E Tatau i Tagata Talaʻi Ona Tatalo
1. O le ā se mea e manaʻomia ina ia faataunuu ai la tatou faiva?
1 E lē mafai ona tatou faataunuu le faiva i lo tatou lava malosi. E foaʻi mai e Ieova le malosi e fai ai le galuega. (Fili. 4:13) E na te tofia agelu e fesoasoani iā i tatou i le saʻilia o ē e pei o ni mamoe. (Faaa. 14:6, 7) O Ieova na te faatupuina fatu o le upu moni na tatou totō ma faasūsū. (1 Kori. 3:6, 9) Maʻeu le tāua i tagata talaʻi ona faalagolago i lo tatou Tamā o i le lagi e ala i le tatalo!
2. O ā nisi o mataupu e tatalo atu ai?
2 Mo i Tatou: E tatau ona tatou tatalo i taimi uma tatou te talaʻi ai. (Efe. 6:18) O ā nisi o mataupu e tatou te tatalo atu ai? E mafai ona tatou tatalo mo le lototele ma le manatu saʻo e faatatau i tagata i le oganuu. (Galu. 4:29) E tatou te talosaga atu iā Ieova e taʻitaʻi i tatou i ē loto saʻo ina ia amata ai se suʻesuʻega. Afai e lāgā e lē e ona le fale se fesili, ia fai se tatalo puupuu lē leoa, e talosaga ai le fesoasoani a Ieova e avatu le tali saʻo. (Nee. 2:4) E mafai ona tatou talosaga atu mo le atamai ina ia faamuamua pea le faiva i le olaga. (Iako. 1:5) E fiafia foʻi Ieova pe a faaaofia i a tatou tatalo faaupuga o le faafetai mo le faaeaga ua avea ai i tatou ma ana auauna.—Kolo. 3:15.
3. E faapefea ona faaauiluma le galuega talaʻi e ala i le tatalo mo isi?
3 Mo Isi: E tatau foʻi ona “tatalo le tasi mo le isi” ma taʻua igoa o uso taʻitasi pe a talafeagai ai. (Iako. 5:16; Galu. 12:5) Po ua avea le lē lelei o le soifua mālōlōina ma pogai ua e tau lē alu ai i le talaʻiga? O lea la, ia tatalo mo uso auauna o ē o loo malolosi. Aua neʻi manatu māmā i le malosi o au tatalo mo i latou! E talafeagai foʻi ona tatalo mo faipule silisili ina ia talileleia le galuega talaʻi, ina ia mafai e o tatou uso ona “ola i ni olaga toʻafimālie ma le filemu.”—1 Timo. 2:1, 2.
4. Aiseā e tatau ai ona tatou finafinau i le tatalo?
4 O le folafola atu o le tala lelei i le lalolagi uma, o se galuega e faigatā ona faia i lo tatou lava malosi. Afai tatou te “finafinau i le tatalo” o le a faataunuuina le galuega i le fesoasoani a Ieova.—Roma 12:12.