Ia Tatou Fefaamāfanafanaaʻi
1. O ā avanoa faapitoa e maua i le asiasiga a le ovasia o le matagaluega?
1 Na tusi atu le aposetolo o Paulo i le faapotopotoga i Roma: “Ou te naunau tele i le fia feiloaʻi ma outou, ina ia ou avatu iā te outou se mea alofa i la le Agaga, e faatumauina ai outou; o lona uiga lenei, ina ia tatou fefaamāfanafanaaʻi i lo tatou faatuatua, o outou atoa ma aʻu.” (Roma 1:11, 12) O asiasiga i aso nei a le ovasia o le matagaluega, o le a maua ai avanoa e fefaamāfanafanaaʻi ai.
2. Aiseā e vave faasilasila ai le asiasiga a le ovasia o le matagaluega?
2 Le Faapotopotoga: E masani ona faasilasila le asiasiga a le ovasia o le matagaluega i le faapotopotoga a o toe tolu masina oo i ai. O le a maua ai avanoa e fetuutuunaʻi ai a tatou faasologa, ina ia matuā aogā le asiasiga iā i tatou. (Efe. 5:15, 16) Pe afai e te faigaluega totogi, atonu e te faanoi mo ni aso mālōlō ina ia mafai ai ona e lagolagoina le talaʻiga i lenā vaiaso. O nisi e fuafua e paeonia lagolago mo lenā masina. Pe afai ua e fuafua e te alu i se mea, pe mafai ona e toe fetuutuunaʻi ina ia e auai i lenā vaiaso?
3. O le ā e mafai ona fai e le tagata lava ia a o faagasolo le asiasiga ina ia maua ai faalaeiauga?
3 O se tasi o māfuaaga autū o le asiasiga a le ovasia o le matagaluega, o le faalaeiauina lea o tagata taʻitoʻatasi ma le toleniina i le faiva i le fanua. E mafai ona e talosaga atu e lua te galulue pe galulue foʻi ma lana avā. E fiafia le ovasia o le matagaluega e galulue ma so o se tagata talaʻi, e aofia ai ma i latou e lē lava le poto masani i le auaunaga. O i tatou uma lava, e mafai ona aʻoaʻoina se mea mai i ana taulimaga, ma faatatau fautuaga e na te tuuina mai. (1 Kori. 4:16, 17) O le valaaulia o le ovasia e tou te faiʻaiga faatasi, o le a maua ai nisi avanoa e fefaalaeiauaʻi ai. (Epe. 13:2) E manaʻomia le faalogologo lelei, ona e fuafua ana lauga i manaʻoga o le faapotopotoga.
4. E faapefea ona tatou faalaeiauina le ovasia o le matagaluega?
4 Le Ovasia o le Matagaluega: E leai se eseesega o le aposetolo o Paulo ma uso na ia auauna i ai, sa ia fesagaʻia foʻi luʻi ma popolega, ma sa ia talisapaia faalaeiauga. (2 Kori. 11:26-28) Ina ua iloa e le faapotopotoga i Roma o le a malaga atu Paulo, a o avea ma pagota, sa latou ō atu i le Maketi i Apio Foro e faafeiloaʻi o ia, i le mamao e 46 maila (74 kilomita)! “Ua vaai atu Paulo iā te i latou, ona faafetai lea i le Atua, ma loto tele ai.” (Galu. 28:15) E mafai foʻi ona e faalaeiauina le ovasia o le matagaluega. Ia ‘faaluaina atu i ai le taui’ e ala i lou lagolagoina o lana asiasiga i vala uma. (1 Timo. 5:17) Faaali atu lou loto faafetai mo ana taumafaiga mo lou lelei. O le a olioli le ovasia ma lona faletua a o la mātauina lo outou faatuatua, alofa, ma le onosai.—2 Tesa. 1:3, 4.
5. Aiseā tatou te manaʻomia ai faalaeiauga i aso nei?
5 I nei “aso faigatā,” o ai se tasi e lē manaʻomia ni faalaeiauga? (2 Timo. 3:1) Ia filifili nei loa e auai i vala uma o lenā vaiaso faapitoa o le asiasiga a le ovasia o le matagaluega. O i tatou uma, po o le ovasia o le matagaluega po o se tagata talaʻi, e mafai ona maua le olioli i le fefaamāfanafanaaʻi. I le faia faapea o le a tatou ‘feapoapoaʻi ai, ma fefaamāfanafanaaʻi ai.’—1 Tesa. 5:11.