E Tāua Tele Suʻesuʻega Faale-Tusi Paia a le Tagata Lava ia Faapea Foʻi le Aiga!
1. O le ā le mea o loo faapitoa lava ona manatu mamafa mai i ai le Vaega Pule i le taimi lenei, ma aiseā?
1 E pei ona sa iai i le uluaʻi senituri, e manatu mamafa tele le Vaega Pule i le lelei o tagata o Ieova. (Galu. 15:6, 28) A o faasolo ina lalata tele mai le puapuaga tele, e tāua tele i so o se tagata talaʻi ona iai se faiā malosi ma Ieova. O le a faapefea ona e faaaogā le taimi lea sa masani ona faaaogā i le Suʻesuʻega Tautusi a le Faapotopotoga? E faalaeiauina tagata uma ina ia faaaogā le taimi lenei mo le tapuaʻiga a le aiga. A tatou faaaogā ma le atamai lenei taimi, o le a mafai ona tatou suʻesuʻeina ma le faaeteete le Afioga a le Atua, ma maua ai le tele o aogā i afioga faasaoola o loo iai.—Sala. 1:1-3; Roma 11:33, 34.
2. O le ā se auala e ono faatulaga ai le tapuaʻiga i le afiafi a lo outou aiga?
2 Afiafi mo le Tapuaʻiga a le Aiga: E faalaeiauina ulu o aiga ina ia faatino o latou tiute tauave mai iā Ieova, e ala lea i le faia o se suʻesuʻega faale-Tusi Paia uigā faifai pea a le aiga. (Teu. 6:6, 7) O uso ma tuafāfine nofofua e leai ni tiute tauave faaleaiga, e mafai ona faaaogā le taimi lea e fai ai suʻesuʻega faale-Tusi Paia a le tagata lava ia ma ni saʻiliʻiliga loloto. E tāua tele mo i tatou uma ona “faaaogā tatau le taimi” e suʻesuʻe ma manatunatu loloto ai ina ia faatumauina ai se faiā malosi ma Ieova e ui lava i nei ‘aso leaga’ ua iai.—Efe. 5:15, 16.
3, 4. O ā fautuaga ua ofo mai e faatatau i mataupu tatou te ono faaaogā, ma o le ā le māfuaaga o le faia faapea?
3 Mataupu e Suʻesuʻe: E mafai ona fesoasoani le Watch Tower Publications Index po o le Watchtower Library i le CD-ROM i le saʻilia o faamatalaga e fesoasoani ina ia avea la outou suʻesuʻega faale-Tusi Paia o se taimi fiafia. E mafai e aiga ona iloiloina mataupu mai Le Olomatamata, e pei o mataupu masani lea e faaulutalaina “O Auala e Fiafia ai le Aiga,” “Ia Aʻoaʻo Lau Fanau,” ma le “Mo le ʻAutalavou.” O loo maua foʻi i le Ala Mai! le faasologa o mataupu faaoso naunau, “Ua Fesili Mai Talavou” ma mea ofoofogia o le foafoaga.
4 Pe a faitau faatasi le Tusi Paia e le aiga i se auala e lē faatopelauina ona fai, o le a fesoasoani i tagata taʻitasi o le aiga e manatua ma faatatau mataupu silisili i o latou olaga. (Epe. 4:12) I nisi taimi, e tou te ono matamata ma talanoa i se ata vitiō a le faalapotopotoga. O le a telē le avanoa e filifili ai po o le ā le mataupu e suʻesuʻe ma le auala e suʻesuʻe ai. E mafai foʻi ona fesili i le tou aiga po o le ā latou te mananaʻo e fai.
5. Aiseā e tāua ai tele i o tatou olaga ia suʻesuʻega a le tagata lava ia ma suʻesuʻega faale-aiga?
5 Le Tāua o le Faia Faapea i le Taimi Nei: O le faamalosia o la tatou faiā ma Ieova, o le a sauniunia ai i tatou e “laulau tutū ma vāai atu i le olataga mai iā Ieova.” (Eso. 14:13) E manaʻomia e mātua le taʻitaʻiga mai le Atua i le tausia aʻe o fanau “i le tupulaga faapiʻopiʻo ma le taufaasesē.” (Fili. 2:15) E manaʻomia e fanau le fesoasoani ina ia taulau ai i le feagai ai ma amioga paʻū maulalo i aʻoga i aso nei. (Faata. 22:3, 6) Ua manaʻomia i ulugalii ona faamalosia la latou faiā “sautuatolu” ma Ieova. (Fai. 4:12) Tau ina ia tatou faaaogā tatau le taimi o totoe, e atiaʻe ai i tatou uma lava i lo tatou “faatuatua e sili ona paia”!—Iuta 20.