ʻO le a Talaʻiina Atu Lenei Tala Lelei’!
1. E faapefea ona tatou iloa e leai se mea e mafai ona taofia le galuega talaʻi?
1 E matuā leai lava se mea e mafai ona taofia Ieova mai i le faataunuuina o lona finagalo. (Isa. 14:24) E ui e foliga mai e lē mafai e le faamasino o Kitiona ma ona tagata e toʻa 300 ona tau ma le ʻautau e toʻa 135,000 a Mitiana, ae na fetalai mai Ieova iā te ia: “Inā alu ia i lou malosi, e te faaolaina lava Isaraelu mai i lima o Mitiana. Po ou te leʻi auina atu ea oe?” (Faama. 6:14) O le ā le galuega o loo lagolagoina e Ieova i aso nei? Na fetalai Iesu: “O le a talaʻiina atu lenei tala lelei o le malo i le lalolagi atoa.” (Mata. 24:14) E leai se tasi e mafai ona taofia le faataunuuina o lenei galuega!
2. Aiseā e tatou te faatalitalia ai e fesoasoani mai Ieova iā i tatou taʻitoʻatasi i le faiva?
2 Fesoasoani Ieova iā i Tatou Taʻitoʻatasi: Ua tatou mautinoa, e mafai ona faataulau e Ieova lana faalapotopotoga atoa, ae pe e tatou te faatalitalia Ieova e fesoasoani mai iā i tatou taʻitoʻatasi? I se taimi faigatā, na lagona ai e le aposetolo o Paulo le lagolago a Ieova iā te ia e ala i lona Alo o Iesu. (2 Timo. 4:17) E mafai foʻi ona tatou mautinoa o le a faapena ona faamanuia e Ieova a tatou taumafaiga e faia lona finagalo.—1 Ioa. 5:14.
3. O ā tulaga e fesoasoani ai Ieova iā i tatou?
3 Pe e avea popolega o le olaga ma pogai ua e tau vaivai ai i le faiva? “E na te avatu le malosi i lē ua vaivai.” (Isa. 40:29-31) Po o e fetaiaʻi ma sauāga po o teteega? “Ia tuuina atu iā Ieova ou popolega uma, o ia lava e na te tausia oe.” (Sala. 55:22) Pe e te lagona ea i nisi taimi e te lē agavaa? “Inā alu ia, ou te fesoasoani iā te oe pe a e tautala.” (Eso. 4:11, 12) Po o faalētonu lou soifua mālōlōina, ua e tau lē alu ai i le talaʻiga? E tāua ma e fiafia Ieova i au taumafaiga ma le lotoatoa e tusa lava pe laʻitiiti.—1 Kori. 3:6, 9.
4. E faapefea ona aafia i tatou ona o le mautinoa iā Ieova?
4 “O loo faaloaloa atu [e Ieova] lona aao, o ai na te mafai ona faafoʻisiaina?” (Isa. 14:27) E mautinoa e faamanuia e Ieova la tatou faiva, o lea, seʻi o tatou faia pea le talaʻiga “ma le lototetele e ala i le pule mai iā Ieova.”—Galu. 14:3.