane le Papatiso, lea sa manatu i ai o le perofeta a le Atua. (Galu. 13:23-25) Sa faaalia e Paulo faapea o le teena o Iesu ma faasalaina o ia i le oti e taʻitaʻi lotu, na “taunuu ai iā te i latou upu a le ʻau perofeta.” (Galu. 13:26-28) E lē gata i lea, sa ia faamatalaina faapea sa iai i latou na vaaitino i le toe tū mai o Iesu mai le oti, ma ia tataʻi atu manatu i vaega o le Tusi Paia e iloa lelei e tagata Iutaia lea na faataunuuina i le toe tū mai o Iesu.—Galu. 13:29-37.

5. (a) Na faapefea ona fetuunaʻi le taulimaga a Paulo ina ua ia talanoa atu i tagata Eleni? (e) E faapefea ona tatou faataʻitaʻi i le faaaʻoaʻoga a Paulo pe a tatou molimau atu i la tatou oganuu?

⁵ I le isi itu, ina ua ia talanoa atu i se aofia o tagata Eleni i Areopako i Atenai, na faaaogā e Paulo se isi auala e talanoa atu ai. (Galu. 17:22-31) Ae ui i lea, e tasi lava le feʻau sa ia taumafai e avatu, ma i nei taumafaiga taʻitasi a le aposetolo na maua ai ni iʻuga lelei. (Galu. 13:42, 43; 17:34) E faapena foʻi i aso nei, o le a faigofie ona tatou pāʻia loto o tagata pe afai e tatou te saʻili mea e tatou te taufai ioe uma i ai, e lē gata i lea, ia fetuunaʻi la tatou taulimaga e tusa ai o lo latou talaʻaga ma mea o loo latou mafaufau i ai.