Sa autasi ma filemu foafoaga uma a le Atua i lana pulega

Aiseā e Tatou te Manaʻomia ai le Malo o le Atua?

Mai lava i le amataga o le tala faasolopito o le tagata, e na o Ieova o Lē na foafoaina mea na avea ma pule. Sa ia pule i se auala alofa. Na ia faia le faatoʻaga matagofie i Etena ina ia nonofo ai tagata ma saunia le anoanoaʻi o meaʻai mo i latou. E faaopoopo atu i lenā, na ia avatu i ai ni galuega aogā e latou te faia. (Kenese 1:28, 29; 2:8, 15) Sa mafai ona olioli tagata i le filemu pe ana latou tumau i le pulega alofa a le Atua.

O loo uu e Atamu le fua o le laau na faasāina na avatu i ai e Eva. — Na teena e le uluaʻi tagata le avea ai o le Atua ma Pule

Na faailoa mai e le Tusi Paia se agelu fouvale, na mulimuli ane taʻua o Satani le Tiapolo lea na luʻia le aiā a le Atua e pule ai. Na ia faapea mai e mafai ona maua e tagata le fiafia e aunoa ma le taʻitaʻiga ma le pule a le Atua. O le mea e faanoanoa ai, na mulimuli Atamu ma Eva i le faaaʻoaʻoga a Satani ma la tetee ai i le pule a le Atua.—Kenese 3:1-6; Faaaliga 12:9.

O lo la teena o le Atua e avea ma Pule, na leiloa ai le la Parataiso matagofie ma le faamoemoe e ola e faavavau, i le soifua mālōlōina lelei atoatoa. (Kenese 3:17-19) O le la filifiliga na aafia ai foʻi le la fanau na maua mulimuli ane. Na taʻua i le Tusi Paia, ona o le agasala a Atamu na ʻoo mai ai le agasala i le lalolagi, o le oti foʻi ona o le agasala.’ (Roma 5:12) O le agasala ua taʻitaʻia atu ai i se isi iʻuga mataʻutia: “Ua pule ai le tagata i le isi tagata ma ua matuā afāina ai o ia.” (Failauga 8:9) I se isi faaupuga, pe a pule le tagata iā i latou lava, e faatalitalia faafitauli o le a oo mai.

AMATA PULEGA FAALETAGATA

O loo tu ma le faasausili Nimarota. I tua atu o loo fausia e tagata se fale. — Na tetee Nimarota iā Ieova

O le pule faaletagata muamua lava o loo taʻua i le Tusi Paia o Nimarota, ma na ia tetee i le pulega a Ieova. Talu mai taimi o Nimarota, ua faaaogā sesē e i latou e iai tulaga maualuluga le pule ina ia faatigā ai i isi. Na tusi le tupu o Solomona i le pe ā ma le 3,000 tausaga talu ai: “Ua ou iloa loimata o ē o loo sauāina, ma ua leai se tasi e faamāfanafana iā i latou. Ua iai foʻi le pule i ē e sauāina i latou.”—Failauga 4:1.

O le tulaga lava foʻi lenā i aso nei. I le 2009 na taʻua ai e se tusi a Malo Aufaatasi, o pulega leaga “o se tasi lea o māfuaaga autū o faafitauli o tagata.”

TAIMI E GAOIOI AI!

Ua manaʻomia e le lalolagi se pule ma se faigāmalo lelei. O le mea lenā ua folafola mai e Lē na foafoaina mea!

Le tuufaatasiga o ata: O iʻuga o pulega a tagata. 1. O se fafine Asia o loo nofo i se auala palapalā o loo sii lana tama o loo tagi. 2. O se toeaina maʻi o loo taoto i se moega o le falemaʻi. 3. O fitafita o loo i le taua. 4. O tagata tetee o loo feita ma feʻei atu a o uu a latou fuʻa. 5. O loo tutū se tinā ma lana tama teine i fafo o le latou fale ma iloa atu ai le tioata o le faitotoʻa ua taʻe. 6. Se aai ua faatumulia i le asu mai i ālā asu ma uaea eletise. — E oo lava i se pulega lelei faaletagata e leʻi taulau i le foʻiaina o faafitauli matuiā o tagata

Ua faatūina e le Atua se Malo po o se faigāmalo, lea o le a suitulaga i pulega faaletagata, ae o le a “tumau lea malo e faavavau.” (Tanielu 2:44) O le Malo lea o loo tatalo i ai le faitau miliona o tagata. (Mataio 6:9, 10) Peitaʻi, e lē o le Atua o le a pulea lea faigāmalo. Ua Ia tofia e avea ma Pule sē na soifua o se tagata. O ai ua filifilia e le Atua?