Ia Filifili e Lagolagoina le Malo o le Atua i le Taimi Nei!

I se tulaga talitutusa, ua tatou lata atu i le taimi o le a agi ai se “matagi” malosi, lea na taʻua e Iesu o le “puapuaga tele.” (Mataio 24:21) E lē mafai ona tatou ʻalofia le oo mai o lenā taimi, ae e mafai ona tatou faia se gaoioiga ina ia puipuia ai i tatou. O le ā lenā gaoioiga?

I le lauga a Iesu i luga o le mauga, na ia aumai ai le fautuaga lenei: ʻO lea, ia faaauau pea ona outou saʻili muamua le Malo o le Atua ma lana amiotonu.’ (Mataio 6:33) E faapefea ona tatou faia lenā mea?

Saʻili muamua le Malo o le Atua. O lona uiga e tatau ona tatou vaai i le Malo o le Atua o se mea e sili ona tāua nai lo o se isi lava mea. (Mataio 6:25, 32, 33) Aiseā? Talu ai e lē o mafai e tagata ona foʻia o tatou faafitauli. Ua na o le Malo o le Atua e mafai ona ia faia faapea.

Saʻili lana amiotonu. E tatau ona tatou taumafai malosi ia ola e tusa ma tulafono ma mataupu silisili amiotonu a le Atua. Aiseā? Talu ai pe a filifili lava e i tatou le mea saʻo ma le mea sesē, e matuā leaga ona iʻuga e oo i ai. (Faataoto 16:25) I le isi itu, pe a tatou ola i tapulaa a le Atua, e lē gata o le a faafiafiaina ai le Atua ae e tatou te maua ai foʻi se olaga fiafia.—Isaia 48:17, 18.

Ia faaauau pea ona saʻili muamua le Malo o le Atua ma lana amiotonu. Na lapataʻi mai Iesu e ono faasesēina se tasi i le manatu, e mafai ona maua le saogalemu i le saʻilia o le tele o tupe. O nisi latou te faatagaina popolega o le olaga e lofitūina i latou ma leai ai se taimi e saʻili ai le Malo o le Atua.—Mataio 6:19-21, 25-32.

E ui i lea, na folafola mai e Iesu o le a maua e i latou e lagolagoina le Malo o le Atua mea e manaʻomia i le taimi nei, ma olioli i faamanuiaga tumau i le lumanaʻi.—Mataio 6:33.

I le uluaʻi senituri, e oo lava i soo o Iesu na saʻilia muamua le Malo o le Atua ma lana amiotonu, e latou te leʻi vāai i le mutaaga o tigā ma mafatiaga o tagata i o latou taimi. Peitaʻi, na latou maua le puipuiga. E faapefea?

Na latou ola e tusa ai o taʻiala amiotonu a le Atua, ma na puipuia ai i latou mai i faafitauli na oo i ē na teena fetalaiga a le Atua. O le malosi o lo latou faatuatua i le oo mai o le Malo, na fesoasoani iā i latou e oo lava i faafitauli matuiā o le olaga. Na avatu foʻi e Ieova le “mana lea e sili atu i le malosi o tagata,” ina ia faamalosia ai lo latou faamoemoe.—2 Korinito 4:7-9.

PO O LE A E SAʻILI MUAMUA LE MALO O LE ATUA?

Na usitaʻia e Kerisiano i le uluaʻi senituri le faatonuga a Iesu ia saʻili muamua le Malo. Na latou talaʻia le tala lelei o le Malo i lo latou vaipanoa i lenā taimi. (Kolose 1:23) Po o iai nisi o faia lenā galuega i aso nei?

Ioe! Ua iloa e Molimau a Ieova ua lē o toe umi se taimi o totoe, ona aumaia lea e le Malo o le Atua le iʻuga o lenei faiga o mea. O lea ua latou faia ai taumafaiga uma ina ia ola e tusa ai ma fetalaiga nei a Iesu: “O le a talaʻiina atu foʻi lenei tala lelei o le Malo i le lalolagi atoa e fai ma molimau i atunuu uma, ona oo mai ai lea o le iʻuga.”—Mataio 24:14.

O le ā le auala o le a e tali atu ai i le tala lelei? E matou te faalaeiau oe ia faaaʻoaʻo i ē na iai i le uluaʻi senituri i Maketonia, i le aai o Perea. Ina ua latou faalogo i le tala lelei o le Malo lea na talaʻia e Paulo, ona latou talia lea “ma le matuā naunau.” Ina ua uma, ona latou ʻmatuā iloiloina lea o Tusitusiga Paia,’ ina ia faamautinoa le moni o mea ua latou faalogo i ai ma faatatauina mea na latou aʻoaʻoina.—Galuega 17:11, 12.

E mafai foʻi ona e faia faapea e ala i le saʻilia muamua o le Malo o le Atua ma lana amiotonu. O le a e maua ai le puipuiga i le taimi nei ma olioli ai i le filemu ma le saogalemu tumau i le lumanaʻi.