Faamāfanafanaga mo Ē o Loo Faavauvau
1. Aiseā e manaʻomia ai e i latou o loo faanoanoa se faamāfanafanaga?
1 E matuā ogaoga mafatiaga o se tagata pe a maliu se tasi e pele iā te ia, aemaise i latou e aunoa ma se faamoemoe o le Malo. (1 Tesa. 4:13) E masani ona taumānatu le toʻatele: ‘Aiseā ua feoti ai tagata? O le ā le mea e tupu iā i latou ua feoti? Pe ou te toe feiloaʻi i ē pele iā te aʻu?’ O nisi nei o fautuaga e mafai ona tatou faaaogā e faamāfanafana ai ē tatou te feiloaʻi i le fanua, o loo faanoanoa ona o le oti o se tauaiga po o se uō.—Isa. 61:2.
2. Pe a faapea mai le tagata o loo ia faanoanoa ona o se maliu, pe tatau i taimi uma ona e taumafai e molimau atu mo se taimi umi?
2 Mai Lea Fale i Lea Fale: E ono faapea mai le tagata o le aiga e leʻi leva ona uma atu le maliu o se tasi o lo latou aiga. Po o foliga faanoanoa le tagata? Po o iai i le fale ni tauaiga faavauvau? I tulaga uma e pei ona taʻua, e lelei pe a faapuupuu lau molimau atu. (Fai. 3:1, 7) Atonu e mafai ona tatou faamāfanafana atu, tuu i ai se savali talafeagai, se mekasini, po o se polosiua ona tuumuli loa lea. Ona tatou toe foʻi atu lea i se taimi talafeagai e talanoa i faamāfanafanaga o loo i le Tusi Paia.
3. Pe a talafeagai ma o latou tulaga, o ā mau tatou te ono faaalia i le tagata o se aiga o faanoanoa?
3 O nisi taimi, tatou te ono mātauina ai e mafai ona talanoa umi i le uluaʻi asiasiga. E ui e lē o le taimi lenei e faasaʻo ai talitonuga sesē, atonu e mafai ona tatou faitau faatasi ma i latou folafolaga a le Tusi Paia e faatatau i le toetū. (Ioa. 5:28, 29) E mafai foʻi ona tatou faaali i ai le faamatalaga a le Tusi Paia e faatatau i le tulaga o le tagata ua maliu. (Fai. 9:5, 10) E maua foʻi faamāfanafanaga i faamatalaga o loo i le Tusi Paia i se tasi na toetū mai. (Ioa. 11:39-44) O se isi auala o le tagaʻi lea i faaupuga a le tagata faamaoni o Iopu i lona faamoemoe iā Ieova. (Iopu 14:14, 15) A o leʻi tuua le aiga, ia ofo i ai le polosiua Pe a Maliu se Tasi e Pele i a te Oe, po o se isi polosiua po o se savali e talafeagai. E mafai foʻi ona tatou tuua le tusi o Aʻoaʻoga a le Tusi Paia, ma tataʻi i latou i le mataupu e 6, ma fuafua se taimi e talanoaina ai lenei mataupu pe a e toe foʻi atu.
4. O ā nisi avanoa e tatau ona tatou avatu ai se faamāfanafanaga?
4 O Nisi Avanoa: Pe a fai se falelauasiga po o se sauniga o se maliu i le Maota mo Sauniga, po o le a auai ni tagata lē talitonu? E mafai ona avatu iā i latou ni lomiga o loo iai ni faamāfanafanaga. E talisapaia e nisi fale maliu, le mauaina o ni lomiga talafeagai mo aiga faavauvau. O nisi taimi, ona o faasilasilaga o maliu i nusipepa, ua maua ai le avanoa e tusi faamāfanafana atu ai i le aiga faavauvau. O se mea na tupu, ina ua maua se tusi na iai ma ni savali, ona ō atu lea o le tamāloa ua maliu lana avā ma lona afafine i le fale o le tagata talaʻi, ma fesili atu: “Po o outou lea na lafo mai ai lenei tusi? Ou te fia iloa atili e faatatau i le Tusi Paia!” Na malie le tamāloa ma si ona afafine e la te suʻesuʻeina le Tusi Paia, ma amata loa ona la auai i sauniga a le faapotopotoga.
5. Aiseā e tatau ai ona tatou mataala i avanoa e avatu ai se faamāfanafanaga mo ē o loo faavauvau?
5 O loo faapea mai le Failauga 7:2: “E sili ona lelei o le alu i le fale o i ai le faanoanoa, i le alu i le fale ua fai ai le tausamiga.” E sili atu ai le fia faalogo o le tagata o loo faavauvau i le Afioga a le Atua, nai lo lē e fiafia i faafiafiaga e tele. E tatau iā i tatou ona mataala ma mātau avanoa talafeagai, e avatu ai se faamāfanafanaga, mo ē o loo faavauvau ona o le maliu o se tasi e pele iā i latou.