“Amuia le Tagata o Lē Onosai i le Faaosoosoga”
1 O Kerisiano uma e tatau ona fesagaʻi ma tofotofoga. (2 Timo. 3:12) E ono tofotofoina i tatou ona o se faalētonu i lo tatou soifua mālōlōina, le lē lava o le tulaga tau tamaoaiga, maua i nisi faaosoosoga, le sauāina, po o le tele o isi faigatā e ono tulaʻi mai. O tofotofoga e aumaia e Satani ua ia taumafai ai e faavaivaia i tatou, e faapogaia ai foʻi i tatou e manatu māmā i la tatou faiva faa-Kerisiano, ma e oo lava ina taofia ai i tatou mai le auaunaga iā Ieova. (Iopu 1:9-11) E faapefea e le onosaia o tofotofoga ona taʻitaʻiina atu ai i le mauaina o le fiafia?—2 Pete. 2:9.
2 Ia Sauniuni mo Tofotofoga: Ua aumaia e Ieova iā i tatou lana Afioga o le upu moni, lea o loo faailoa mai ai ma mea na tutupu i le soifuaga o Iesu ma ana aʻoaʻoga. E mafai ona tatou faataatia se faavae malosi, e ala i le faalogo ma faia mea o fetalai mai ai Iesu, ma faapea ona sauniunia ai i tatou mo tofotofoga. (Luka 6:47-49) E tatou te maua foʻi le malosi mai isi sauniuniga—o uso ma tuafāfine i totonu o le faapotopotoga, o a tatou sauniga, ma le tele o a tatou lomiga faale-Tusi Paia o loo aumaia e le vasega o le auauna faamaoni ma le mafaufau. Ma tatou te faaaogāina pea le meaalofa a le Atua o le tatalo.—Mata. 6:13.
3 Ua aumaia foʻi e Ieova se faamoemoe mo i tatou. Pe a tatou talitonu maumauaʻi i folafolaga a Ieova, o le a avea lo tatou faamoemoe ma “taula o le agaga, e lē matosina ma ua mausalī.” (Epe. 6:19) I taimi o le Tusi Paia, e lē mafai ona tuua e vaa le uafu e aunoa ma se taula, e tusa lava pe lelei le tau. Auā afai ae oso faafuaseʻi se afā, e fesoasoani le togiina i lalo o le taula e taofia mai ai le vaa i le tafea atu i luga o se matafaga gaoā. Lona uiga, o le faatuatua i folafolaga a Ieova i le taimi nei, o le a mafai ai ona tatou tumau pe a tulaʻi mai ni faigatā. E faafuaseʻi ona tutupu aʻe ni faafitauli. E ui sa talileleia muamua le galuega talaʻi a Paulo ma Panapa i Lusa, ae na vave ona suia le tulaga o mea ina ua taunuu ane tagata tetee Iutaia.—Galu. 14:8-19.
4 O le Onosai e Aumaia ai le Fiafia: O le faaauau pea i le galuega talaʻi e ui i teteega e tatou te maua ai le filemu o le mafaufau. Tatou te olioli pe a taʻuaogāina i tatou ua faaleagaina ona o Iesu. (Galu. 5:40, 41) O le onosaia o tofotofoga e fesoasoani iā i tatou e matuā faatumau atili ai uiga loto maulalo, usiusitai, ma le onosai. (Teu. 8:16; Epe. 5:8; Iako. 1:2, 3) E uunaʻia ai i tatou e faalagolago iā Ieova, faatuatuaina ana folafolaga, ma avea ai o ia ma o tatou mapusaga.—Faata. 18:10.
5 Ua tatou iloa e lē tumau tofotofoga. (2 Kori. 4:17, 18) Ona o tofotofoga ua tatou maua ai avanoa e faaali atu ai lo tatou alofa loloto mo Ieova. O le onosaia o faigatā, ua tatou avatu ai se tali i luʻi a Satani. O le mea lea, tatou te lē faavaivai ai! “Amuia le tagata o lē onosai i le faaosoosoga, auā a uma ona tofotofoina e maua e ia le pale o le ola.”—Iako. 1:12.