E Iai se Mea e Mafai Ona Tatou Avatu iā Ieova
1 Pe e te silafia e mafai e tagata ona avatu se mea i le Atua? Na faitaulaga Apelu iā Ieova i manu e sili ona lelei o lana lafu, ma na faia foʻi faapena e Noa ma Iopu. (Kene. 4:4; 8:20; Iopu 1:5) E mautinoa lava e leʻi faatamaoaigaina ai Lē na faia mea ona o na taulaga, auā o ia e ana mea uma. Ae na faataʻitaʻia mai i na taulaga le loloto o le alolofa o na tane faamaoni i le Atua. I aso nei, e mafai ona tatou faaaogā o tatou taimi, malosi, tupe ma alāmanuia e avatu ai “se taulaga o viiga” iā Ieova.—Epe. 13:15.
2 Taimi: E tāua tele le “faaaogā tatau” o le taimi e fai ai se sao atoatoa i le faiva nai lo le faaaogā i mea e itiiti lo latou aogā! (Efe. 5:15, 16) Tatou te ono fetuunaʻi la tatou faasologa o mea fai, ina ia mafai ai ona paeonia lagolago i se masina po o le sili atu foʻi i se tausaga. Tatou te ono faatele foʻi le taimi e auai i le faiva nai lo le taimi e masani ona auai. Afai e faaauau ona tatou galulue mo se 30 minute e sili ai nai lo le taimi e masani ona tatou uma ai i vaiaso taʻitasi, e uma ane le masina ua lua itula ua tatou faateleina ai la tatou faiva i le masina e tasi.
3 Malosi: Ina ia maua le malosi e faaaogā i le talaʻiga, e manaʻomia ona tatou ʻalofia mea tatou te fiafia i ai ma galuega ia e ono vaivai ai ma lē mafai ai ona tatou avatu le mea sili iā Ieova. E manaʻomia foʻi le aua tatou te soona atuatuvale ma “faavaivai ai” le loto, ma mou atu ai lo tatou malosi lea e mafai ona faaaogā e auauna ai i le Atua. (Faata. 12:25) E tusa foʻi pe talafeagai se mea tatou te popole ai, e sili ai ona ‘tuuina atu iā Ieova mea tatou te popole vale ai’!—Sala. 55:22; Fili. 4:6, 7.
4 Tupe ma Alāmanuia: E mafai foʻi ona tatou avatu a tatou alāmanuia e lagolago ai le galuega talaʻi. Sa faalaeiauina e Paulo ia aumea Kerisiano ina ia lē aunoa ona “tuu ese se mea,” ina ia iai se mea e avatu i ē e manaʻomia. (1 Kori. 16:1, 2) O le faia faapea, o le a mafai ai foʻi ona tatou tuu ese se tupe e foaʻi i manaʻoga o la tatou lava faapotopotoga atoa ai ma le galuega i le lalolagi aoao. E talisapaia e Ieova mea tatou te foaʻi mai le loto, e tusa lava pe itiiti.—Luka 21:1-4.
5 E anoanoaʻi mea ua foaʻi mai e Ieova iā i tatou. (Iako. 1:17) Tatou te faaalia lo tatou talisapaia e ala i lo tatou faaaogāina ma le lotomalie o lo tatou taimi, malosi, ma isi alāmanuia e auauna atu ai iā te ia. E faafiafiaina Ieova pe a tatou faia faapea, “auā e alofa le Atua i lē e foaʻi ma le lotofiafia.”—2 Kori. 9:7.