Fesoasoani i Isi ia Avea ma Uō a le Atua
1 I aso nei, o loo aʻoaʻoina ai i ala o Ieova tagata mai i atunuu uma lava. (Isa. 2:2, 3) Peitaʻi, ina ia ‘fua mai ma le onosai’ i latou nei, e ao ona latou alolofa iā Ieova. (Luka 8:15; Mare. 12:30) A aunoa ma lenā alofa, o le a aunoa i latou ma le malosi e teea ai taaʻiga lē lelei, ia po o le loto tele foʻi e fai le mea saʻo. O se tasi o auala e fesoasoani ai i isi e ati aʻe se faiā lelei ma Ieova, o le fesoasoani lea i ai ia faateleina lo latou talisapaia o ona uiga. Ia faalaeiau i latou e iloilo ma manatunatu i faamatalaga i le tusi Faalatalata Atu iā Ieova.
2 Lau Faaaʻoaʻoga: E mafai e au lava gaoioiga ona iai se taaʻiga malosi i loto o tagata aʻoga o le Tusi Paia. Pe a latou mātauina e te faatāua le lua faauōga ma Ieova ma vaai i le auala e aafia ai lou olaga i lenā faauōga, e ono faagaeetia ai foʻi i latou e ati aʻe sa latou faiā faapena. (Luka 6:40) E matuā telē lava se aafiaga i isi o a tatou faaaʻoaʻoga na i lo mea tatou te fai atu ai.
3 O se tasi o auala e sili ona uigā e aʻoaʻo ai e mātua le fanau ina ia alolofa iā Ieova, o a latou faaaʻoaʻoga. (Teu. 6:4-9) O se ulugalii sa faanaunau e tausia aʻe le la fanau i le upu moni, sa fesili atu i ni mātua ua taulau i le faia faapea mo ni fautuaga. Na faapea mai le tane: “O le tele lava o mātua sa ou fesili i ai, e latou te taʻua lava le tāua o faaaʻoaʻoga a mātua.” O lona uiga la, o le auala e ola ai mātua, e la te faataatia ai se faaaʻoaʻoga mo fanau i le uiga o le avea ma ‘uō a Ieova.’—Iako. 2:23.
4 Tatalo Mai le Loto: E mafai foʻi ona e fesoasoani i isi e ati aʻe se faauōga ma Ieova e ala i le aʻoaʻoina o i latou ina ia tatalo mai le loto. E te ono faasino i latou i le tatalo na aʻoaʻo mai e Iesu, atoa ai ma le tele o isi tatalo faatauanau o loo faamauina i le Tusi Paia. (Mata. 6:9, 10) E mafai ona e aʻoaʻoina lau fanau ma tagata aʻoga o le Tusi Paia i le auala e tatalo ai, e ala i le faalogologo mai i au lava tatalo. Pe a latou faalogo atu i au faaupuga mai le loto, e latou te mātauina ai ou lagona e faatatau iā Ieova. Ia faalaeiau i latou “ia finafinau i le tatalo” pe a latou feagai ma faigatā. (Roma 12:12) Pe a latou mātauina le fesoasoani a Ieova i taimi e manaʻomia ai, o le a amata loa ona latou talitonuina o ia ma alolofa iā te ia o se uō moni.—Sala. 34:8; Fili. 4:6, 7.