Aua Neʻi Faafiti!

1. O le ā le auala tatou te lē “faafiti se mea lelei”?

¹ E tatou te lē “faafiti se mea lelei” i ē o loo i oganuu e tatou te galulue ai, pe a tatou maelega i le talaʻiina o le tala lelei o le Malo o le Atua iā i latou. (Faata. 3:27) E leai se isi feʻau sili e faailoa atu i tagata na i lo le ola i le vaitaimi o le pulega a le Atua. E ui ina fai sou sao i le molimau atu lē fuafuaina po o le tuuina o mekasini, e lelei pe a fai ma ou sini le faia o se suʻesuʻega faale-Tusi Paia, pe afai e te lē o faia faapea.

2. O le ā e taofia i tatou mai le faia o se suʻesuʻega faale-Tusi Paia?

² O nisi taimi o le faafitauli tele i le faia o se suʻesuʻega faale-Tusi Paia o o tatou lava faalogona. O nisi e latou te lē faia se suʻesuʻega faale-Tusi Paia ona o faalogona lē mautinoa po o le pisi o a latou faasologa. O fautuaga o loo mulimuli mai e aogā iā te oe ia aua neʻi taofia mai le faia o suʻesuʻega faale-Tusi Paia.—Mata. 28:19; Galu. 20:20.

3. Aiseā ua tatou agavaa ai e aʻoaʻo le Tusi Paia?

³ Faalogona Lē Mautinoa: Atonu e leʻi lava au aʻoaʻoga po o se isi o māfuaaga e te lē o mautinoa i lou tomai e fai ai se suʻesuʻega faale-Tusi Paia. O auauna agavaa i le uluaʻi senituri e ‘⁠leʻi aʻoaʻoina ma valelea.’ Na faapefea ona latou aʻoaʻoina isi i le upu moni? “Sa latou faatasi ma Iesu.” (Galuega 4:13) Na aʻoaʻoina i latou e le Faiaʻoga Sili o Iesu, o ana aʻoaʻoga ma ana auala o loo i le Tusi Paia mo i tatou. E tusa pe lē lava au aʻoaʻoga, o loo e maua le aʻoaʻoga faaleagaga lea e lē mafai ona faatusaina i se isi aʻoaʻoga.—Isa. 50:4; 2 Kori. 3:5.

4. O le ā se mea tatou te aʻoaʻoina mai le faaaʻoaʻoga a Amosa?

⁴ I nisi taimi na tofia ai e Ieova perofeta e aʻoaʻia taʻitaʻi po o isi na i tofiga maualuluga. O nisi e pei o Amosa, e faatauvaa le siʻomaga na ola ai. Na faapea mai Amosa: “Ou te lē se perofeta aʻu nei, ou te lē se atalii foʻi o se perofeta; a o le fagamanu aʻu, ma le galue i sukamoru.” (Amo. 7:14) Ae e ui i lea e leʻi faafiti Amosa mai le taʻuina atu o le faasalaga a Ieova i le ositaulaga sa ifo i povi o Amasia. (Amo. 7:16, 17) E ao ona tatou manatua o loo tatou faia le galuega a le Atua ma e na te aumaia le tomai iā i tatou mo lea galuega.—2 Timo. 3:17.

5. Aiseā tatou te taumafai ai e amata se suʻesuʻega faale-Tusi Paia e ui ina pisi la tatou faasologa?

⁵ Pisi le Faasologa: E tusa pe iai sau faasologa pisi, ae atonu ua e faatulaga se taimi e te talaʻi ai. O le faia o se suʻesuʻega o se mea e sili ona fiafia ai, o se isi vala o le auaunaga. O se faaeaga le mātauina o le suia e le Afioga a Ieova o le olaga o se tasi. (Epe. 4:12) E fiafia Ieova pe a tatou tuua nisi o mea tatou te mananaʻo ai ina ia fesoasoani ai i se isi “ina iloa lelei le upu moni.” (1 Timo. 2:4) E olioli foʻi agelu pe a salamō se tasi mai i ona ala tuai ma agaʻigaʻi i luma faaleagaga.—Luka 15:10.

6. O le ā le faaeaga ua tatou maua i le faia o le finagalo o le Atua?

⁶ O le finagalo o le Atua “ina ia faaolaina o tagata uma lava, ma ia oo ina iloa lelei le upu moni.” (1 Timo. 2:4) Maʻeu se faaeaga o le galulue e ōgatasi ma le finagalo o le Atua, le lē faafiti i le faia o suʻesuʻega faale-Tusi Paia!