Le Auala e Faaaogā ai le Tusi ‘Alofa o le Atua’ e Faia ai Suʻesuʻega Faale-Tusi Paia
1. O le ā le fuafuaga o le tusi ‘Alofa o le Atua’?
1 E pei ona faalauiloa atu i le Tauaofiaga Itumalo “Ia Taʻitaʻia e le Agaga o le Atua,” ua fuafuaina le tusi ‘Ia Faatumau iā te Outou i le Alofa o le Atua’ e fesoasoani ina ia tatou iloa ma naunau ai i tapulaa a Ieova i amioga tatau, ae lē o le aʻoaʻoina o aʻoaʻoga faavae o le Tusi Paia. E tatou te lē ofoina le tusi lenei i le galuega talaʻi.
2. E faapefea ona faaaogā le lomiga lenei, ma o ai e tatau i ai?
2 O le a avea le tusi lenei ma tusi lona lua e suʻesuʻeina ma tagata aʻoga o le Tusi Paia pe a māeʻa le tusi Aʻoaʻoga a le Tusi Paia. Ia tatou manatua pea aua neʻi galo, e eseese le vave o le tuputupu aʻe faaleagaga o tagata. E tatau ona faatautaia suʻesuʻega taʻitasi e tusa ma le tulaga o le tagata aʻoga. Ia faamautinoa ua malamalama atoatoa le tagata i le mataupu o loo iloiloina. I le tele o taimi, e lē tatau ona faaaogāina le tusi lenei e amata ai se suʻesuʻega faale-Tusi Paia ma tagata ua tele ni tusi ua uma ona latou suʻesuʻeina i taimi ua mavae, ma e lē o auai i sauniga a le faapotopotoga, ma e manino mai i le auala o loo ola ai e lē o naunau e faaōgatusa o latou olaga ma upu moni o le Tusi Paia ua aʻoaʻoina ai i latou.
3. O le ā e tatau ona tatou fai pe afai o loo tatou faia se suʻesuʻega i le tusi, Tapuaʻi i le Atua?
3 Pe afai o loo e faia se suʻesuʻega i le taimi nei i le tusi, Tapuaʻi i le Atua ma ua lē o toe tele ni mataupu o loo totoe, e te ono faaauau pea seʻia uma lenā lomiga ma faalaeiau le tagata e faitau lava e ia le tusi ‘Alofa o le Atua.’ A lē o lea, e sili loa ona suesue le tusi fou ma amata mai i lona amataga. E pei o le tusi Aʻoaʻoga a le Tusi Paia, e filifili lava le tagata ia pe iloiloina le faaopoopoga o loo i tua.
4. O le ā tatou te fai pe a fai ua papatiso la tatou tagata aʻoga a o leʻi māeʻa ona ia suʻesuʻeina tusi o le Aʻoaʻoga a le Tusi Paia ma le ‘Alofa o le Atua’?
4 Pe a papatiso se tagata a o leʻi māeʻa tusi e lua, e tatau ona faaauau pea le suʻesuʻega seʻia māeʻa le tusi ‘Alofa o le Atua.’ E ui ua uma ona papatiso le tagata, e mafai lava ona e lipotia le taimi, le toe asiga, ma le suʻesuʻega. Afai lua te toʻalua ma se isi tagata talaʻi ma e faia sona sao i le suʻesuʻega, e mafai foʻi ona tau lona taimi.
5. E faapefea ona faaaogā le tusi o le ‘Alofa o le Atua’ e fesoasoani ai iā i latou ua umi se taimi e lē o toe talaʻi?
5 Pe a tofia oe e le Komiti o le Auaunaga a le Faapotopotoga e fai se suʻesuʻega faale-Tusi Paia ma se tagata ua lē o toe talaʻi, e ono fautuaina oe e iloilo ni mataupu patino e fili mai le tusi, ‘Alofa o le Atua.’ E lē tatau ona faaauau pea mo se taimi umi ona faia na suʻesuʻega. O se sauniuniga matagofie lenei tusi fou, lea ua faatulaga e fesoasoani iā i tatou ia tumau pea “i le alofa o le Atua”!—Iuta 21.