E Manaʻomia le Tumau i le Auaunaga
1 E silia i le 30 tausaga o galue fiafia le aposetolo o Paulo i lana galuega autū o se faievagelia. Ma e pei lava ona masani ai i so o se taumafaiga aogā, e leʻi ʻasa foʻi lana talaʻiga ma ni faafitauli. (2 Kori. 11:23-29) Peitaʻi ane, e leʻi taofia ai Paulo mai le talaʻi atu pea. (2 Kori. 4:1) Sa iloa lelei e Paulo, o Ieova e foaʻi maia le malosi e tumau ai a o faatino lana auaunaga. (Fili. 4:13) A fua la i le faaaʻoaʻoga o le tumau ma le faamaoni o Paulo, ua talafeagai lona faapea mai: “Ia faaaʻoaʻo iā te aʻu, e pei ona ou faaaʻoaʻo iā Keriso.”—1 Kori. 11:1.
2 Onosaia o Puapuaga i Aso Nei: O loo fesagaʻi le tele o o tatou uso ma tauemuga, o teteega, faapea ma le lē ano ane o o latou aiga ma tagata e latou te faigaluega ma aʻoʻoga faatasi. (Mata. 10:35; Ioa. 15:20) E ono faapena foʻi oe. Pe atonu foʻi o loo e tauivi ma se gasegase tugā, po o e tauivi foʻi i aso uma e teena faaosoosoga ma mea o loo tofotofoina ai lou faatuatua ma lou tumau. E tatou te maua le malosi e ala i le iloiloina o faaaʻoaʻoga a auauna faatuatua anamua, faapea foʻi ma aumea Kerisiano i aso nei o ē ua manumalo i luʻitau faapena.—1 Pete. 5:9.
3 Ia mautinoa ua tatou “oofu i le ofutau atoa mai le Atua,” ina ia mafai ai ona tatou malolosi ma tutumau i la tatou auaunaga. (Efe. 6:10-13, 15) E tāua tele le tatalo ia tutumau. E foaʻi mai e le Atua lona agaga paia ina ia tatou onosaia ai ma tumau i puapuaga. (2 Kori. 6:4-7) Ina ia tatou manumalo la i le taua faasaga iā Satani ma lana lalolagi, e ao ona tatou utagia mea o loo faamanatu mai e le Atua auā e faafouina ai lo tatou malosi faaleagaga. (Sala. 119:24, 85-88) E pei lava ona faitauina pea lava pea e se tamaitiiti lelei se tusi mai i sona tamā agaalofa, o lo tatou faitauina e lē aunoa o le Tusi Paia e faamalosia ai le sootaga ma Ieova. E tatou te maua le poto e fesagaʻia ai tulaga faigatā e ala i a tatou suʻesuʻega faifai pea, e tatou te faia ai filifiliga e ōgatusa ma le finagalo o le Atua ma faamalosia ai lo tatou faamaoni iā te ia.—Faata. 2:10, 11.
4 E Faamanuiaina Ona o le Tumau: E pei ona moni i le tulaga o Paulo, o lo tatou tumau ma le faamaoni, a o faataunuu la tatou faiva, e faafiafiaina ai Ieova ma tatou maua ai faamanuiaga, faapea foʻi ma isi. (Faata. 27:11) Tau ina ia tatou finafinau i le auaunaga, ma faamaonia ai le mausalī o lo tatou faatuatua, “e sili atu nai lo o le auro e faaumatia e ui lava ina faamamāina i le afi.”—1 Pete. 1:6, 7.