O se Fesoasoani e Mafai Ona Maua
1. E faapefea ona oo ina vaivai faaleagaga se tasi?
1 O Ana o se tuafafine e iai sana tane lē talitonu, e galue i se galuega e alu uma ai le tele o lona taimi, ma na faasolo ina faigatā ona auai e lē aunoa i sauniga faa-Kerisiano, auai i le faiva, ma le suʻesuʻeina o le Afioga a le Atua. E ui lava o loo alofa pea iā Ieova, ae na oo ina lē toe talaʻi pea lava pea. O le mea e fiafia ai, na ia maua se fesoasoani faaleagaga mai toeaina o loo naunau mo lona lelei faaleagaga.
2. O le ā le auala e mafai ai e Kerisiano uma, ona faamaonia le avea o i latou ma fesoasoani e mafai ona maua?
2 O le taliaina o le fesoasoani faaleagaga o loo maua e ala mai i le faapotopotoga Kerisiano, e faaalia ai le faalagolago atu iā Ieova. O le faataʻitaʻi atu i le tausiga alofa a Iesu Keriso, e saʻilia ai e toeaina o le faapotopotoga avanoa e faalaeiau ai, ma avatu se fesoasoani talafeagai iā i latou o loo feagai ma faigatā i la latou auaunaga faa-Kerisiano. (1 Tesa. 5:14) O le tele o taimi, atonu ua na o sina upu faalaeiau lava e faavae mai i le Tusi Paia e manaʻomia e lenā tagata. O le tausolomua e fesoasoani iā i latou ua vaivai mo sina taimi, o se mea e manatu mamafa i ai Kerisiano uma ae lē na o toeaina. E mautinoa ua tatou maua uma lava aogā o “upu ua fai faatatauina.”—Faata. 25:11; Isa. 35:3, 4.
3, 4. O le ā e aofia ai i le fesoasoani atu i isi, ma e faapefea ona tatou faia?
3 Ia Tausolomua: O le faaalia o le naunau alofa iā i latou o loo manaʻomia le fesoasoani e ao ai ona tatou tausolomua, ma ia faaalia le fealofani, ma ia moni lou alofa. Ina ua iloa e Ionatana puapuaga ua oo iā Tavita, ‘ona tulaʻi lea ua alu atu iā Tavita i le vao matua, ua faamalosi iā te ia.’ (1 Samu. 23:15, 16) Ia fesoasoani atu i isi i se auala faapelepele. O upu e uunaʻia e le manatu mamafa moni e maua ai iʻuga e sili ona lelei. E lē gata i lea, na faataʻitaʻia manino e Iesu faapea, o taumafaiga mamafa ma le maumauaʻi, e aofia ai taumafaiga ia toe maua mai se uso po o se tuafafine faaleagaga. (Luka 15:4) O le iai o se faanaunauga faamaoni e fesoasoani atu i se isi tagata, o le a uunaʻia ai i tatou e maumauaʻi e ofo atu se fesoasoani e ui lava e lē o vave ona e iloa atu se agaʻigaʻi i luma.
4 Maʻeu le faalaeiauina ai i lo tatou tausolomua e valaaulia isi e pei o i latou i la tatou suʻesuʻega tautusi, e tatou te galulue faatasi i le faiva! A o tatou fesoasoani atu i se auauna a Ieova ina ia auai i le faiva, tatou te ono faaaogā lenā avanoa e faalaeiau ai i lenā tagata ina ia fai le mea e sili atu i le auaunaga i le Atua. O na taimi fiafia e faaalu faatasi i le auaunaga iā Ieova, ua faapitoa ona faalaeiauina ai i latou ua amata ona toe malolosi faaleagaga.
5. I nisi o tulaga, o ā ni fesoasoani e mafai ona ofo atu e toeaina?
5 O se Fuafuaga Alofa: O i latou ua lē auai i le galuega talaʻi po ua lē aufaatasi foʻi ma le faapotopotoga mo se taimi, atonu e latou te manaʻomia se fesoasoani faaopoopo e toe faamalosia ai lo latou faatuatua. O le faia o se suʻesuʻega faale-Tusi Paia a le tagata lava ia i lomiga e pei o le tusi Ia Tapuaʻi i le Atua Moni e Toʻatasi, Faalatalata Atu iā Ieova, po o le O ā Aʻoaʻoga Moni a le Tusi Paia? atonu na pau lenā o le mea e na te manaʻomia. Ona o lea tagata ua uma ona papatiso, o lea e lē manaʻomia ai ona faaauau le suʻesuʻega mo se taimi umi. E ao i le Komiti o le Auaunaga a le Faapotopotoga ona mataalia e mātau po o ai e aogā i ai lenei faatulagaga.—Tagaʻi i Pusa Fesili i La Tatou Faiva o le Malo o Novema 1998 ma Novema 2000.
6. Na faapefea ona toe maua le malosi faaleagaga o se tasi o tuafafine?
6 O Ana lea na taʻua i le amataga, na ia talia ma le lotofaafetai le ofo na fai atu e toeaina e alu atu se tuafafine matua faaleagaga e faia sa la suʻesuʻega faale-Tusi Paia. E na o le faafā lava ona fai le suʻesuʻega lea na fesoasoani iā te ia e toe faalatalata atu ai iā Ieova. Na toe amata ona auai i sauniga a le faapotopotoga ma toe iai lona faanaunauga e viiviia Ieova i le lautele. Na fesoasoani foʻi se tuafafine matua faaleagaga iā te ia i le auaunaga e ala i le ave o ia i isi suʻesuʻega faale-Tusi Paia seʻia oo ina lava lona malosi e alu ai e talaʻi mai lea fale i lea fale. O le mea sa ia manaʻomia o se fesoasoani e faia ma le agalelei lea na toe amata ai ona ia auai i galuega faaleagaga!
7. O ā aogā e maua mai le faamalosiau i isi faaleagaga?
7 O le faamalosiau iā i latou o loo manaʻomia se fesoasoani e aumai ai faamanuiaga i tagata uma. O le tagata lea ua avatu i ai le fesoasoani, ua olioli i le faalatalata atu iā Ieova ma auai i galuega a Lana faalapotopotoga. E fiafia toeaina e mātauina se agaʻigaʻi i luma faaleagaga faapena. (Luka 15:5, 6) E māfana le aufaatasiga a le faapotopotoga pe a faaalia e tagata uma le manatu mamafa o le tasi i le isi. (Kolo. 3:12-14) Maʻeu ni māfuaaga lelei e faataʻitaʻi ai iā Ieova, o ia o se fesoasoani e mafai ona maua!—Efe. 5:1.