Ua Tuuina Mai se ʻOa Tatou te Tausia

¹ Sa faatāua e le aposetolo o Paulo lona tofiga mai le Atua e talaʻi, ma na ia taʻua o se “ʻoa.” (2 Kori. 4:7) Na ia onosaia faigatā ma puapuaga i le faataunuuina o lenā tofiga. Sa ia maumauaʻi e talaʻi i so o se tasi na ia feiloaʻi i ai. E tele ni faigamalaga faigatā ma lamatia ai lona ola na ia uia i le laueleele ma le sami. E faapefea ona tatou faaaʻoaʻo iā Paulo ma faaali atu e tatou te faatāuaina la tatou faiva? (Roma 11:13) O le ā ua māfua ai ona avea la tatou faiva o se ʻoa e lē mafaatusalia?

² O se ʻOa Silisili: E masani ona aumaia e ʻoa o le lalolagi le tigā, ma e itiiti pe lē tumau ona aogā. I le isi itu, e aumaia e la tatou faiva ni aogā tumau iā i tatou atoa ma isi. (1 Timo. 4:16) E fesoasoani i ē loto faamaoni ia iloa Ieova, faia ni suiga manaʻomia i o latou olaga, ma maua ai le faamoemoe moni o le ola e faavavau. (Roma 10:13-15) O le matuā faatāuaina o la tatou faiva, ua tatou maua ai se fuafuaga e faamalieina ai i le olaga, o le iai lea o le faalogona ua māeʻa lelei ona fai mea na faatonu mai, ma le faamoemoe e faagaeetia ai mo le lumanaʻi.—1 Kori. 15:58.

³ Ia Faailoa Atu E te Faatāuaina Lau ʻOa: O lo tatou faatāuaina o se mea, e masani ona faailoa atu i lo tatou lotomalilie e lafoaʻi nisi mea ina ia maua ai lenā mea. Maʻeu se faaeaga o le faaaogā o lo tatou taimi ma le malosi e viia ai Ieova! (Efe. 5:16, 17) O le auala o loo faaaogā ai o tatou taimi, e faailoa atu ai e sili atu ona tatou faatāua mea faaleagaga na i lo le saʻilia o mea faitino. Talu ai ua iai se mea tāua tele e tufaina atu, ua tatou mananaʻo ai e talaʻi atu ma le maelega, ma mataala e taʻu atu le tala lelei i avanoa uma.

⁴ O le tulaga masani lava i ʻoa taugatā, e lē nanāina ae faailoa atu ina ia vaai i ai isi ma fiafia ai. Afai e tatou te manatu i le faiva o se ʻoa, o le a avea la o se vaega tāua o lo tatou olaga. (Mata. 5:14-16) I le faatumulia o o tatou loto i le talisapaia, tau ina ia tatou faaaʻoaʻo atu e lē aunoa i le aposetolo o Paulo ma faaaogā avanoa uma e faaali atu ai, e tatou te faatāuaina moni lava la tatou faiva o se ʻoa.