Polokalame o le Aso Faapitoa o Fonotaga mo le 2010
1. (a) O ā matua e faavae i le Tusi Paia sa talanoaina i a tatou aso faapitoa mo fonotaga i tausaga talu ai nei? (e) Po o iai ni manatu tāua mai i aso faapitoa mo fonotaga ua teʻa o fesoasoani iā te oe i lau faiva?
1 “Ia Outou Faamautinoa o Mea e Sili Ona Tāua,” “Ia Tutū Mausalī o se Lafu e Tasi,” “Ia Tinoū e Taʻutino Atu le Upu,” ma le “O Tatou o le Omea—A o Ieova le Tufuga.” (Fili. 1:9, 10, 27; Ioa. 18:37; Isa. 64:8) O nisi nei o le tele o matua sa talanoaina i aso faapitoa mo fonotaga i taimi ua teʻa. Po o e faanaunau e auai i le aso faapitoa mo fonotaga i le tausaga faaleauaunaga e 2010? O le a talanoaina ai le matua: “Ua Itiiti le Taimi o Totoe,” e faavae i le 1 Korinito 7:29.
2. E faapefea ona tatou atiaʻe le sagisagi fiafia i lenei aso faapitoa mo fonotaga?
2 O le taimi lava e faasilasila ai i le tou faapotopotoga le aso mo le aso faapitoa mo fonotaga, ia faagaee le sagisagi fiafia mo le aso faapitoa mo fonotaga. O nisi mātua e fesoasoani i a latou fanau e tepa taulaʻi i le fono e ala i le faailoga o le aso i le kalena a le aiga, faatasi ai ma le lisi o mea e manaʻomia e tagata taʻitoʻatasi ona ave i le fono, ona amata faitau lea o aso o totoe seʻi oo lava i le aso o le fono. I le afiafi o la outou Tapuaʻiga a le Aiga, e tou te ono autaluina faamaumauga mai i aso faapitoa mo fonotaga ua teʻa. E mafai foʻi ona sauniunia outou loto mo lenei faatasiga e ala i le autaluina o le mataupu i le tusi Mauaina o Aogā Mai i le Aʻoga o le Faiva Faatiokarate, itulau 13-16, e fesoasoani iā te oe ma lou aiga ia “uaʻi atu i la outou faalogo.”—Luka 8:18.
3. E faapefea ona tatou maua atoatoa aogā mai i mea o le a talanoaina ai?
3 Ia Faatatau Mea e te Aʻoaʻoina: O le faaupuga masani lava pe a uma se fonotaga, “E ese le manaia o le polokalame!” O le mea moni lava lenā, auā o se tasi lenei o le tele o sauniuniga e faatamaoaigaina ai mai iā Ieova. (Faata. 10:22) Ina ia aogā mataupu o fono, e ao ona e manatunatu loloto ma tausi i ai. (Luka 8:15) A o toe foʻi i le fale mai le fonotaga faaalu se taimi e talanoa ai i le polokalame ma le tou aiga po o i latou tou te malaga faatasi i le taavale. Ia talatalanoa i sini o tagata taʻitasi ma manatu o le a fesoasoani iā te oe i lau faiva. O le faia faapea o le a saosaolaumea i le umi o se taimi o aogā iā te oe mea e maua mai i fonotaga.—Iako. 1:25.
4. Aiseā o le a faapitoa ai lenei fonotaga iā i tatou?
4 E masani ona iā i tatou le lagona ua faapitoa i tatou pe a tatou maua se meaalofa e aogā patino iā i tatou. Pe tatou te lē o sagisagi fiafia ea ma aloalo atu i mea o loo saunia mai e Ieova i la tatou aso faapitoa mo fonotaga o loo loma nei? E mautinoa lava o le a tatou maua ai aogā e tele. E tatou te faatalitalia o le a tatou maua mai i lo tatou Tamā i le lagi, o Ieova, le meaalofa talafeagai e ala mai i faalaeiauga ma le toleniga ina ia faaauau ona fai le galuega ua ia tofia i tatou e fai.—2 Timo. 4:2; Iako. 1:17.