Talaʻi ma se Uiga Faanatinati!
1. O le ā le apoapoaʻiga a Paulo e manaʻomia ona tatou uaʻi atu i ai i o tatou aso?
1 ‘Ia talaʻi le upu ma ia faanatinati.’ (2 Timo. 4:2) Aiseā e matuā tāua ai le apoapoaʻiga a Paulo i o tatou aso? E faapefea i nei upu ona aafia ai o tatou olaga ma olaga o isi?
2. Aiseā tatou te filigā ai e saʻili i latou o ē e leʻi faalogo i le tala lelei?
2 O loo Aafia ai Ola: E faitau miliona tagata i le lalolagi atoa e leʻi faalogo lava i le tala lelei e mafai ona taʻitaʻiina ai i latou i le faaolataga. (Roma 10:13-15; 1 Timo. 4:16) E toʻatele tagata lotofaamaoni o loo maua i oganuu e galueaʻiina soo. Afai e tatou te asiasi atu i se isi aso, po o se isi taimi o le aso, e tatou te ono maua ai se isi tagata e ese mai. O lena saʻiliga ma le filigā, o le a tuua ai i tatou ma se loto fuatiaifo mamā, ma lē nofosala ai i le toto.—Galu. 20:26.
3. E faapefea ona tatou faaaogā le taimi a o auai i le faiva?
3 E ui ina fesagaʻi Kerisiano i le uluaʻi senituri ma teteega sauā, ae na ‘latou faatumu Ierusalema i a latou aʻoaʻoga.’ (Galu. 5:28) Po o faapena foʻi ona tatou maumauaʻi e “molimau māeʻaeʻa”? (Galu. 10:42) Pe a tatou ō i le faiva, pe e tatou te faaaogā tatau le taimi? Pe afai o tatou faatalitali ae ō atu isi e fai toe asiga, pe e tatou te tausolomua ona talanoa atu i tagata e feoaʻi ane?
4. E faapefea ona fesoasoani le talaʻi ma le uiga faanatinati iā i tatou e mataala ai pea?
4 Faateleina lo Tatou Mataala: A o latalata mai le iʻuga o lenei faiga o mea, e tatau ona tatou mataala ma leoleo i tatou. (1 Tesa. 5:1-6) Pe a tatou talanoa atu pea e uiga i le faamoemoe o le Malo, ua ʻalofia ai le faamamafaina o ō tatou loto e lenei faiga o mea’. (Luka 21:34-36) I le isi itu, a o “tāmau i o tatou mafaufau” le aso o Ieova, ua uunaʻia ai i tatou e faateleina so tatou sao i le galuega talaʻi faasaoola.—2 Pete. 3:11, 12.
5. E faapefea i le faaaloalo i le ola ona uunaʻia ai i tatou e auai i le faiva?
5 Pe a tatou talaʻi ma le faanatinati, ua tatou faaatagia atu ai le silafaga a Ieova i le ola: “E lē finagalo o ia e faaumatia se tasi, ae e finagalo ia oo uma lava i le salamo.” (2 Pete. 3:9; Eseki. 33:11) Seʻi o tatou taumafai ma le naunau e faafeiloaʻi le toʻatele o tagata e mafai ai i la tatou oganuu, ina ia viia ai Ieova i mea uma!—Sala. 109:30.