Le Auala e Amata ai Suʻesuʻega i le Tusi Aʻoaʻoga a le Tusi Paia
O le toʻatele lava o i tatou e fiafia e fai se suʻesuʻega faale-Tusi Paia ae e lē faigofie ona amata se suʻesuʻega. E mafai ona fesoasoani le tusi fou O ā Aʻoaʻoga Moni a le Tusi Paia? iā i tatou. O le faatomuaga o loo i le itulau 3-7 ua faatulaga ina ia faaaafia ai le tagata o le aiga i se talanoaga faale-Tusi Paia e faaaogā ai le lomiga. E oo lava iā i latou e itiiti le poto masani i le faiva, o le a faigofie ona latou faaaogāina lenei vaega o le tusi e amata ai ni suʻesuʻega.
◼ E te ono faataʻitaʻia le metotia lenei i le faaaogāina o le itulau e 3:
Pe a uma ona taʻua se mea o loo tupu po o se faafitauli o loo popole ai tagata i la outou oganuu, ona faauaʻi lea o manatu o le tagata o le aiga i fesili o loo tusia olaola tetele i le itulau e 3, ma fai i ai e fai mai sona manatu. Ona suʻe lea i le itulau e 4-5.
◼ Pe atonu foʻi e te manaʻo e amata i le faamatilatilaina o le itulau e 4-5:
E te ono faapea atu, “Pe e lē o se mea matagofie ea pe ana tutupu moni suiga o loo i le ata lenei?” Po o lou faapea atu foʻi, “O lē fea o nei folafolaga e te manaʻo e vaai ua faataunuuina?” Faafofoga lelei atu i le tali mai.
Pe afai e iai se mau o loo fiafia faapitoa i ai le tagata o le aiga, ona faaali lea i ai o le mea o loo aʻoaʻoina e le Tusi Paia e faatatau i lea mataupu, i le iloiloina o palakalafa i le tusi lea e talanoaina ai lenā mau. (Tagaʻi i le pusa i le itulau lenei o le faaopoopoga.) Ia iloiloina le mataupu e pei lava ona faia i se suʻesuʻega faale-Tusi Paia. E mafai lava ona fai i le lima i le sefulu minute i lau uluaʻi asiasiga a o talanoa atu i le tagata i le faitotoʻa.
◼ O le isi auala, o le fai i le tagata e faamatala mai ona manatu i le faaaogāina o le itulau e 6:
Ia tataʻi atu manatu o le tagata i fesili i le pito i lalo o le itulau, ma fesili atu, “Pē na e taumānatu ea i nisi o nei fesili?” Afai e na te faaalia le fiafia i se tasi o nei fesili, ona suʻe lea i palakalafa o le tusi lea e tali ai le fesili. (Tagaʻi i le pusa i le itulau lenei o le faaopoopoga.) A o oulua talanoaina faatasi faamatalaga, e tusa o lenā o loo e faia se suʻesuʻega faale-Tusi Paia.
◼ E ono mafai ona faaaogā le itulau e 7 e tataʻi atu ai i le faataʻitaʻia o se suʻesuʻega faale-Tusi Paia:
Faitau uluaʻi fuaiupu e tolu i le itulau, ona suʻe lea i le mataupu e 3, ma faataʻitaʻi se suʻesuʻega i le faaaogāina o le palakalafa 1-3. Ia fai se fuafuaga e toe foʻi e talanoaina tali o fesili o loo i le palakalafa e 3.
◼ Le auala e fuafua e toe foʻi ai:
Pe a faaiʻu le uluaʻi suʻesuʻega, ona fai lea o se fuafuaga mo le toe faaauauina o le talanoaga. E te ono faapea atu: “E na o ni nai minute lava ae ua ta aʻoaʻoina ai aʻoaʻoga a le Tusi Paia i se mataupu tāua tele. I le isi taimi ou te toe sau ai, e ta te talanoaina ai [tuu se fesili o le a oulua talanoaina]. Pe e mafai ona ou toe afe mai i le taimi lava lenei i le vaiaso a sau?”
A o tatou lalata atu i le taimi atofaina a Ieova, o loo ia faaauau pea ona aʻotauina i tatou i galuega e ao ona tatou fai. (Mata. 28:19, 20; 2 Timo. 3:17) Seʻi o tatou faaaogā lelei lenei meafaigaluega fou e amata ai suʻesuʻega faale-Tusi Paia.
[Pusa i le itulau 3]
Talanoaina o Mau i le Itulau e 4-5
◻ Faaaliga 21:4 (itu. 27-28, pala. 1-3)
◻ Isaia 33:24; 35:5, 6 (itu. 36, pala. 22)
◻ Ioane 5:28, 29 (itu. 72, pala. 17-19)
◻ Salamo 72:16 (itu. 34, pala. 19)
Tali i Fesili i le Itulau e 6
◻ Aiseā ua tatou mafatia ai? (itu. 108, pala. 6-8)
◻ E faapefea ona tatou feagai ma popolega o le olaga? (itu. 184, pala. 1-3)
◻ E faapefea ona fiafia atili o tatou aiga? (itu. 142, pala. 20)
◻ O le ā le mea e tupu pe a tatou feoti? (itu. 58, pala. 5-6)
◻ Po o le a tatou toe feiloaʻi ma ē pele ua maliliu? (itu. 72, pala. 17-19)
◻ E faapefea ona tatou mautinoa o le a faataunuu e le Atua ana folafolaga i le lumanaʻi? (itu. 24, pala. 17)