E Tatou te Lepetia Mea ua Matuā Mautū
1 Mo le tele o senituri, ua faaaogā e Satani aʻoaʻoga pepelo ma le taufaasesē, e faatauaso ai loto ma mafaufau o le toʻatele o tagata. Ua ia faasalalauina aʻoaʻoga e pei o le Tasitolu, o le lē mafai ona oti o le agaga, ma le afi i seoli. Na te totōina le masalosalo e faatatau i le soifua o Lē na foafoaina mea uma, aemaise foʻi le fesiligia o le moni aʻiaʻi o le Tusi Paia. Ua avea le faailogalanu ma le lotonuu ma mea ua taofia ai tagata mai le taliaina o le malamalama o le upu moni. (2 Kori. 4:4) E faapefea ona tatou teena nei talitonuga ua matuā mauaa?—2 Kori. 10:4, 5.
2 Aafiaga o Faalogona i Talitonuga: E masani ona aafia faalogona loloto o se tagata i ona talitonuga faalotu ua leva ona iai. O nisi na talitonu i na talitonuga sesē mai lava a o laiti. Ina ia fesoasoani i na tagata, e tatau ona tautala atu i se auala e faaalia ai lo tatou faaaloalo i o latou manatu.—1 Pete. 3:15.
3 E mafai ona tatou faamamaluina i latou, e ala i le tuu i ai o le avanoa e faamalamalama mai ai o latou talitonuga, ma le māfuaaga ua latou talitonu ai faapea. (Iako. 1:19) Atonu latou te talitonu e lē oti le agaga pe a maliu se tasi e pele iā i latou, ma o loo faatalitalia le taimi e latou te toe feiloaʻi ai. Po o latou faamanatuina aso mālōlō ona o le avanoa lelei lenei e faatasitasi ai o se aiga? O le faalogologo lelei i a latou faamatalaga, o le a tatou iloa ai o latou faalogona ma fesoasoani iā i tatou e tali atu i se auala uigā.—Faata. 16:23.
4 Faaaʻoaʻo iā Iesu: Na faia e Iesu se faaaʻoaʻoga lelei mo i tatou i le auala na ia tali atu ai i fesili a se tamāloa e atamai i le Tulafono. E leʻi tali tuusaʻo Iesu i na fesili, auā atonu e teena e lenei tamāloa ona o talitonuga e pele iā te ia. Nai lo lea, na tataʻi e Iesu manatu i le Tusi Paia, ma valaaulia lenei tamāloa e faaali mai ona manatu, ona ia fesoasoani lea iā te ia e ala i le faia o se talafaatusa.—Luka 10:25-37.
5 E lē mafaatusalia aʻoaʻoga pepelo a lotu i le upu moni o le Afioga a le Atua. (Epe. 4:12) O le onosai i le auala e faamatala atu ai le upu moni ina ia pāʻia loto, e ono mafai ai ona tatou fesoasoani i tagata e teena aʻoaʻoga pepelo, ae taofimau i le upu moni lea e faasaʻolotoina ai i latou.—Ioa. 8:32.