Aʻoaʻoga e Taʻitaʻia ai i le Ola
1 Maʻeu le olioli i le vaaia o foliga fiafia o tagata ina ua latou malamalama i upu moni o le Afioga a le Atua! O le faasoa atu i isi o le poto o le Atua ma ana fuafuaga mo tagata, e faamalieina moni ai lava. O aʻoaʻoga na e mafai ona taʻitaʻia ai se tagata i le ola e faavavau.—Ioa. 17:3.
2 Aiseā e Maoaʻe Ai: Ua maua aʻoaʻoga i aso nei i so o se auala ma so o se matātā e mafai ona e mafaufau i ai. (Fai. 12:12) Ae o lenā poto e lē mafai ona faatusatusaina i aogā o “vavega o le Atua” po o ana mea matagofie. (Galu. 2:11) Po ua mafai ea e aʻoaʻoga o loo aumai e le lalolagi ona faalatalata atu ai tagata i Lē na faia mea ma iloa ana fuafuaga? Po ua fesoasoani ea i tagata e malamalama i le mea e tupu pe a tatou feoti ma le māfuaaga ua tele ai puapuaga? Po ua avatu ai ea i tagata se faamoemoe? Po ua fesoasoani ea e faaleleia ai aiga? E leai. E na o aʻoaʻoga lava a le Atua e mafai ona tatou maua ai tali moni i fesili e aupito tāua i le olaga.
3 O aʻoaʻoga a le Atua ua aumaia ai se mea e lē o maua i le lalolagi i aso nei—o le ati aʻe o amioga tatau i ē o aʻoaʻoina. Ua liaʻi ese e le Afioga a le Atua le faailoga lanu, faailoga ituaiga, ma le faailoga atunuu mai loto o i latou ua talia ma faatatauina ana aʻoaʻoga. (Epe. 4:12) Ua uunaʻia ai tagata e lafoaʻi faiga sauā uma ae “oofu i le tagata fou.” (Kolo. 3:9-11; Mika 4:1-3) E lē gata i lea, o aʻoaʻoga a le Atua ua avatu ai i le faitau miliona le malosi e foʻia ai amioga ma uiga ua mauaa, ia e lē fiafia i ai le finagalo o le Atua.—1 Kori. 6:9-11.
4 Aiseā ua Faanatinati ai Nei: Ua lapataʻia i tatou e lo tatou Aʻoaʻo Sili i le uiga o taimi ua tatou ola ai nei. O ana valoaga faafaamasinoga o loo iai faamatalaga mo aso nei, lea e ao ona folafola atu i le lalolagi aoao. (Faaa. 14:6, 7) Ua pule Keriso i le lagi, ma ua toeitiiti nei ona faatamaʻia lea o lotu sesē uma i le lalolagi, ma ua toe o se aga faaumatia e le Malo o le Atua ia malo uma o le lalolagi. (Tani. 2:44; Faaa. 11:15; 17:16) O le mea lea, ua matuā faanatinati lava le manaʻomia ona iloa e tagata le Tupu a le Atua ua pule nei, ia ō ese mai Papelonia le Aai Tele, ma valaau i le suafa o Ieova i le faatuatua. (Sala. 2:11, 12; Roma 10:13; Faaa. 18:4) Seʻi o tatou auai atoatoa i le aʻoaʻoina o isi i aʻoaʻoga e taʻitaʻia ai i le ola e faavavau.