Pusa Fesili

◼ Pe talafeagai mo se Molimau a Ieova ona talia ni togafitiga po o se tausiga mai se falemaʻi po o se fale e tausia ai tagata matutua, lea e vaavaaia e se faalapotopotoga a se lotu?

E tele faalapotopotoga a lotu e iai a latou falemaʻi po fale e tausia ai tagata mamaʻi, ma maua ai ni togafitiga po o se tausiga mo se taimi umi. O le tulaga masani lava, o nei nofoaga e leʻi fuafuaina patino e faaauilumaina ai Papelonia Tele. (Faaa. 18:2, 4) Atonu na muaʻi fuafuaina e maua ai tupe a se faalapotopotoga a se lotu. I aso nei, o nisi falemaʻi ua na o se igoa lava o le lotu o loo latou tauaveina, a o nisi falemaʻi o loo faigaluega ai pea tagata mai i na lotu.

Pe a manaʻomia e se tasi o Molimau a Ieova se tausiga a se falemaʻi po o se fale e tausi ai tagata matutua, e tatau ona fai e le tagata lava ia lana faaiʻuga pe talia tausiga mai nei nofoaga, pe afai e ono iai se fesootaʻiga i lotu. E ono talia e le lotofuatiaifo o se tasi, ae ono teena e le lotofuatiaifo o le isi. (1 Timo. 1:5) E iai vala e ono fua i ai le faaiʻuga e faia e se tasi, ma e lelei pe a iloiloina nei mea.

O se faaaʻoaʻoga, o se falemaʻi po o se fale e tausia ai tagata matutua e iai se igoa o se lotu, e na o le pau lea o le falemaʻi o loo i lenā vaipanoa. Ia pe faapea foʻi o loo iai se isi nofoaga e lata ane, le falemaʻi lea e ono iai se fesootaʻiga i se lotu, ae e ono lauiloa i le sili atu ona lelei lana auaunaga. O le falemaʻi lea e iai se igoa faalelotu, atonu na o le pau lea o le falemaʻi e mafai ona latou faia le togafitiga o loo manaʻomia, ia pe na o le pau foʻi lea o le falemaʻi e iai se fomaʻi faapitoa e taulimaina lou tulaga. O nisi taimi, o falemaʻi e iai ni sootaga i lotu, e latou te ono faaaloalogia ou talitonuga o se Kerisiano e faatatau i le faaaogāina o le toto, a o nisi falemaʻi tumaʻoti po falemaʻi a le malo e lē faaaloalogia lou tulaga. O nisi la nei o vala e ao ona e iloiloina pe a fai sau faaiʻuga i le nofoaga e te filifilia.

Pe a e filifilia se falemaʻi po o se fale e tausi ai tagata matutua e iai se sootaga i lotu, atonu e te manatu i nei tulaga ua na o le totogiina o la latou auaunaga. Atonu e te vaai i lenei mea ua na o se faalapotopotoga faalelotu o loo faia sa latou pisinisi, ma i le totogia o se auaunaga a lenā pisinisi, e te lē o lagolagoina tuusaʻo lenā lotu sesē. E na o le auaunaga po o le oloa o loo e totogiina.

O le mea moni, i le avea o se Kerisiano, e tatau ona e faamautinoa e te lē o aafia i ni gaoioiga a lotu sesē. E lē gata i lea, e te lē faaaogāina taʻu faalotu e pei o le “Tamā” (Father) po o le “Tamaʻitaʻi” (Sister) i se tasi e faigaluega i na nofoaga. (Mata. 23:9) E tatau ona e iloilo totoʻa lenei mataupu, e faamautinoa ua na o se faiga faapisinisi lenā auaunaga, ae lē aafia ai faiga a lotu sesē.

Pe a taofia oe i se falemaʻi, e te ono faailoa atu o oe o se Molimau a Ieova, ma e te manaʻo i toeaina o lenā vaipanoa e asiasi atu iā te oe. O le faia faapea, o le a mautinoa ai lou mauaina o le lagolagosua faaleagaga a o e iai i inā.—1 Tesa. 5:14.

O tauaiga talitonu, o toeaina i lenā vaipanoa, ma isi i le faapotopotoga, e tatau ona latou tausia manaʻoga faaleagaga o so o se uso ma se tuafafine matutua, o ē ua nonofo i fale mo tagata matutua, lea e vaaia e se faalapotopotoga faalelotu. O taumafaiga malolosi i lea itu, o se faalaeiauga lea mo ē matutua, e ʻalofia ai le faaaofia o i latou i ni sauniga lotu, faamanatuina o aso mālōlō, po o nisi faiga faapena i nei nofoaga.

O manatu uma nei e ao ona iloa, ona iloilo lea o tulaga uma o loo aofia ai, ma fai le faaiʻuga a le tagata lava ia po o fea le falemaʻi po o le nofoaga mo ē gasegase e ao ona faaaogā.—Kala. 6:5.